Jabaıy jýa jınaýshy zeınetkerge 1 mln. teńge aıyppul salyndy

Taýdyń bókterinde ósip turǵan jabaıy jýany jınaǵany úshin Shyǵys Qazaqstan oblysy Glýbokoe aýdany Cheremshanka aýylynyń zeınet jasyn­daǵy turǵyny Svetlana Kolesnıkova memleketke 1 mıllıon teńge aıyppul tóleıtin boldy. Sóıtsek, jabaıy óskinniń bul túri Qazaqstannyń Qyzyl kitabyna engizilgen eken. Odan beıhabar ájeı dalada ósip turǵan ósimdikti talǵajaý etpek bolǵan ǵoı. Sol úshin aýdandyq sot osyndaı jazaǵa tartty. Aıyna 32 myń teńge zeınetaqy alatyn 60 jastaǵy áıel endi 5 jyl boıy osy bereshekti óteıtin bolady. S.Kolesnıkova ómir boıy  Cheremshanka aýylyndaǵy qus fabrıkasynda qusshy bolyp eńbek  etipti. Kásiporyn bankrotqa ushyraǵannan beri ormannan jemis-jıdek terýmen kún kórip keledi eken. Endi ol osy áreketi úshin jazyqty bolyp, memleketke qomaqty aıyppul tólemekshi. Ony tabıǵat qorǵaý polısııasy jýa terip júrgen jerinen ustap alǵan. Jalpy, Cheremshanka aýylynda ústimizdegi jyly tap osyndaı fakt boıynsha 3 turǵyn jaýapqa tartylypty.  Olardyń barlyǵyna tabıǵatqa asa úlken mólsherde zalal keltirgeni úshin aıyppul salynǵan kórinedi. Qurysh NURYMBET.