Jahandyq jarystaǵy – Elsın, Býsh, Obama...

Mamandar búgin sóreden shyǵatyn álem chempıonatyna qatysatyn Kosta-Rıka quramasynyń 22 jasar osy jartylaı qorǵaýshysyn týrnırde ashylatyn jańalyqtardyń biri bolady dep kútip otyr. Komandanyń ortalyq qorǵaý shebinde turatyn onyń tolyq aty-jóni Elsın An­tonıo Teheda Valverde kórinedi. Fýtbolshy óz esimin Reseıdiń birinshi prezıdenti Borıs Elsınniń qurmetine alǵan eken. 1992 jyly 17 naýryzda týǵan balaqaıǵa anasy bul atty Reseı basshysyna razy bolǵandyqtan beripti. Al fýt­bolǵa degen qumarlyq oǵan ákesi Iosı­mar Teheda arqyly daryǵan. Jasy 14-ke kelgende, Elsın ózderi turatyn Lımon degen qalashyqtan Kosta-Rıka astanasyndaǵy ýnıversıtetke oqýǵa túsýge attanypty. Sonda barǵasyn, fýtbolshy retinde jattyǵýyn da kúsheıte túsken. Keıin kásipqoı fýtbolǵa bir­jola bet burǵan Elsın Kosta-Rıka­daǵy eń myqty komandalardyń biri – «Deportıvo Saprıssaǵa» qabyl­danady. Sodan beri osy ujymnyń sapynda oınaıdy. Al eldiń bas ko­man­dasynyń jattyqtyrýshylary oǵan 2009 jyly Nıgerııada ótken jasóspirimder arasyndaǵy álem chempıonatynda óz eliniń quramasy quramynda oınap júrgen kezinde nazar aýdarady. Arada eki jyl ótkennen keıin Elsın eldiń eresekter arasyndaǵy quramasy sapynda alǵashqy oıynyn ótkizdi. Osydan bastap ol sheberligin udaıy ósirýmen keledi. 2014 jyly Elsın Teheda óz eli quramasynyń álem chempıonatynyń fınaldyq týr­nırine joldama alýyn qam­ta­masyz ete bildi. Ol Kosta-Rıka­nyń Meksıkamen ótken sheshýshi matchynda jeńiske jetýine úlken úles qosty. Bir qyzyǵy, bul chempıonatqa qatysýshy komandalar qata­rynda mundaı «saıası» esimdi fýtbolshylar jetkilikti kórinedi. Aıtalyq, Kolýmbııa jasaǵy sapynda da bir Elsın júr. Onyń aty-jóni – Elsın Karo. Osy elde tegi «Stalın» atalatyn fýtbolshy da bar. Ol Motta Stalın bolyp tabylady. Budan ári Ekvadorda eki birdeı Lenın – Porosha jáne de Hesýs tirkelgen. Sol sııaqty eki quramany AQSh-tyń sońǵy eki prezıdentimen famılııalas oıynshylar tolyqtyrǵan.  Olardyń biri – kolýmbııalyq Floran Obama bolsa, ekinshisi AQSh komandasy quramyndaǵy Evan Býsh eken. Jahandyq jarysta óz elderi quramalary sapynan oryn tabylma­ǵasyn, ózge memleketterdiń namys­taryn qorǵaýǵa bekem bel baılap kelgen fýtbolshylar da biraz bolyp shyqty. Olardyń sany artyq-kemi joq 10 sportshy bolyp otyr. Máselen, Rıo-de-Janeıronyń týmasy, 16 jasynan Brazılııa fýtbol klýbtarynda oınaı bastaǵan, Dýdý atty laqap esimi bar Edýardo da Sılva qazir Horvatııa quramasynyń beldi múshesi bolyp otyr. Bul eldiń taǵy bir týmasy – Jorje Sammır de búginde osy sharshy tańbaly jeıdesi bar eldiń quramasy sapynda oınaıdy. Munyń esesine, horvat jeriniń Darıo Vıdoshıch esimdi týmasy alystaǵy Avstralııa úshin jan berisetin shaıqastarǵa qatysady. Brazılııanyń taǵy bir óreni – Dıego Kosta osy joly Ispanııa komandasy sapynda alańǵa shyqsa, onyń kelesi otandasy Tıago Motta Italııanyń jalaýyn jelbiretedi. Sol sııaqty kanadalyq Djonatan de Gýzman Gollandııanyń barabanyn qaqsa, túrik jeriniń tól perzenti Adnan Iаnýzaı Belgııanyń quramynda júr. Budan qaldy, Gana jerinde kindik qany tamǵan Marıo Balotellı birazdan beri Italııanyń beldi oıynshysy atanyp keledi. Damır QOJAMQUL.