Oqý-aǵartý mınıstrligi pikirsaıysty keńinen nasıhattaý maqsatynda pikirsaıys týrnırlerin ótkizýdiń tujyrymdamasy men erejesin ázirledi. Oqýshylar men stýdentterdi oqytý úshin 10-ǵa jýyq jobalyq keńse men shtab ashyldy, onda álemdik arenada tanymal pikirsaıysshylardyń qatysýymen túrli trenıngter men vebınarlar uıymdastyrylady. Mysaly, oqý-jattyǵýdy álem chempıonatynyń fınalısi jáne pikirsaıys boıynsha Azııa chempıony Djoshýa Park ótkizdi.
2021 jyldan bastap tájirıbe almasý úshin Telegram arnasy jáne WhatsApp-ta «Pikirsaıys kózǵalysy/Debatnoe dvıjenıe» chaty jumys isteıdi. Ol chattarda búginde 5 myńǵa jýyq adam bar.
«Búgingi tańda oqýshylar men stýdentter arasynda keń taraǵan jáne tanymal trendterdiń biri – debat. Bul qozǵalystyń damýy týraly el Prezıdenti Qasym-Jomart Toqaev ta aıtqan bolatyn. Debattar tanymdyq daǵdylardy damytady. Synı turǵydan oılaý qabileti – HHI ǵasyr adamynyń negizgi daǵdylarynyń biri. О́ıtkeni kórip otyrǵanymyzdaı, jańa býyn jastary belsendiligimen jáne ártúrli qyzyǵýshylyqpen erekshelenedi. Osy daǵdylardy damytý úshin debat klýbtary jumys isteıdi. Olardyń qatary jyl saıyn artyp kele jatqany qýantady. Búgingi tańda pikirsaıysshylardy qoldaý maqsatynda túrli vebınarlar ótkizilip, qarjylaı qoldaý kórsetiledi, al iri týrnırlerdiń jeńimpazdaryna jergilikti ýnıversıtetterge granttar bólinedi. Bul qoldaý sharasynyń barlyǵy debat qozǵalysyn odan ári tanymal ete túsedi, al onyń nátıjesi balalarymyzdyń bilim sapasyna oń áser etedi», dedi Oqý-aǵartý mınıstrligi Respýblıkalyq qosymsha bilim berý oqý-ádistemelik ortalyǵynyń dırektory Raısa Sher.
Byltyrǵy oqý jylynyń sońynda qazaqstandyq 6 joǵary oqý orny debat týrnırleriniń 12 jeńimpazyna bilim grantyn bergen bolatyn. Oqýshylar Qorqyt ata atyndaǵy ýnıversıtette, S.Amanjolov atyndaǵy ShQÝ, H.Dosmuhamedov atyndaǵy Atyraý ýnıversıtetinde, «Turan» ýnıversıtetinde, Satbayev University, Narhoz ýnıversıtetinde oqýǵa grant aldy. Sondaı-aq týrnırlerge qatysqany úshin balalarǵa gramotalar, kýbokter jáne 200 myńnan 500 myń teńgege deıin aqshalaı syılyqtar tabystaldy.
«Egemen-aqparat»
