Birinshiden, ashyqtyq máselesine mán berilip, kandıdattardyń saılaýaldy baǵdarlamasy jurtshylyqqa keńinen tanystyrylýy kerek edi. Turǵyndarǵa óz óńirinen saılanatyn depýtattyń aımaq ómiri úshin qandaı jumys isteýge nıetti ekenin bilý óte mańyzdy. Áıteýir turǵyndar daýys bermeıdi eken dep halyqtan alystaý durys emes. Ádiletti Qazaqstan quramyz dep jatqandyqtan, qoǵammen baıandy baılanys ornatýǵa tyrysý qajet. Ekinshiden, saılanǵan depýtattardyń basym bóligi buǵan deıin memlekettik basqarý júıesinde, ıaǵnı ákimdiktiń aınalasynda qyzmet etkender. Jastar da joqtyń qasy. Turǵyndardy alańdatqan jaıttyń biri – osy.
Máslıhattardyń jaýapkershiligi artýǵa tıis. Halyq arasynda qazir túrli pikir órip júr. Kópshiligi «máslıhat depýtattary ákimniń nusqaýymen daýys berdi» degendi alǵa tartady. Bul – ashyqtyq máselesine atústi qaraýdyń saldary. Buǵan deıin aldaǵy ýaqytta Senat depýtattaryn da halyq saılaý kerek degen usynys aıtqan edim. Turǵyndar ózi daýys bergendikten, kúmándi oılar týyndamaıtyn edi. Taǵy bir másele – saılanǵan depýtattar minberde halyqtyń máselesin belsendi kótermeı, qyzmetin únsizdikpen ótkizse, ondaılardyń depýtattyǵyn toqtatý kerek. Alty jyl bostan-bosqa oryndyqty tozdyrǵany qajet emes. Tikeleı saılaý bolmaǵandyqtan baqylaý da az. Depýtattyń ne tyndyryp júrgeni belgisiz. Bul máseleni buǵan deıin de baıqaǵanbyz. Tipti halyq túrin taný bylaı tursyn, aty-jónin bilmeıtin depýtattardy da kórdik. Aldaǵy ýaqytta mundaı «dástúr» úzilýge tıis. Senat depýtattary halyqtyń arasynda júrýi, turǵyndarmen etene aralasýy qajet. Buqaralyq aqparat quraldarymen de qoıan-qoltyq jumys isteýi mańyzdy.
Marat BÁShIMOV,
Eýropalyq quqyq jáne adam quqyǵy ınstıtýtynyń dırektory
