Bir sýreti bir maqaladaı

Astarly oı men qaǵytpa qaljyńdy tamashalap, ka­rı­­katýra qyzyǵymen de­mal­­­­­­ǵysy keletin kórermen úshin Memlekettik Or­ta­lyq mý­zeı­de elimizge ta­ny­­mal karı­ka­týrashy-sý­ret­shi Erkin Nuraz­­­­­hannyń «Karıkatýra tarlany» atty kórmesi ashyldy. Mádenıet qaıratkeri, Qazaqstan Sýretshiler, Jýrnalıster, Ja­zýshylar odaǵynyń múshesi Erkin Nurazhannyń 70 jasqa tolǵan toıyna oraı saltanatty túrde ashylǵan kórmede avtordyń 160-tan asa jumysy nazarǵa usynyldy.

Erkin Nurazhan – qazaq beıneleý ónerinde karıkatýra, sharj (dostyq, ázil portret) janrynyń qalyptasyp, damýyna ózindik qoltańbasyn qosqan maıtalman maman. Ka­rıkatýrada 40 jyl boıy túr­li týyndylarymen ta­nyl­ǵan sýretshiniń qozǵaǵan ta­qy­ryptary ár alýan, beınelegen keıipkerleri san qyrly. «Kúlkiniń ar jaǵynda mazaq emes – mazasyzdaný, jazǵyrý emes – jany ashý jatqanyn jurt túsinse deımin. Qulaǵandy tur­ǵyzý, qıraǵandy bútindeý, jy­la­ǵandy jubatý, kerenaýdy oıatý, muńaıǵandy ezý tartqyzý – satıralyq sýretterdiń abzal boryshy bolyp qala bermek»,  deıdi sýretshi. Al tehnıkasy óte qarapaıym: qaǵaz, qalamush, týsh, akvarel boıaý­y, geldi qalam, túrli-tústi qaryn­dash­tar.

Avtordyń aıtýynsha, «Ka­­rıkatýra tarlany» kór­mesi 1982 jyly bastaý alǵan shyǵarmashylyq jolynyń tolyq kórinisi ispettes. 2020 jyly qorǵa ótkizilgen 534 ju­mystyń tańdaýlylary irik­telip, mereıtoıǵa oraı galereıa retinde kórer­men nazaryna usynylyp otyr­ǵanyna Erkin Nurazhan asa qýanyshty. Al aqyn Baqyt Bedelhan «bir týyn­dysy – bir syn maqaladaı» dep beınesóz sheberiniń tap­qyrlyǵy men ótkirligin joǵary baǵalady.

Kórme 2023 jyldyń 31 qań­taryna deıin jumys isteıdi.

Baıan MURATBEKQYZY

ALMATY