Dástúrli respýblıkalyq qysqy rallı-sprıntke Astana, Almaty, Qaraǵandy, Kókshetaý, О́skemen, Ekibastuz jáne Pavlodar qalalarynan jalpy sany 40 komanda qatysty. Jarys kólikteriniń tizginine jaıǵasqandar jyldamdyqty údetýge múmkindik beretin muz trassasynda 5,5 jáne 5,4 shaqyrym jerdi barynsha jedel ótýge tyryssa, úshinshi bóliktegi 11 shaqyrymda ýaqyt utýǵa umtyldy. Baby kelisken jarys mashınalary muz ústindegi burylystarda shalt burylyp, dóńgelegin túzemesten bar jyldamdyǵymen zý ete túsedi. Mundaı ádiske «Jıgýlı» men BMW, Subaru markaly kólikteri ádette qolaıly eken. Komandalardyń kóbi eski kólikterdi ábden jerine jetkizip álemishtep, uzatylatyn qyzdaı jasandyryp qoıǵan.
Bas tóreshi Vladımır Borodın aıtyp ótkendeı, júrgizýshi start beriletin jerge deıin 2 mınýt ishinde jetip úlgerýi kerek. Falstart jasasa nemese ýaqyttan keshikse, negizgi ýaqytynan sekýndtar qıylyp qalady. Aınalymdardy barynsha jyldam ári minsiz júrip ótkender jeńimpazdar tuǵyrynan tabyldy.
«Muz ústindegi aıqas kádimgi sprınttegideı órbıdi. Áýeli kólik tizginindegi pılot marshrýttyń barlyq kúrdeli sátin belgileı otyryp stenografııasyn túzedi. Jarys barysynda janyndaǵy serigi ony oqyp, eskertip otyrady. Ár sekýnd sanaýly bolǵandyqtan, pılotqa ár nusqaýlyq sekýndtyń sanaýly bóliginde durys berilýi mańyzdy» deıdi rallı-sprıntten Qazaqstan chempıony Andreı Amelın. Pılot kilt burylystarda joldyń jabyq bólikterin kórmeı qalýy múmkin. Shtýrman aldyn ala eskertip, saqtandyrady.
Bul – respýblıkalyq rallı-sprınttiń III kezeńi bolǵandyqtan, sheshýshi aıqas. Andreıdiń serigi ári zaıyby Alıe Amelına – «búginde kásipqoı sprıntshiniń biri. «Pavlodardaǵy trassa qyzyqty ári kúrdeli burylystary kóp, sondyqtan ekıpajdan únemi jınaqy bolýdy talap etedi», deıdi olar.
Respýblıkalyq jarystyń sońǵy sheshýshi kezeńi aldaǵy ýaqytta Qaraǵandy qalasynda ótedi dep josparlanyp otyr.
PAVLODAR
