«Jańbyrly kóktem»... Bizder, stýdent balalar, qarlyǵash tilindeı juqaltań kitapty súıýshi edik. Onda ne bar demeńiz, ne joq deńiz. Onda adamnyń áli semip úlgermegen tuma qııaly, qaıyrymy, meıirbandyǵy, kórinbesti kózden oqyr qyraǵy uıańdyǵy bar-tyn. Janymyzǵa páktik otyn quıyp, aınalany kórkem de muńly nazǵa oraıtyn.
«Tompaq» áńgimesindegi ortadan oǵash qalyp, derbes qııalymen ǵumyr kesher tompaq qyz beınesinen jazýshynyń ózi kórinedi. Qudaıdyń jomarttyqpen bergen talanty bar jan kóp ishinen qalaısha manardaı jarqyramasyn, úıir arasynan qasqa taıdaı qalaı ǵana daralanbasyn.
« – Kóktem uıqymdy urlap, aı-juldyz syr aıtyp, sybyrlaıdy, – dep bárimizge úrke qarady. Janary «Sender báribir meni túsinbeısińder ǵoı?» dep turady. – Kóktemdi kóp kúttim. Júregim tońyp júr.
– Júrek tońa ma? Tompaqtyń ǵana júregi tońatyn shyǵar? – dep qyz-jigitter qyran-topan kúlkige batty.
– Bilem ǵoı, meniń jaýraǵan júregimdi eshkim jylyta almaıdy...»
Aıagúldiń jan kúıi ulttyń aıaýly, jumsaq, qońyr ádebine toly. Sondyqtan ba eken ár keıipkerinde móldirliktiń, janashyrlyqtyń ushqyny aq almastaı jarqyraıdy. Shynaıylyqqa malynǵan keıipkerlerdiń burtıǵan túri, nazdy ókpesi, sábı kúlkisi qııal kózine aıqyn kórinip, qulaqqa dybystary estiledi. Uzaq ýaqyt oıdan óshpeı turady.
«Qabir gúli» áńgimesinen jazýshynyń bala kúninen-aq oǵash oılap, qubylystardy shuńǵyma sezine bilgenin baıqaısyz. Sonshalyq aqedil, adal janyna bas ıip, oqyǵan saıyn jańbyrmen jýǵan jemisteı tazara túsesiz.
«Áli esimde, sol kúni júgeri alqabynyń ishinde otyryp uzaq jylaǵanym. «Bizdiń ómirimiz júgerige uqsaıdy eken ǵoı» deımin de jylaı beremin. Bir ýaqytta óz oıymnan ózim qorqyp, betaldy júgire berdim. Súrinip ketip, etpetimnen quladym. Jerge bir kún jelimdep tastaǵandaı jata berdim...» Nemese «Zırattyń qaqpasyna jazylǵan «Biz de sizderdeı bolǵanbyz, sizder de bizdeı bolasyzdar» degen sózdi qansha oqysaq ta, maǵynasyn túsinbeppiz. Qara balaǵa jek kóre qaradym. Bizdiń bir sát demimizdi tartyp, únsiz qalǵanymyzǵa ózin kináli sezindi me, álde bireý urady dep qaýiptendi me, ol búgejektep jerge otyryp jylap jiberdi».
Adam bolmysyn munsha názik túısiný, seziný úshin qanshalyq zerde, jad, sezimtaldyq kerek deseńizshi. Biz óz mańymyzdaǵy jandardy sezine bilemiz be? Ár jaratylystan jaqsylyq izdep, jamany úshin ókinip, kúıine alamyz ba? Qý tirliktiń qumyna kómilip, ar-uıatyn umytyp azap shekken pendelerdi júregimizben aıaı alamyz ba? О́zin baqylaýdan qalǵan, kemshiligi shashynan kóp bolsa da keýde soqqan baýyrymyz úshin «ol bilmeıdi ǵoı...» dep músirkeı bilemiz be?!
Aqparat úıindileri tolassyz quıylǵan kezeńde aqylymyz aljasyp, kıeli shaqtaǵy sáýlemiz sóngeni sonshalyq, kisi úshin qýana bilýden qalyp baramyz-aý. Tanyp-bilmese de «aınalaıyn» dep sóıleıtin úlkender, «qulynym» dep shaqyrar kókeler sıregeli qashan.
Mine, tirshiliktiń tas tutqasynan ońasha qalyp otyrmyn. Aıagúldi oqımyn. Jany buljymaǵan janashyr qazaq aýylyn saǵynamyn. Týǵan ólkemniń túbirli shyńdaryna qııalymmen kóz júgirtemin. Keýdesine qaıyrym kólin quıyp ósken Aıagúldi oılaımyn. «Jańbyrly kóktemnen» shyǵyp, asqaq talantyn álpeshtep Máskeýde oqyǵan oıly «sábıdi» eske alamyn. Sen nege ózińdi tym alystan izdediń eken? О́ziń baqyt mekeninde júrseń de, sol mekendi basqa qıyrdan sharq ura izdegeniń qalaı? Biraq izdemeseń «júrekke oralar» ma ediń? Joq, orala almas ediń. О́ıtkeni parasat zańynda júrgen ǵana jetedi emes pe, izdegen ǵana tabady emes pe.
Armanshyl júregińe oralǵan shaqta sen asaý talantyńnyń quıynyna ilesip aspanǵa ushtyń. Sen júrgen kósheler, baǵdarshamdar, jolbelgiler, qaraǵaılar, qaıyrshylar, bári de saǵan kýálik etedi. Sen asqaq talantsyń, aryndy darynsyń. Múmkin ajal da aldyńa qoly sııaǵa malynyp, keýdesi qaıyrymdylyqqa tolyp, denesin árip qaptap, asqaq basyp kelgen bolar...
