Sapar barysynda respýblıkalyqtar oblystaǵy birqatar eldi meken men Taldyqorǵan qalasynda boldy. Forým jumysyna partııa tóraǵasy, Parlament Májilisiniń depýtattyǵyna kandıdat Aıdarbek Qojanazarov jáne teń tóraǵasy Syrymbek Taý, Parlament Májilisi depýtattyǵyna kandıdattar Oljas Quspekov, Qyrmyzy Jandosova, Baqytbek Hamıt, Ekaterına Smolıakova, Dınara Naýmova jáne Oljas Bolatbekuly qatysty. Jıynda partııa músheleri, jergilikti kásiporyndardyń jumysshylary, azamattar men qoǵam belsendileri elimizdiń damýy men órkendeýine qatysty oı-pikirlerin ortaǵa saldy, usynystaryn da jetkizdi.
– Biz memlekettik qyzmette jumys istegen joqpyz, tenderlerge qatyspadyq, biraq myńdaǵan adamdy jumyspen qamtamasyz etip, halqymyzdyń ıgiligi úshin eńbek ettik. Endi qarapaıym azamattardyń laıyqty ómir súrý deńgeıimen qamtamasyz etý úshin halyqtyń múddesin qorǵaýǵa, ádildik úshin kúresýge daıynbyz. Bizdiń basty baılyǵymyz – Qazaqstannyń saýatty, táýelsiz jáne qaısar halqy, – dedi partııa jetekshisi Aıdarbek Qojanazarov.
«Jaqtastar» forýmynda sóılegen sózinde «Respublica» partııasynyń teń tóraǵasy, Májilis depýtattyǵyna kandıdat Dınara Shúkijanova partııa atynan jastarǵa úndeý tastady.
– Biz eldegi jastardyń damý bolashaǵy jarqyn bolǵanyn qalaımyz. Olar elimizdi kórkeıtý úshin elge qyzmet etýge tıis. Jastar – elimizdiń bolashaǵy. Qazir aralaryńda qyzdar da kóp. О́zim iri mashına jasaý kásipornyn basqaramyn jáne men bılikte áıelderdiń barynsha kóp bolǵanyn qoldaımyn, – dedi D.Shúkijanova.
О́z kezeginde Májilis depýtattyǵyna kandıdat Qyrmyzy Jandosova buqaralyq sportty damytý qajettigin aıtty. Sondyqtan qazirgi ýaqytta onyń júıeliligin qamtamasyz etý qajet, qarjylandyrý qalalar men aýyldarda birdeı bolýy kerek. «Sporttyq nysandar kóp ári barlyǵyna qoljetimdi bolýy mańyzdy. Sonda ǵana buqaralyq sporttyń damýynan nátıje kútýge bolady», dep atap ótti Q.Jandosova.
