Avtor bul jolǵy kitabynda synshylyq qyrynan tanylyp otyr. Sonyń aıǵaǵyndaı ol arǵy Abaı, Ahmet, Ilııas, Qasymnan bastap, orta tustaǵy Tóleýjan, Muqaǵalı, Tólegen, keıingi býyn Nesipbek, Ulyqbek, Temirhan, Rafael jáne óziniń zamandastary Beıbit Qusanbek, Esjan Aınabekov, Nurlan Máýkenuly, Baýyrjan Úsenov syndy taǵy basqa qalamgerlerdiń shyǵarmalary týraly keńinen sóz qozǵap, jan-jaqty taldaǵan. Qurǵaq taldaý, saraptamamen shektelmeı, belgili qalamgerlerdiń belgisiz qyrlary, ıaǵnı adamı bolmys-bitimi týraly tolǵanystaryn tolqı otyryp oqısyz, tańdaı qaǵyp, tańyrqaısyz. Bul oraıda onyń óziniń aqyndyǵy men ǵalymdyǵy kádege jarap, synshylyq qyryn árleı túsken be deımiz.
Keıingi jyldary ádebıetimizde syn janry birjola joǵalmasa da, deńgeıi tómendep, azaıyp bara jatqany ras. Onyń syrtynda synı kitaptar joqqa tán. Al burynǵy oqyrman dýaly aýyz synshynyń nazaryna ilikken kitaptardy izdep júrip oqıtyn-dy. Búgin bolsa, kimniń ne jazyp jatqany belgisiz. Az ǵana danamen shyqqan kitap oqyrman qolyna tımeı qalady. Sol sebepten de qalamgerlerdiń shyǵarmashylyq laboratorııasy týraly qatardaǵy oqyrman túgili ádebıet maıdanynda birge júrgen áriptesteri de bile bermeıdi. Baýyrjannyń myna qabyrǵaly eńbegi arqyly sol olqylyqtyń orny birshama tolyqqan sııaqty.
Onyń ústine arýaq rıza bolmaı, tiri baıymaıdy degendeı, qazaq ádebıetiniń burynǵy, sońǵy ardager abyzdaryn umytýǵa bolmaıdy. Bul turǵydan alǵanda da avtor dittegen maqsatynan shyǵa bilgen. Sonyń bári joǵaryda aıtqandaı, jalań maqtaý, madaqtaý emes, shyndyq turǵysynda tartymdy sóz bolyp qozǵalǵany qýantady.
Iá, Qadyr aqyn aıtpaqshy, júrekten shyqpasa, júrekke jetpeıdi. Baýyrjannyń «Júrekten qozǵaıyn» dep atalatyn jańa kitaby soǵan sendiredi.
