Bıyl aqynnyń týǵanyna 130 jyl tolyp otyr. Osyǵan oraı Astana qalasy ákimdiginiń «Rýhanııat» mekemesi men Ortalyqtandyrylǵan kitaphanalar júıesiniń uıymdastyrýymen aqpan aıynyń №5 balalar kitaphanasynda «Alashtyń jaryq juldyzy» atty ádebı-tanymdyq kesh ótti.
Keshke Qazaqstannyń eńbek sińirgen mádenıet qaıratkeri, aqyn Baqytjan Tobaıaq, «Jańarý» sybaılas jemqorlyqqa qarsy respýblıkalyq birlestiginiń apparat basshysy Qabdýlla Álıev jáne kitaphana oqyrmandary, ustazdar qatysty.
Is-sharany Astana qalasy ákimdiginiń «Rýhanııat» mekemesiniń basshysy Sáýle Dosjanova men Ortalyqtandyrylǵan kitaphanalar júıesi dırektorynyń orynbasary Manat Kerimbekova ashyp, jastardy qazaqtyń rýhyn oıatqan, sulý sezimdi sózge arqaý etken aqyn Maǵjan Jumabaevtyń jyrlaryn oqýǵa, rýhanı baı bolýǵa úndedi.
Munan soń «Júrek sóziniń jyrshysy» baǵdarlamasy boıynsha kitaphana oqyrmandaryna aqyn óleńderi men poemalaryn oqýǵa kezek berildi. Astana qalasyndaǵy №40, 52, 64, 78 mektep oqýshylary jáne S.Seıfýllın atyndaǵy Qazaq agrotehnıkalyq ýnıversıteti stýdentteri aqyn óleńderin naqyshyna keltire oqyp, kópshiliktiń yqylasyna bólendi.
Sóz alǵan kesh qonaǵy Baqytjan Tobaıaq Maǵjan Jumabaev jóninde júrekjardy lebizin aıtty.
– Maǵjan Jumabaevtyń ómiri men óleńi jarty ǵasyrdan artyq ýaqyt boıy aıtylmady, nasıhattalmady. Aqynnyń kitaptary tyıym salý kesirinen sarǵaıyp, tozyp, joǵalyp jatty. Aqty qara, qarany aq dep túsindirgen zorlyq-zombylyq dáýiriniń qurbany bolǵan aqyn taǵdyry aıanyshty edi. Biraq aıdy alaqanmen jabý múmkin emes bolatyn, – dedi aqyn.
Sonymen birge Maǵjan Jumabaıulyna jas aqyndar arnaý oqyp, pikirlerin bildirdi. Kesh barysynda «Men jastarǵa senemin» atty taqyrypta daıyndalǵan beınebaıan kórsetilip, kitap kórmesi tanystyryldy.
Is-shara sońynda keshke belsene qatysqan oqyrmandardy «Rýhanııat» mekemesiniń basshysy Sáýle Bolatqyzy marapattap, onyń ishinde Maǵjan Jumabaevtyń «Jan sózi» óleńin keremet oqyǵany úshin kitaphana oqyrmany Jumabek Tilekke erekshe alǵysyn bildirdi.
Aqynnyń Alash qaıratkerlerimen tize qosyp etken eńbegi bir tóbe. Psıhologııa jóninde eńbek jazýy, álem klassıkterin aýdarý isimen shuǵyldanýy, aýyz ádebıetiniń tulǵalary jónindegi, ult taǵdyry jaıyndaǵy kesteli maqalalary sózimizge aıǵaq.
«El úshin tókken erler
qanyn jutqan,
Erlerdi umytsa da el,
jer umytpas.
Arqanyń seli, jeli, shóli, beli,
Erlerdi umytpasa,
el de umytpas!»
Aqynnyń ózi aıtqandaı, ulttyń tolaǵaı tarıhyn jyrlaý arqyly sol ulttyń ózine aınalǵan alyp aqyndy el umytpaıdy. Ǵasyr saıyn týylǵan árbir qazaq balasy aqyn jyrymen qaırattanar, qara kózge jas alar, qasıetti jeriniń ulylyǵyna bas ıer. Osylaısha aqyn rýhy bıikteı túsip, bolashaq únimen bite qaınasary sózsiz.
