– «Baıtaq» partııasynyń baǵdarlamasynda ekologııany qalpyna keltirý, aýanyń sapasyna mán berý, qorshaǵan orta men azamattardyń densaýlyǵyn qorǵaý, salamatty ómir saltyn nasıhattaý máseleleri qamtylǵan. О́ńirdegi ekologııalyq jaǵdaı aldymen adam densaýlyǵyna áser etedi, bul turǵyda týyndaıtyn ózekti máselelerdi sheshýde sizderdiń oı-pikir, usynystaryńyz mańyzdy, – dedi partııanyń Ulytaý oblystyq fılıalynyń tóraǵasy Bazarkúl Úmbetova.
Esterińizge sala keteıik, ótken jyldyń 9 aıynyń qorytyndysy boıynsha aldyn ala málimetterge sáıkes Ulytaý oblysynda 82 myń tonna lastaýshy zattar shyǵarylǵany anyqtalǵan.
Kezdesýde partııanyń Ulytaý oblysy boıynsha Májilis depýtattyǵyna úmitker, Prezıdent janyndaǵy Ulttyq quryltaı múshesi, Parlament Májilisi janyndaǵy Qoǵamdyq palata múshesi Qazbek Maıgeldınov óńirde saılaýshylarmen birneshe kezdesý ótkizgenin, medısına salasyndaǵy qordalanǵan máselelerdi jaqsy biletinin aıtty. Ata-anasynyń da dáriger ekenine toqtala kele, óziniń saılaýaldy baǵdarlamasyndaǵy basym baǵyttarmen tanystyrdy.
Shtab jetekshisi Marǵulan Ermaǵanbetuly saılaýshylar qoıǵan saýaldarǵa naqty jaýap berip, aldaǵy ýaqytta Qarajal qalasy men Jańaarqa aýdany turǵyndarymen de kezdesýler josparlanǵanyn jetkizdi.
Kezdesýler Astana qalasynda da jalǵasyp jatyr. Belgili bolǵandaı, jylytý maýsymynda astanalyq bir otbasy 10 tonna kómir jaǵady eken. Iаǵnı elordanyń ekologııasyna qaýip tónip tur. 4 myńnan astam úıler gazdandyrylmaǵanyn eskersek, tek jeke úılerdiń ózi 40 myńnan asa qara otyndy paıdalanyp otyr.
– Astana qalasynda gazdandyrý máselesi búgingi kúni sheshilmeı otyr. Buǵan deıin bul máseleni sheshý joldary durys qarastyrylmady. «Baıtaq» partııasy Parlamentke kiretin bolsa, birinshi kezekte Astana qalasyn gazdandyrýmen aınalysady, – dedi partııa tóraǵasy Azamathan Ámirtaı.
