Búginde mádenıet máselelerine jetkilikti kóńil bólinbeıdi. Kitaphanashylar, muraǵatshylar, ártister, murajaı qyzmetkerleri bıýdjet salasy ókilderiniń arasynda eń tómengi jalaqy alyp otyr. Bul rette, partııanyń saılaýaldy baǵdarlamasynda mádenıetke erekshe kóńil bólingen. JSDP balalar men jastardyń buqaralyq sporty men mádenı bos ýaqytyn tegin damytý arqyly tolyqqandy mádenı, shyǵarmashylyq jáne sporttyq tulǵany damytýdy qamtamasyz etý qajet dep sanaıdy.
Budan bólek, kandıdat partııanyń saılaýaldy baǵdarlamasynyń ózge de basym baǵyttaryn baıandady.
– Qazaqstanda bılik halyqqa tıesili bolýy qajet. Elimiz jalpyhalyqtyq gúldeý úshin qajetti barlyq alǵysharttarǵa ıe. Biraq, ókinishke qaraı, olıgarhat pen jemqorlyq tamyrynyń tereńge ketkeni sonshalyq, memleketimizdiń damýyna qatysty ekonomıkalyq jáne áleýmettik kún tártibinde turǵan kóptegen júıeli másele ýshyǵyp otyr. Elimizdiń barlyq derlik baǵyttaǵy damýy boıynsha biz sheneýnikterdiń jarqyn bolashaqqa qatysty bitpeıtin ýádelerine toly ádemi saıası baıandamalaryn kórip otyrmyz. Jyldar ótedi, ýáde etilgen ýaqyt taıaǵanda bastapqy baǵyttan bas tartýǵa túrli syltaýlar tabylady. Qarapaıym azamattar bolsa, jyl saıyn kedeılene túsýde, elimizdiń aǵymdaǵy damý deńgeıi jáne 2022 jyldyń qorytyndysy boıynsha 25 paıyzdyq azyq-túlik ınflıasııasy osynyń tikeleı aıǵaǵy. Maqsatymyz – halyqtyń ál-aýqaty deńgeıin arttyrý. Bul – partııanyń Parlament Májilisiniń saılaýyna túsýdegi basty sebepteriniń biri. Qazirgi jaǵdaıdan memleketimiz tek sosıal-demokratııa ıdeıasy arqyly shyǵa alatynyna senemiz. Áleýmettik tártip túbegeıli qaıta qarastyrylýy qajet. Búginde biz qoǵam, bıznes jáne memleketti tepe-teńdik jaǵdaıyna qaıtarýymyz kerek. Biz ár sheshim azamattarymyzdyń ıgiligine jumys istep, paıdasyna asyrylatyn áleýmettik-jaýapty tártipti ornata alatynymyzǵa senemiz, – dedi ol.
