Partııa ókili seriktestik ujymyna Halyq partııasynyń saılaýaldy baǵdarlamasyn tanystyrdy. A.Asylbekov partııa elde qalyptasqan júıeniń mánin túbegeıli ózgertýdi talap etetinin, bılik pen baılyq Qazaqstan halqyna tıesili bolatyn ádiletti qoǵam qurýdy qoldaıtynyn jáne bılik ókilettikterin bólýde tejeý men tepe-teńdiktiń saıası júıesin saqtaýdy jaqtaıtynyn jarııalady.
«Biz azamattardyń quqyǵy men bostandyǵy barlyǵynan joǵary turatyn naǵyz halyqtyq memleket qurýdy qoldaımyz. Jer men jer qoınaýy halyqqa tıesili bolý kerek», dedi ol.
Kandıdat Jańa Qazaqstanǵa jaldamaly qyzmetkerlerdiń áleýmettik jáne eńbek quqyǵyn tolyq qorǵaıtyn jańa Eńbek kodeksi qajet ekenin málimdedi.
– Ekonomıkada orta tap qurýǵa jáne kedeılikti joıýǵa múmkindik beretin jańa tásilderdi engizý mańyzdy. Halyq partııasy el aýmaǵynda óz azamattarymyz óndirgen taýarlardan, kórsetken qyzmetterden qosymsha qun salyǵyn alyp tastaýdy jáne aınalymǵa 5% mólsherinde biryńǵaı salyq engizýdi qoldaıdy, – dedi partııa ókili.
Kezdesýde bilim, medısına, qurylys salalaryndaǵy ózekti máseleler de talqy tarazysyna salyndy. Kandıdat memlekettik mekemelerde (arnaýly orta jáne joǵary) bilim berý men densaýlyq saqtaý mamandaryn tegin oqytý, áıelderdiń zeınetke shyǵý jasyn 58-ge bekitý, al 4 jáne odan kóp bala tárbıelep otyrǵan analardy 55 jasqa deıin zeınetke shyǵarý usynysyn qoldaıtynyn, bul baǵytta júıeli jumystardy jalǵastyra beretinin aıtty. Kandıdattar saılaýaldy baǵdarlamada bankterge azamattardyń artyq tólemderin qaıtaryp berý týraly talap qoıǵandaryn málimdedi.
Kandıdat halyqtyń qaryzǵa batqanyn, onlaın nesıeniń saldarynan elimizde alaıaqtardyń qaptap ketkenin, jastardyń qumar oıynynyń qurbanyna aınalyp bara jatqanyn da alǵa tartty. «Qazir onlaın nesıeniń jarnamasy qaptap ketti. Halyq májbúrlikten nesıe alyp, qaryzǵa batyp otyr. Alaıaq kompanııalar eldi qanap jatyr. Osylardy memleket aýyzdyqtaýy kerek», dedi kandıdat.
