2008 jyly qurylǵan «Aıbek» aýyl sharýashylyǵy kooperatıvi keshendi jumys isteıdi. Kásiporyn quramynda mal ósirý, bordaqylaý, soıý, et kombınaty, et buqtyrý, qalbyrlaý zaýyty bar. Et baǵytyndaǵy maldy 4 sharýashylyq ósirse, bordaqylaý alańynda jylyna 600 basqa deıin iri qara bordaqylanyp, soıylady. Et buqtyrý zaýytynda ony qalbyrlaýmen qatar, tushpara tárizdi jartylaı fabrıkattyń 6-7 túri shyǵarylady. Atalǵan zaýyttyń óz múmkindigi táýligine 48 myń banki shyǵarýyna shıkizattyń azdyǵy qolbaılaý bolyp tur. Kásiporyn búginde 80-ge jýyq adamdy jumyspen qamtyp otyr.
«Aýyl sharýashylyǵynyń úlken kólemdegi aýmaǵy elimizdiń batys óńirinde. Biraq olar shashyrańqy ornalasqandyqtan ónimderin óńdeý oryndaryna jetkizý óte qıyn. Elimiz aýyl sharýashylyǵy ónimi shıkizatyn óńdeýdi áli tolyq ıegere almaı jatqanynyń bir sebebi osy. Ár aýdanda kem degende bir óńdeý mekemesi bolý kerek. «Aýyl» partııasynyń maqsaty sharýashylyq ónimderin óńdep, saýda-sattyq oryndaryna deldalsyz jetkizý. Ol degenimiz – qosymsha paıda. О́nim shıkizat kúıinde satylsa ol bolmaıdy. Qaıta óńdeý kásiporyndary sol úshin kerek. «Aýyl» partııasynyń maqsaty – osy salanyń tamyryna qan júgirtý. Qaıta óńdeý mekemelerin memleket tarapynan qoldaý deńgeıi suranysqa saı emes. Olar oıdaǵydaı jumys istep, nátıje kórsetýi úshin memleket oǵan aıamaı qarjy salyp, kóp kólemde ınvestısııa quıý qajet. Bárin bıznes ókilderiniń moınyna artyp, qarap otyrýǵa bolmaıdy. Memleket qoldaý tetikterin jetildirip, qaıta óńdeý mekemelerin qamtamasyz etýge tıis. Sol kezde ǵana ekonomıkalyq tıimdilik bolady. Qaıta óńdeýshi kásiporyndardy qoldap, olardyń ónimderiniń shetelge saýdalanýyna jaǵdaı jasaý kerek. Shetelge shyqqan taýar valıýta ákeledi. Valıýta kóbeıgen saıyn kásiporynnyń da áleýeti artyp, qosymsha jumys ornyn ashady», dedi Erbolat Saýryqov.
