«Jaıyq et» seriktestigi – óńirdegi shujyq jáne et ónimderin shyǵaratyn iri kásiporyn. Et óńdeý kesheni jańa úlgidegi zamanaýı jabdyqpen tolyq jabdyqtalǵan. Búginde jylyna 7000 tonna mal men qus etin shyǵaryp, 100% qýattylyqta jumys isteıdi. Bordaqylaý alańdary Zelenov aýdanynda, mal soıý pýnkti Oral qalasynda ornalasqan. Kásiporyn ónimi Batys Qazaqstan, Aqtóbe, Atyraý jáne Mańǵystaý oblysynyń naryǵyna shyǵarylady. Seriktestikti «Aýyl» partııasy Batys Qazaqstan oblystyq fılıalynyń tóraǵasy, eńbek adamy Temirǵalı Eskendirov basqarady. Jıynda «Aýyl» partııasynyń agroóndiristik keshender, aýyl sharýashylyǵynyń damýyna múddeli ekeni, sondyqtan únemi solardyń múddesine qyzmet etetini jaıly aıtyldy.
«Aýyl» partııasy ulttyq ál-aýqatty arttyrýdyń túbegeıli jańa saıasatyn usynyp, ony júzege asyrýǵa daıyn. Bizdiń maqsat – elimizdi ındýstrıaldy-agrarlyq derjavaǵa aınaldyrý jáne sol arqyly azyq-túlik qaýipsizdigi deńgeıi óte joǵary memleket qurý. Qazaqstannyń agroónerkásiptik kesheni ekonomıkany damytý úshin ǵana emes, jalpy memleket úshin de mańyzdy strategııalyq mánge ıe. Biz Májiliske barǵanda aýyl sharýashylyǵy ónimin óndirýshiler, olardy óńdeýshiler úshin áleýmettik aýdarymdardan basqa salyqtyń barlyq túrin tolyq joıý, ózindik qun deńgeıine deıin sýbsıdııalaýdy engizý, agrobıznestiń damýyna kedergi keltiretin, memlekettik organdar tarapynan bolatyn kez kelgen shekteýge tyıym salý boıynsha kúresemiz. «Aýyl» partııasy búginde eńbek adamynyń mártebesin kóterý, qoǵamda jumysshy mamandyqtaryna degen oń kózqarasty qalyptastyrý, aýyl eńbekkerleriniń abyroıyn asqaqtatý, bedeli men tanymaldylyǵyn arttyrý jónindegi barlyq iske bastamashy, uıytqy bolyp qana qoımaı, sonyń zańnama turǵysynda naqty mártebege ıe bolýy úshin kúsh salyp júr. Biz aıtylǵan máselelerdiń oń sheshim tabýyna sizderdiń qoldaýlaryńyzben ǵana qol jetkizemiz», dedi kandıdat Ilııas Dosqojaev.
