Mańǵystaý oblysynda mıllıondaǵan qarjy qoldy bolǵan

AQTAÝ. 26 maýsym. Mańǵystaý oblysynyń Munaıly aýdanynda bilim berý nysandarynyń qurylysyna bólingen mıllıondaǵan qarjy joq bolyp shyqty. Bul týraly egemen.kz tilshisi habarlady. Atalǵan jaǵdaıatqa baılanysty qarjy polısııasy aýdandyq sáýlet jáne qurylys bóliminiń basshysy men birqatar qyzmetkerdiń jáne jeke seriktestik ókilderiniń ústinen qylmystyq is qozǵady. Kúdiktiler is júzinde atqarylmaǵan jumystardy «oryndaldy» dep, el qazynasynan bólingen 38 mıllıon teńgeni jymqyrǵan. Dáliregi, Basqudyq aýylyndaǵy mektepti salýǵa qomaqty qarjy bólingenimen, onyń barlyǵy óz maqsatyna jumsalmaǵan. Oblystyq qarjy polısııasynyń baspasóz hatshysy Nurgúl Muqataı: «Qazir senip tapsyrylǵan bıýdjet qarjysyn talan-tarajǵa saldy degen sheneýnikterdiń ústinen Qylmystyq kodekstiń 176-baby 3-tarmaǵy boıynsha is qozǵalyp, tergeý amaldary bastaldy», – dedi. Gúlaıym Shyntemirqyzy. Derekkóz: egemen.kz. Foto: «24kz».