Úgit-nasıhat toby kásiporyn jetekshileri jáne jumysshylarmen kezdesip, partııanyń saıası baǵdarlamasyn tanystyryp, saılaýshylardyń talap-tilekterin tyńdady. Jıynda ujym qyzmetkerleri ıpotekalyq nesıeniń joǵary paıyzdyq mólsherlemesi, baspana kezegi, múgedek balalarǵa kómek kórsetý, halyq tutynatyn taýarlardyń qymbattaýy, aýyldan kelgen jastardy jumyspen qamtý sııaqty máselelerdi kóterdi. Mekeme qyzmetkeri «Bizden medısınalyq saqtandyrýǵa aqsha ustalady, emhana, aýrýhanalarda qan, zár taldaýlary tegin bolǵanymen basqa medısınalyq qyzmetter aqyly jáne uzyn sonar kezek. Al óz tańdaýymyzben jeke klınıkalardyń qyzmetin qabyldaıtyn bolsaq, oǵan da óz qarajatymyzdy tóleımiz. Sonda biz medısınalyq saqtandyrýǵa ne úshin jarna tólep otyrmyz?» degen saýalyn joldady.
«Bul óte úlken másele. Naqty medısınalyq saqtandyrýǵa kóshý qajettigin kóp jyl boıy aıtyp kelemiz. Qazir jasalǵan Áleýmettik medısınalyq saqtandyrý qory is júzinde «saqtandyrý» emes, salyq sııaqty. Jumys isteıtin adamdar tıisti jarnasyn medısınalyq saqtandyrý qoryna tólep júr. Al sol jınalǵan qarajattardy jumsaıtyn kezde jarna ıelerinen suramaı, qordyń ózi ıgerip otyr. О́ziniń jarnasy túsetin árbir azamattyń medısınalyq saqtandyrý qorynda jeke esepshoty bolýǵa tıis. Osy arqyly kez kelgen adam ózine emhana men dárigerdi tańdaý kerek. Sondaı-aq kórsetilgen medısınalyq qyzmetke tólem jasaý quzyreti ózinde bolýǵa tıis. Sonda qyzmetkerler óz mindetterine uqyptylyqpen qaraıdy, al jumysyna adal medısına qyzmetkerleri aýyr eńbegi úshin laıyqty jalaqy alady. Tipti naýqas ózin sapasyz emdegeni úshin medısınalyq uıym men qyzmetkerdiń qyzmetterine tólem jasaýdan bas tarta alatyndaı quqyǵy bolýy kerek. Naǵyz áleýmettik medısınalyq saqtandyrý degen osy. Shyn máninde naǵyz saqtandyrýǵa kóshsek, ár adam qaı klınıkaǵa barǵysy keledi? Kim dárigerdiń kómegin alǵysy keledi? Munyń bári óz tańdaýyńyzda ári qolyńyzda jarna salyp, jınaǵan qarajatyńyzdy óz densaýlyǵyńyz úshin jumsaı alýyńyzda. Mine, sol kezde sizderde qazirgideı aýyrtpashylyq bolmaıdy», dedi Azat Perýashev.
