Qazaq eliniń qalyptasýyna, irgesin nyqtap, shańyraǵyn berik etýge aldyńǵy býyn aǵalar az eńbek etkenimiz joq. Alaıda bir kúnniń ishinde Jańa Qazaqstandy qurý múmkin emes. Oǵan qol jetkizý úshin bilimi bar, kórgeni kóp, shetelden úırengeni mol azamat, halqynyń tarıhyn, mádenıetin, ádet-ǵuryp, salt-dástúrin jetik biletinder bılikke kelýi qajet. Áıtpese qazaq halqynyń salty da, dástúri de talaı jyldan beri qalyptasty. Sondyqtan ony buzbaı, qazirgi zamanmen ushtastyra bilgeni jón.
Endeshe, keleshekte depýtattyq mandatty ıelenetinderdiń maqsaty – halyqtyń ál-qýatyn kóterý bolýǵa tıis. Qudaıǵa shúkir, qazir Qazaq eliniń jaǵdaıy jaqsy. Kóp elden kósh ilgerimiz. Biraq buǵan toqmeıilsimeı, toqtamaı, ilgeridegi memleketterge qarap boı túzeýimiz kerek. Qazaqstannyń dalıǵan jerin bireý bizge syıǵa tarta salǵan joq. Bul handarymyz ben batyrlarymyzdyń, kósemderimiz ben halqymyzdyń qanymen, janymen saqtalǵan jer. Saq, ǵundardan bastap Kúltegin sekildi bahadúrler Uly dalany qorǵaý úshin basyn báıgege tikti. Osyny umytpaýymyz qajet.
Nobel syılyǵynyń ıegeri Iohannes Hans Danıel Iensen degen ǵalym «Elden ǵalymdar, ınjenerler, dárigerler, aqyl-oı ıeleri ketse, onda sol eldiń sáni bolyp otyrǵan ıntellıgent te qurıdy. Ondaı elde bıznesmender bılikke keledi, kóshedegi kim kóringen saıasatker atanady. Al ártister men sportshylar, bazardaǵy alypsatarlar depýtat bolady», dep aıtqan eken. Sondyqtan halyq kimniń kim ekenin ajyrata bilgeni abzal.
Osy oraıda, báıgege túsip jatqan ini-qaryndastaryma shyn júrekten, aq tilekpen, eshqaısysyn bóle-jarmaı, aldaǵy saılaýda ozyq shyǵýdy tileımin. Halyqqa shyn kóńilden qyzmet etse dep armandaımyn. Sondyqtan halqymyzdy bárimiz bir kisideı jumylyp, saılaýǵa qatysýǵa shaqyramyn. О́z tańdaýyn jasap, eldiń erteńine úles qosýǵa úndeımin.
Partııalardy bólip-jarmaımyn. Saılaýǵa qatysyp jatqan partııalardyń maqsaty – eldiń turmys-tirshiligin jaqsartý, eldiń erteńi úshin eńbek etý. Qazaqqa jaqsylyq jasaý. Sondyqtan shyn júregimnen partııalardyń bárine tabys tileımin. Joldary bolsyn!
Myrzataı JOLDASBEKOV,
qoǵam qaıratkeri
