Kóshpeli keńes jumysy aıaqtaldy

Inspeksııalyq sapardyń negizgi maqsaty – saılaý zańnamasynyń jańa­shyldyǵyn túsindirý, saılaý komıs­sııalarynyń múshelerine ádistemelik kómek kórsetý, sondaı-aq óńirlerdiń aldaǵy saılaýǵa daıyndyǵyn tekserý. Jambyl oblysyna sapary aıasynda Muhtar Erman jergilikti atqarýshy organdar, oblystyq prokýratýra, polısııa departamentiniń ókilderimen, aýmaqtyq saılaý komıssııalarynyń múshelerimen, kandıdattardyń saılaýaldy shtabtarynyń ókilderimen, halyqaralyq baıqaýshylar jáne BAQ ókilderimen keńes ótkizdi. Kezdesýge sondaı-aq EQYU/DIAQB saılaýdy baıqaý jónindegi uzaqmerzimdi mıs­sııa­synyń ókilderi Marııa Faglevaag Varsınka-Varsı (Norvegııa) jáne Endrıý Iýrkovskıı (AQSh) shaqyryldy.

Keńeste saılaýdy uıymdastyrý bo­ıynsha júrgizilip jatqan jumystar týra­ly óńirlik memlekettik organdar­dyń esepteri tyńdaldy. Jambyl oblysy ákimi apparatynyń basshysy Mádı Mátenniń málimdeýinshe, óńirdegi saılaýshylar sany – 717 090. Aımaqta 499 saılaý ýchaskesi jumys isteıdi.

«Barlyq saılaý ýchaskeleri qajetti jabdyqtarmen qamtamasyz etilgen. Sondaı-aq óńirde kandıdattardyń úgit baspa materıaldaryn ornalas­tyrý úshin 308 oryn anyqtalyp, 356 bıl­bord jáne LED-ekrandar bólindi. Taraz qalasynda jáne aýdandarda halyq­qa konsýltasııalyq qyzmet kórsetý maq­satynda 11 Call-ortalyq quryldy. Sondaı-aq www.e-jambyl.kz aqparat portalynda JSN arqyly óz saılaý ýchaskesin izdeý boıynsha onlaın-servıs kózdelgen, telegramm-bot jumys isteıdi. Saılaýshylardy tirkeýdi rastaý boıynsha 260 onlaın-servıstiń jáne turaqty nemese ýaqytsha tirkeýi joq azamattardyń daýys berýin uıymdastyrý úshin 7 servıstiń jumysy uıymdastyrylady», dep habarlady ol.

Sondaı-aq atqarylǵan jumystar týraly Jambyl oblysy aýmaqtyq saılaý komıssııasynyń tóraǵasy Serǵaly Aıdapkelov baıandama jasap, búgingi kúni birmandattyq aýmaqtyq saılaý okrýgteri boıynsha 692 kandıdat tirkelgenin habarlady. «Onyń ishinde №15 jáne 16 saılaý okrýgteri boıynsha Parlament Májilisiniń depýtattyǵyna – 12, 18 saılaý okrýgi boıynsha oblystyq máslı­hat­qa – 70, 27 saılaý okrýgi boıynsha qala­lyq máslıhatqa – 92, 147 saılaý okrýgi bo­ıynsha aýdandyq máslıhattarǵa 518 kan­dı­dat dodaǵa túsedi. Partııalyq tizim­der boıynsha saılanatyn oblystyq máslı­hattyń 18 depýtattyq mandatyna 72 kandıdat tirkeldi», dep málimdedi S.Aıdapkelov.

Jumystyń osy baǵyty boıynsha jumyspen qamtýdy úılestirý jáne áleýmettik baǵdarlamalar basqar­masy­nyń basshysy Erkin Kelesovtiń málim­deýinshe, múgedektigi bar azamattardyń saılaý quqyqtaryn qamtamasyz etýge erekshe nazar aýdarylyp otyr. «Bú­ginde óńirde daýys berý kezinde erekshe jaǵdaılardy qajet etetin 2 541 múgedektigi bar saılaýshy turady. Olar úshin barlyq saılaý ýchaskelerinde pan­dýs­tar, kireberistegi taktıldi kór­set­kishter jáne ǵımarattar ishindegi tak­tıldi jolaqtar qarastyrylǵan. Saılaý kúni onlaın rejimde 27 sýrdoaýdarmashy jumys isteıdi. Sondaı-aq 28 ınvataksı avtokóliginiń qyzmeti uıymdastyrylmaq», dedi ol.

Sondaı-aq keńes barysynda oblystyq prokýratýra men polısııa departamentiniń ókilderi sóz sóılep, saılaý úderisine qatysýshylardyń zańdylyqty saqtaýyn, sondaı-aq qoǵamdyq tártip pen azamattardyń qaýipsizdigin saqtaýdy qamtamasyz etý boıynsha júrgizilip jatqan jumystar týraly habardar etti.

Semınardyń ekinshi bóliminde Muh­tar Erman aýdandyq jáne aýmaq­tyq saılaý komıssııalarynyń múshe­leri­men kezdesý ótkizip, saılaý zańnama­synyń jańalyqtary men osy saılaý naýqanynyń erekshelikterin túsindirdi, sondaı-aq komıssııa músheleriniń kóptegen suraqqa jaýap berdi. Osydan keıin «Daýys berý kúni» iskerlik oıyny ótkizilip, komıssııa músheleri saılaýdy ótkizýdi is júzinde úırendi.

Al Ortalyq saılaý komıssııasynyń múshesi Shavqat О́temisov Atyraý oblysynda osyndaı kóshpeli semınar-keńes ótkizdi. Onda keıbir saılaý ýchaske­lerine baryp, olardyń aldaǵy saılaýǵa daıyndyǵyn tekserdi.

Oblys ákimi apparatynyń basshysy Bolat Isaqov saılaýshylar tizimine 412 165 adam engizilgenin baıandady. Halyqtyń belsendiligin arttyrý maqsatynda oblys ákimdiginiń saıtynda saılaýshylar tiziminen ózin izdeý servısi, telegramm-bot iske qosylǵan. Sondaı-aq óńirde saılaýǵa qatysty barlyq máseleler boıynsha azamattarǵa keńes berý úshin 8 Call-ortalyq jumys isteı bastady. Budan basqa, saılaý naýqany kezeńinde 174 saılaý ýchaskesinde saılaýshylardyń tirkeý mekenjaıyn anyqtaý úshin servıs qoljetimdi. Ol sondaı-aq oblys boıynsha 269 saılaý ýchaskesi bar ekenin habarlady. Barlyq ýchaskeler materıaldyq-tehnıkalyq jaǵynan qamtamasyz etilgen. Oblystaǵy úgit-nasıhat qyzmeti bóliginde úgit-baspa materıaldaryn ornalastyrýǵa arnalǵan 158 oryn jáne saılaýshylarmen kezdesýge arnalǵan 92 úı-jaı aıqyndaldy. Sonymen qatar saılaý týraly aqparattyq bılbordtardy ornalastyrý úshin 528 oryn bólingen.

Keńeste Jumyspen qamtý jáne áleýmettik baǵdarlamalar basqarmasy basshysynyń orynbasary Alfııa Tóle­ǵarıeva múgedektigi bar azamattardyń saılaý quqyqtaryn qamtamasyz etý týraly habarlady. Onyń málimdeýinshe, erekshe jaǵdaılarǵa muqtaj saılaýshylar sany – 2091. Atyraý qalasy men aýdandardaǵy barlyq daýys berý pýnktteri ǵımarattardyń birin­shi qa­batynda ornalasqan. Saılaý ýchas­keleri pandýstarmen, taktıldi jolaqtarmen, aqparattyq belgilermen jabdyqtalǵan. Budan basqa, saılaý ýchaskelerinde múgedektigi bar adamdarǵa arnalǵan buryshtar jabdyqtalǵan, onda lýpalar, Braıl shrıftimen oryndalǵan aqparattyq materıaldar, qosymsha jaryqtandyrý jáne saılaý ýchaskeleri sýrdoaýdarmashylarmen qamtamasyz etilip, ınvataksı avtokólikteriniń qyzmeti uıymdastyrylady.

Oblystyń aýmaqtyq saılaý komıs­sııa­synyń tóraǵasy Azamat Aımana­qumovtyń habarlaýynsha, óńirde 365 saılaý komıssııasy (9 aýmaqtyq, 87 okrýgtik, 269 ýchaskelik) jumys isteıdi, onda 2 429 komıssııa múshesi qyzmet atqarady. Barlyǵy 445 kandıdat tirkeldi, onyń ishinde Májiliske – 12, oblystyq máslıhatqa 6 partııalyq tizimde – 61, oblystyq máslıhatqa 15 birmandattyq saılaý okrýgi boıynsha – 40, Atyraý qalalyq máslıhatyna – 71, 7 aýdandyq máslıhatqa 261 kandıdat saılaýǵa túsedi. Sondaı-aq saılaý naýqanyn ótkizý kezinde zańdylyqtyń saqtalýyn qadaǵalaýdy, sondaı-aq qo­ǵam­dyq tártip pen azamattardyń qaýip­sizdigin saqtaýdy qamtamasyz etý boıynsha júrgizilip jatqan jumystar týraly oblystyq prokýratýra men polısııa departamentiniń ókilderi sóz sóıledi.

Semınar-keńestiń ekinshi bóli­minde aýmaqtyq saılaý komıssııa­larynyń músheleri úshin iskerlik oıyn túrindegi trenıngter ótkizildi, saılaý komıssııalarynyń músheleri daýys berýdiń barysyn qamtı otyryp, ýchaskelerde daýys berý úderisin kór­setti. Olar ýchaskelik saılaý ko­mıs­sııalarynyń daýys berý kúni qalaı jumys isteıtinin, sonyń ishin­de ýchas­kelerdi ashý, bıýlletender berý, daýys berýdi uıymdastyrý, baıqaý­shy­lardy tirkeý, esepten shyǵarý kýálik­teri boıynsha daýys berý, daýystardy sanaý jáne ýchaskeler boıynsha nátı­jeler shyǵarý úderisin kórsetti. Osy­laısha, OSK músheleri aldaǵy saılaýdy ótkizý boıynsha saılaý komıssııalary­na ádistemelik jáne praktıkalyq kómek kórsetý úshin barlyq 20 óńirge ınspek­sııalyq saparlaryn aıaqtady.

О́ńirlerge ınspeksııalyq saparlar barysynda Ortsaılaýkom múshe­leri aýmaqtyq jáne okrýgtik saılaý komıssııalarynyń jumysymen tanysyp, saılaý ýchaskeleriniń daıyndyǵyna kóz jetkizdi.