Almatydaǵy Pallıatıvtik kómek ortalyǵyna (hospıs) Japonııa úkimeti 119 kópqyzmetti kereýet syıǵa tartty. Kúnshyǵys eli aldaǵy ýaqytta Qostanaı men Shý óńirleriniń aýrýhanalaryna da kómek qolyn sozbaq.
Dúnıe júzi boıynsha Hospıs, Pallıatıvti kómek, Gerontologııalyq kómekti eń kóp kórsetetin memleket Japonııa bolyp sanalady. Bul ortalyqtar syrqaty aýyr pasıentter men jasy kelgen qarttarǵa aıryqsha kóńil bólip, kómektesý negizinde qurylǵan. Elimizde 1997 jyldan bastap Japonııa Úkimetiniń qaıtarymsyz kómek kórsetý maqsatyndaǵy «Shóptiń tamyry» áleýmettik baǵdarlamasy jumys istep keledi. Osy 17 jylda atalmysh áleýmettik jobaǵa Japonııa úkimeti 5 mln. dollar kóleminde qarjy jumsaǵan. 2013 jyly Almatydaǵy Pallıatıvtik kómek ortalyǵy osy baǵdarlamaǵa qatysýǵa ótinish bildirip, ústimizdegi jyldyń 17 naýryzynda eki tarap kelisimshartqa qol qoıǵan bolatyn.
О́z kezeginde Almaty qalasy Densaýlyq saqtaý basqarmasy basshysynyń orynbasary Manas Ramazanov atalmysh joba aıasyndaǵy osyndaı aýqymdy syılyqtary úshin Almaty qalalyq densaýlyq saqtaý basqarmasynyń, jalpy medısına qaýymdastyǵy atynan Japonııa úkimetine, sondaı-aq, búgingi sharaǵa qatysyp otyrǵan Japonııanyń Qazaqstandaǵy elshisi Masaesı Kamohara myrzaǵa alǵys bildirdi.
– Ortalyqta emdelip jatqan naýqastardyń deni onkologııalyq dertpen aýyratyndar jáne medısınalyq qyzmetkerlerdiń kómegin qajet etetin jasy kelgen adamdar. Sondyqtan japondardyń kórsetip otyrǵan kómegi Pallıatıvti ortalyq ujymynyń jumysyn jeńildetedi. Máselen, gıgıenalyq jaǵynan, olardy kútip, tamaqtandyrǵanda úlken qolǵabys bolmaq, – dedi M.Ramazanov.
1999 jyly Almaty qalasy ákimdiginiń sheshimimen irgesi qalanǵan qalalyq Pallıatıvti kómek ortalyǵynyń maqsaty – negizinen daýasyz dertke shaldyqqan onkologııalyq naýqastar men medısınalyq qyzmetkerlerdiń kómegin qajet etetin jasy kelgen egde adamdarǵa pallıatıvti kómek, ıaǵnı, em-dom jasaý, aýrýdy sezbeýge qarsy terapııa, kásibı medbıkelik kútim, naýqastar men olardyń jaqyndaryna psıhologııalyq jaǵynan qoldaý kórsetý. Elimizde zamanaýı tehnologııalardy paıdalanyp, jańa qondyrǵylardyń ıgerilýi sońǵy 5 jylda túrli qaterli derttiń betin qaıtarýǵa yqpal etýde. Qaladaǵy Pallıatıvtik kómek kórsetý ortalyǵynda em-dom qabyldap jatqan naýqastar da, meıirbıkeler de kópqyzmetti kereýetterdi uzaq ýaqyt kútti.
Japonııa úkimetiniń atynan Almaty qalasyndaǵy onkologııamen aýyratyn naýqastarǵa arnalǵan kópqyzmetti tósekpen qamtamasyz etý jobasynyń aıaqtalýymen quttyqtaǵan elshi Masaesı Kamohara myrza «Shóptiń tamyry» baǵdarlamasy Japonııa úkimetiniń adamnyń ómir súrý deńgeıin joǵarylatý maqsatynda qurylǵanyn, ol úkimettik emes uıymdardyń, bilim berý jáne medısınalyq emdeý mekemeleriniń jumystaryn qoldaýǵa baǵyttalǵanyn jetkizdi.
– Qazaqstanda osy baǵdarlama aıasynda, ıaǵnı 1997-2014 jyldary 70 joba respýblıkanyń birneshe aımaǵynda júzege asty, – dedi elshi myrza. – Bul kópqyzmetti kereýetter ortalyqtaǵy medısına qyzmetkerleriniń naýqastarǵa qaýipsiz kútim jasaýda úlken ról atqarady. Sondyqtan da bul kereýetter syrqaty aýyr naýqastardy kútýdegi birden bir sheshim bolyp tabylady, sondaı-aq pasıentterdiń kóńil-kúıine jaqsy áser etedi dep oılaımyn.
Shyndyǵynda da, jańa tehnologııamen jasalǵan mobıldi tósekter naýqas adamǵa óte yńǵaıly. Dóńgelegi bar, qozǵaýǵa jeńil. Ortalyqtyń aǵa medbıkesi Nurjan Shotaevanyń aıtýynsha, bul tósekter medbıkeler men kishi medısına qyzmetkerleriniń jumysyn 80 paıyzǵa jeńildetedi. «Biz buryndary naýqastardy ózimiz kóteretinbiz. Qazir kórip otyrsyzdar, endi ózderi otyryp, tura alady. Tósektiń eki jaǵynda qorǵanyshtary bar. Ol da bizge úlken kómek. Sondyqtan, naýqas jandarǵa osyndaı qolushyn sozǵan Japonııa úkimetine, onyń halqyna shyn júrekten rahmet aıtamyz», – dedi ol.
Gúlzeınep SÁDIRQYZY,
«Egemen Qazaqstan».
ALMATY.
