PARLAMENT

"Egemen Qazaqstannyń" arnaýly beti

Halyq pen memleket tańdaǵan jol

Qasıetti Túrkistandy biz ne úshin rýhanı astanamyz dep ataımyz? «Áke, ana» deıtin uǵymdardyń ulylyǵyna biz kúndelikti tirshilikte jete mán bere bermeıtinimiz sııaqty Haziret Qoja Ahmet Iаsaýı babamyzǵa máńgi meken bolǵan Túrkistanǵa qazaqy rýhymyzdyń qarashańyraǵy retinde sana bıiginen kóz salyp, tarıhı tamyrymyz turǵysynan paıymdaý­lar jasaýdyń mańyzyn qaperge ala bermeımiz. «Arystan babqa túne, Qoja Ahmetten tile» degen babalar ósıe­­tin óz otbasymyz, qaraqan basymyz, jeke pendelik múddemizge baılanys­ty ǵana oryndaımyz. Ámir Temir syndy kóregen alyptyń syıyn­ǵan pirleri, saıyn sahara tósinde jatqan súıekteriniń ústine álem ǵajaıyptaryna bergisiz ásem kesene saldyrǵan bul áýlıeler kózi tirisinde tek qana óz jeke basynyń qamyn oılaýmen kún keshti me eken? Saıypqyran babamyzdyń olarǵa degen sheksiz qurmetiniń astarynda ne jatyr? Elbasymyz N.Nazarbaev Qasıet­­­ti Qaǵbanyń qaqpasynan engen­­de Alladan jeke basynyń ıgili­gin ti­­ledi me? Joq, Qazaq eline ty­­nysh­­­tyq, amandyq, ósý-órkendeý baqy­­tyn suraǵany ámbemizge aıan. Osyn­­daı tarıhı tulǵamyzdyń is-áreke­­tinde kúlli qandastarymyzǵa úlgi-ónege bolarlyqtaı qandaı sabaq­tastyq bar? Mine, ár azamat osy suraqqa jaýap izdese, shama-shar­qynsha oı tereńine súńgip, tap­qan jaýabyn paıym tarazysyna salsa, memlekettik múdde turǵy­­synan tııanaqty túıindeýler jasa­­sa, biz álemdik básekelestikke qabi­­letti adamı kapıtalymyz týraly aýyz toltyryp aıta alǵan bolar edik. Qoja Ahmet Iаsaýı kesenesiniń salynýy qazaq memlekettiliginiń qalyptasý kezeńimen tuspa-tus keldi. Sodan bergi ǵasyrlarda qa­zaq halqy óziniń handary men batyr­laryn, jaqsylary men jaısań­daryn osy kesenege jerlep, ony tarıhı tulǵalardyń panteony­na aınaldyrǵan. Egemendik alǵan jyldar ishinde etek alǵan ár rý­dyń óz mazaryn, meshitin bólek­teýi, óz abyzy men batyryn menshik­tep dáripteý úrdisi arǵy-bergide ótken babalarymyzda bolma­ǵan. Súıin­baıdyń qyrǵyz aqyny Qataǵanmen aıtysynda jyrlanǵandaı, qazaq halqy óziniń tutastyǵymen maqtan­dy. Qazaq handary eldiń birli­gin saqtaýymen, el men jerdiń tutas­tyǵyn qorǵap, sol maqsat jolynda halqyn judyryqtaı jumyldyra bilýimen baǵalandy. Sondyqtan da, Elbasymyzdyń eldegi birlik pen turaqtylyqty saqtaý, barynsha nyǵaıtý máselesin eń birinshi kezekke shyǵarýy, «Máń­gi­lik El» uǵymyn ulttyq ıdeıa­myz­ǵa aınaldyrýy árbir azamat­tyń sanasynda memlekettik múd­de tur­ǵysynan sáýlelenip, patrıot­tyq ustanymnyń ustynyna aına­lýy tıis. Buǵan jalań dıdak­tıka­­lyq dáıektemelerdi kópirme qy­zyl sózdiń tasqynyna ústemelep jet­kize berýge bolar. Biraq odan naq­ty nátıje kútý shelekten balyq aýla­ǵanmen birdeı. Qoǵamdyq quby­lys­tyń kelip shyǵý sebebin anyq­tamaı turyp, onyń saldarymen kúre­sý de kútkendeı nátıje ber­­meıdi. Búgingi ulttyq sananyń deńge­ıi­ eń aldymen otbasylyq qundy­lyq­tardyń quldyrap, halyq­tyq­ pedagogıka úrdisteriniń umytylýynan kórinip otyr. Bala esi kirip, mańaıyn boljaǵannan halyqqa tán minez-qulyq, ádep-ıba qaǵıdalary, ádet-ǵuryp, salt-dástúr erekshelikteri, otbasy, Otanǵa baılanysty usta­nym­dar, t.b. ulttyq qasıetti qun­dy­­­lyqtar jaıly estimese, úlgi-óne­gesin sanasyna sińirip, jan dúnıe­sine endirmese, eseıgen saıyn ózini­kinen góri, ózgeniń qańsyǵyn tań­syq kórip, ulttyq bet-beıneden maqu­rym bola bastaıtynyna kún­delikti ómirde kóz jetkizip júrmiz. Ult úshin qasirettiń eń úlkeni – osy. Eger Elbasymyzdyń «Máńgilik El» ıdeıasy ulttyq ıdeologııamyzǵa arqaý bolatyn bolsa, onyń júzege asyrylýy el basqarǵan azamattardan bastap el aǵalarynyń, zııaly qaýym ókilderiniń, árbir sanaly azamattyń eń birinshi kezekti atqarar qyzmetine, azamattyq mindet-paryzyna aınalýy tıis. Eldi, halyqty biriktirýge arnalyp ótkizilip júrgen túrli deńgeıdegi forým, jıyndarymyzdyń negizgi maqsaty – osy. Jaratylystaǵy tir­shilik ıeleriniń eń birinshi kezektegi keregi – tán qoregi, ıaǵnı azyq, ta­maq. Sodan soń adamǵa kıim, ózge de turmystyq qajettilikter kerek. Al sol kerekterden joǵary turatyn, adam sanasyn bıiktetetin azyq – rýhanı azyq adam boıyna halyqtyq izgi salt-dástúrmen, ozyq bilimmen, úlgili tárbıemen beriledi. Búgin biz kórgen qıyndyqtardy balalarymyz kórmesin, tamaǵy toq, kıimi bútin bolsyn, neni qalasa soǵan qol jetkizsin, al rýhanı azyqty jáne ultjandylyq qasıetti ózi izdep taýyp alar deıtin qate túsiniktiń shylaýyndaǵy ata-ana óz urpaǵyna ǵana emes, Otan, memleket múddesine qııanat jasap júrgenin jete uǵynbasa, bizdiń úlken qateligimiz osy bolary aıan. Qyzyl sózben, naýqandyq sharamen is bitpeıdi. Sol arqyly ǵana ár otbasyna tikeleı yqpal jasaýdyń múmkindigi de joq. Múmkindikterimizdi saralaı kelgende, biz áli de aýzy dýaly el aqsaqal­darynyń, zııaly qaýym ókilderiniń kómegine zárýmiz. Ulttyń, urpaq­tyń qamy jaıly áńgime bıik minberlerden, merzimdi BAQ bette­rinen únemi aıtyla bergeni durys. Degenmen, aýyl-aımaq, eldi meken, mektepterge deıin baryp, turǵyndarmen tikeleı baılanys ornatý, aıtylatyn oıdy júzbe-júz otyryp, júrekten júrekke jetkizýdiń máni de, berer nátıjesi de bólek. Osyndaı jumystardyń jańa ádis-tásilderin oılap taýyp júzege asyrý – ýaqyt talaby. Áńgime basynda aıtqa­ny­myzdaı, ult, memleket múddesin jeke bas qamynan joǵary qoıýdyń ne ekenin, qandaı bolatynyn babalarymyz jetkize aıtyp, jeke bastarynyń úlgisi­men dáleldep ketti. Jarqy­rap tur­ǵan sara joldan jańy­lyp, ta­banymyzdyń búri joqty­ǵyn ta­nyta bersek, Elbasy usyn­ǵan Temirqazyq ıdeıany ıgi­ligimizge jarata almasaq, eldi­gi­mizge – syn, erteńimizge – qııanat. Ulasbek SÁDIBEKOV, Májilis depýtaty, «Nur Otan» partııasy fraksııasynyń múshesi.

Qazaq eli – túrki dúnıesiniń qarashańyraǵy

Ústimizdegi jylǵy 19-20 mamyrda Astanada alǵash ret «Túrki jazýy kúni» halyqaralyq deńgeıde atalyp ótti. Forýmǵa Túrki keńesi men TÚRKSOI-dyń basshylary, Túrkııa, Reseı, Tatarstan, О́zbekstan, Qyrǵyzstan, t.b. elderdiń ǵalymdary, Qazaqstannyń IýNESKO-daǵy ókildigi qatysty. Qazaqstan Respýblıkasy Parlamenti Májilisi Áleý­­met­tik-mádenı damý komıte­ti­niń bastamasymen jáne Túrki akademııasynyń uıymdas­ty­rýmen shaqyrylǵan osy forým tamyrlas ulttardyń rýhanı álemine jańa serpin ákeldi. Túr­kitildes memleket­ter basshy­la­rynyń Túrkııanyń Bod­rým qalasynda bolǵan sammı­tinde «Túrki jazýy kúniniń» Astanada atalyp ótilýine joǵary baǵa berildi jáne ony jalpytúrkilik merekege aınaldyrý jóninde mámile jasaldy. Endigi mindet osy kúndi jyl saıyn búkil túrki dúnıesiniń rýhanı-mádenı jańǵyrý kúni retinde ótkizip, jańa basta­ma­larǵa ǵumyr berý bolyp tabylady. Osyǵan oraı, atalǵan forýmda birer usynysymyzdy ortaǵa salǵan edik. Orhon eskertkishterindegi Kúltegin, Tonykók, Bilge jazbalary baıan etken tarıhty ásem sóıletetin ádebı shyǵarmalar men ekrandarda shalqytatyn kórkem fılmderge Túrki aka­demııasy men TÚRKSOI-dyń­ aty­nan báıge jarııalaýǵa shaqyr­dyq. Ekinshiden, rýhanı qundy­lyq­tarymyzdy almasý­dyń múm­kindikterin qalt jiberme­ı­ik. Bir-birimizdiń ádebı shyǵarma­la­rymyzdy iriktep, tól tilderi­mizge aýdaraıyq. «Túrkitektes elder jazýshylarynyń kitap­hanasy» serııasyn ázirleýge kiriseıik dedik. Úshinshiden, túrki dúnıesin túgel qamtyǵan ortaq ensıklopedııa shyǵarýdy usyndyq. Mádenıet mınıstrligi men Bilim jáne ǵylym mınıstrligi Astanadaǵy Túrki akademııasymen jáne túrkitektes elderdiń salalas mınıstrlikterimen birge osy usynystardy júzege asyrý­dyń joldaryn aıqyndaýǵa, res­pýb­­lıka Úkimeti olarǵa uıym­das­tyrý-ekonomıkalyq jaǵy­nan­ qol­daý kórsetýge tıis dep bile­miz. Elbasymyz atap kórset­ken­deı: «Qazaq eli – túrki dúnıesiniń qarashańyraǵy». Al temirqazyq el – Qazaqstan tarıhı mıssııasyna sáıkes osyndaı halyqaralyq mańyzdy rýhanı bastamanyń qozǵaýshy kúshi bolsa jarasady. Talap-tilegimiz qoldaý tabady dep oılaımyz. Aldan Smaıyl, Májilis depýtaty.

Deńgeıiń qandaı, jas maman?

Endi qalyptasyp kele jatqan zamandasta­rymyzdyń bıýrokratııalyq qasıetterdi boıyna erte sińirip, ómirdi kabınetiniń terezesinen ǵana tanyp, qalyptasqanyn kórgende ózekti úlken ókinish órteıdi. Nege? О́ıtkeni, ol – osy eldiń erteńi. Al bolashaǵyń sanalatyn jas óren qarapaıym halyqtyń jaǵdaıyn bilmese, onymen tonnyń ishki baýyndaı aralasyp kete almasa, ókinbegende qaıtesiz?! Qyzmet babynda, azǵantaı ǵana ǵumyrymyzda talaı adammen aralas-quralas boldyq. Sondaı kezeńderde emen esikti erte ashqan jas mamandardyń halyqqa shekesinen qarap, jurtty mensinbeı, qolynyń ushyn berip, suraǵyna ernin jybyrlatyp jaýap qatqanyna kýá bolyp júrmiz. Shynashaqtaı ǵana balanyń seksenniń seńgirine jetken aqsaqalǵa ákireńdep jatqanyn da estımiz. Túrli memlekettik baǵdarlamalardy iske asyratyn tetikti oryndarda otyrǵan jastardyń óz qyzmetin júrdim-bardym atqaryp, aldyna kelgen adamǵa jóni túzý sóz aıtpaı, esikti nuqsaǵan kezder de kezdesedi. Zor bilimge ıek artýdyń ornyna, qyzyl sóz, kóbik áńgimege elirgen jastardyń mansaptyq jolynda ólermendikpen alǵa umtylǵanyn da kórdik. Otan aldyndaǵy mindetti lepirme sóz dep qabyl­daıtyndar da bar. О́ndiriste pispeı, sharýashylyqta bir shyrpynyń basyn syndyrmaı, ónerkásipten beıhabar kúıinde qyzmetke qonjıyp, sol oryndy atasynan qalǵan muradaı kóretin jastardy da bilemiz. Árıne, óskeleń urpaqtyń bári sondaı desek, qateleser edik. Elgezek, elge jany ashyp ju­mys isteıtin, úlken bilim jıǵan jastarymyz da bar. De­genmen, olar joǵaryda biz sóz etken zaman­das­­ta­rynyń keri áreketterinen tasada qalyp qoıyp jatady. Elbasy eldiń aldyna zor mindet qoıyp otyr. Ol álemniń damyǵan elderimen básekege túsý. Qaımana qazaqty jer-jahandaǵy jurtpen teńestirýdiń tóte joly básekege qabilettiligin arttyrý dep bilemiz. Eýrazııalyq ekonomıkalyq odaqqa múshe bolyp kirý de osyndaı arman-ańsardyń nátıjesinde oryn alyp otyr. Mine, osyndaı tarıhı sáttiń aldynda turǵan Qazaq eline bilikti de bilimdi, alymdy da shalymdy jastardyń aýadaı qajet ekeni aqıqat. Sebebi, olar erteń tetikti jerlerdiń qulaǵyn ustaıdy. Memlekettiń mańdaı terimen qurylǵan baǵdarlamalar men jobalardy iske asyrady. Sondaı kezeńderde bıýrokratııalyq ádetke salyp, jurtqa jóndi durys jumys kórsetpeı otyrsa, qabyldaǵan baǵdarlamańnan da, ony iske asyrmaq bolǵan adamdardan da paıda bolmaı qalýy múmkin. Biz eger Reseı jáne Belorýssııamen ıyq tiresip básekege túsemiz, óz naryǵymyzdy keńeıtemiz, Qazaq­s­tan­da óndirilgen taýardy Eýrazııalyq ekonomı­kalyq odaqtyń sheńberine shyǵaramyz desek, onda bul iste jas mamandardyń orny erekshe. Bul rette olar ózderine zor jaýapkershilik júktelip otyrǵanyn sezýleri kerek. О́ıtpegen jaǵdaıda, kásipkerler men kásiporyndardyń jumysy ónbeıdi, eńbegi esh, mańdaı teri tuz bolady. Básekege qabilettilik degende, jas memlekettik qyzmetshilerdiń de jumysyn qadaǵalap, baqylap otyrý kerek. Osy memlekettiń baǵyn ashatyn, jolyn dańǵyl etetin, Máńgilik Elge aınaldyratyn jastar. Sondyqtan olardyń jastaıynan sheneýniktik qalypqa enbeı, halyqqa qyzmetshi sezinip óskenin qalar edik. Almas TURTAEV, Májilis depýtaty.

Ulttyq rýhymyz úshin de kıeli oryn

Qýatty kórkem shyǵarma qaı kezde de halyqtyń oıy men muratyn, taǵdyry men talaıyn jyrlaı otyryp, ult tutastyǵyna, urpaqtar múddesine qyzmet etedi. Álemdik dárejege kóterilgen kez kelgen uly ádebıettiń maqsaty da, muraty da osyndaı shyǵarmalarymen ólshenedi. Úsh myń jyldan asyp jyǵylar uly tarıhy bar kórkemsózimizdiń aqıqaty – ultymyzdyń tarıhy sanalatyny da sondyqtan. Kelesi jyly – mereıtoıy IýNESKO-nyń ataýly kúnder kúntizbesine engen Qazaqstannyń halyq jazýshysy, Memlekettik syılyqtyń laýreaty, shyǵarmalary álemniń ondaǵan tilderine aýdarylyp, qazaq halqynyń sońǵy on ǵasyrǵa jýyq ómiriniń kórkem shejiresin quraıtyn «Kóshpendiler», «Altyn Orda» trılogııalaryn, «Qahar», «Almas qylysh», «Jantalas» sekildi ataqty tarıhı romandar serııasyn, sondaı-aq, «Altyn qus», «Kóleńkeńmen qorǵaı júr», «Alystaǵy araldar», «Aıqas» tárizdi ómir shyndyǵyn barynsha kórkem sýretteıtin keń tynys­ty epıkalyq kórkem dúnıeler týdyrǵan ultymyzdyń zańǵar jazýshylarynyń biri Ilııas Esenberlınniń 100 jyldyǵy. Kemel minezdi, kenen sózdiń ıesi, týǵan jurtymen birge jasaıtyn jazýshynyń ataýly mereıtoıy týǵan jeri – Kókshetaý óńiri men Atbasar aýdanynda, shyǵarmalaryn jazǵan, ómiriniń qomaqty jyldary ótken, máıiti jatqan Almaty qalasynda, sondaı-aq, qalamger týyndylarynyń basym oqı­ǵa­­lary ótetin burynǵy Aqmola, qazirgi As­ta­na qalasynda mereıtoı sharalary res­­pýb­lıkalyq sıpat alyp óterine kámil senemiz. Degenmen... totalıtarlyq júıeniń tártibi men tizgini qatty kezeńniń ózinde jas­qanbaı janyn salyp, qazaq ádebıe­­tinde alǵashqy bolyp tarıhı zerde tamy­ryna qan júgirtken, jańa turpatty tarıhı romandar jaratý kóshin bastaǵan sýret­kerdiń kindik qany tamǵan jer – Atbasar qalasyndaǵy jazýshy murajaıy kóp jyldardan beri kúrdeli jóndeý kútip, tozyńqyrap turǵanyn óz kózimmen kórdim. Murajaı – tek jazýshynyń ǵana ómir­baıany emes, kúni keshe ǵana tilimiz ben dinimizdi júdetip baryp, Táýelsizdik dáýi­rinde qaıyra es jıyp, oıy men boıyn tik­tegen ulttyq rýhymyzdyń da kıeli orny. Osy oraıda, ataýly mereıtoı qarsa­ńynda el Úkimeti bastaǵan, oblys ákimdigi qostaǵan tıisti mekemeler jazýshy murajaıyn kúrdeli jóndeýden ótkizip, qalanyń ortalyq alańyna sýretker eskertkishin kompozısııalyq tutastyqta ornatýǵa tıisti mólsherde qarjy bólýge yqpal etse, qalamger aldyndaǵy bir qaryzymyzdyń ótelgeni bolar edi. Nurlan ORAZALIN, Senat depýtaty, Qazaqstan Jazýshylar odaǵy basqarmasynyń tóraǵasy.

Eńbek eskerilýimen qundy

Májilistiń plenarlyq otyrysy barysynda palata depýtaty Svetlana Qadyralıeva Premer-Mınıstr Kárim Másimovtiń atyna depýtattyq saýal joldaǵan bolatyn.  Onda bylaı delinedi: «Prezıdent Nursultan Na­zarbaev «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty baǵdarlamalyq maqalasynda naqty ónimdi eńbekti áleýmettik jańǵyrtý saıasatynyń negizi retin­de qoıýdy tapsyrdy. Osyǵan baılanysty adam eńbegin yntalan­dyrýdyń róli men mańyzy artady. Turǵyndardyń eń az qorǵa­latyn sanaty – zeınetkerler ekeni belgili, olardyń ishinde kóbi 40, 50 jáne odan da kóp jyldar halyq sharýashylyǵynda jumys istegender. Osyndaı eńbek ardagerleriniń aldynda bizdiń barlyǵymyz eshýaqytta ótelmes qaryzdarmyz, olar qazirgi Qazaqstannyń áleýetin qurý úshin az jumys atqarǵan joq jáne biz kóptegen jyldarǵy eńbekteriniń jemisin qazir paıdalanyp otyr­myz. Búgin biz Astananyń árbir jarqyraǵan záýlim ǵımarat­ta­rynda, Qazaqstannyń qazirgi jetistikteriniń árqaısysyndaǵy sekildi bizdiń ardagerlerimiz qalaǵan kirpish bar dep aıtýǵa tolyq quqymyz bar. Biraq, óte ókinishtisi, osy adamdar ózderiniń eńbeginiń úlesine qaraı bara-bar zeınetaqy jáne materıaldyq syıaqyny árdaıym alyp otyrǵan joq. Májilistiń depýtattarymen bastamashylyq jasalǵan, aǵa býyn ókilderiniń kóptegen máselelerin sheshýge bolatyn Qazaqstan Respýblıkasynyń «Ardagerler týraly» zań jobasy osy ýaqytqa deıin qabyldanǵan joq. Bul zań jobasy bıýdjet úshin shyǵyndy, bizdiń paıymdaýymyzsha, dál sol sebepti de ókiletti memlekettik organdar tarapynan qoldaý tappaı otyr. Alaıda, jalǵasyp jat­qan álemdik daǵdarys kezeńin­de bıý­d­jettiń shekteýli múmkindik­te­rin eskergenniń ózinde, aǵa býyn ókil­derine olardyń keıde, tipti, aýyr jaǵ­daılarda júrip ótken ómir jol­­daryna qarapaıym qurmet ­kór­se­týden bas tartýǵa quqy­myz joq. Saılaýshylarmen kezdesýlerde zeınetkerlerden materıaldyq problemalardy sheshýdi ǵana emes, elimizdiń aldynda olardyń sińirgen eńbegin memleketpen taný týraly ótinishterin de jıi estımiz. О́ıtkeni, qazaqstandyqtardyń kópshiligi – ataqty mınıstrler nemese zaýyt dırektorlary emes, elene bermeıtin qarapaıym eńbekshiler, biraq budan olardyń eńbeginiń qoǵam úshin mańyzy nemese quny túsip qalmasa kerek. Nemerelerimen aralasqanda, bóten adamdarmen kezdeskende, tipti, kezdeısoq áńgimelesken adam­nyń ózi olardyń eren eńbekteri týraly, ómiriniń bos sendelispen ótpegenin, al adamdar úshin kerek isterge toly eke­nin biletinine olar senimdi bolýy tıis. Buryndary eńbekshiler uzaq jylǵy adal eńbegi úshin «Eńbek arda­geri» medalimen marapattalatyn. Onda 40 jyldan astam eńbek ótili bar qyzmetkerlerge «Eńbek arda­geri» medali jáne ataǵy berile­tin. Bul kótermeleý birqatar TMD elderinde, Reseıdi qosa alǵanda, buryn­ǵysynsha qoldanylady, biraq bizdiń eli­mizde 1995 jyldan bastap «Eń­bek ar­­da­geri» medali berilmeıtin boldy. Alaıda, ómirdiń ózi, ásire­se, Jalpyǵa Ortaq Eńbek Qoǵa­my­na áleýmettik jańǵyrtý baǵdarla­masynyń, údemeli ındýstrııalandyrý jáne t.b. baǵ­darlamalardyń aıasynda osy nag­radanyń qajettiligin dáleldep otyr. «Eńbek ardageri» memlekettik medalin alyp tastaǵannan keıin, kóptegen kásiporyndar eńbegi sińgen qyzmetkerlerine ózderiniń jeke vedomstvolyq nagradalaryn taǵaıyndaýǵa májbúr bolǵany máseleniń ózektiligin kórsetedi. Bul durys ta, sebebi, marapattalýshynyń eren eńbegin tanýdan basqa, mundaı nagrada jas býyn úshin ony belsendi eńbekke baǵyttaı otyryp, mańyzdy tárbıelik ról de atqarady. Sonymen qatar, Qazaqstan Res­pýblıkasynyń Prezıdenti Nur­sultan Nazarbaevtyń Jar­ly­ǵymen Qazaqstanda Eńbek kúni sııaq­ty mereke de taǵaıyndaldy. Joǵaryda baıandalǵandarǵa baılanysty, «Aq jol» partııa­synyń depýtattyq fraksııasy atynan Úkimetke qaıyrylǵandy jón kórip otyrmyn. Ekono­mı­kanyń mem­lekettik, jeke nemese qoǵamdyq sektorlarynda jáne áleýmettik salalarynda 40 jáne odan da kóp jyldar adal qyzmet istegen azamat­tar úshin «Qazaqstan Res­pýblıkasynyń Eńbek ardageri» ataǵy taǵaıyn­dalyp; tóske taǵa­tyn belgini (medal) tapsyrý týraly másele qarastyrylsa quba-qup bolar edi. Bul qadamnyń qoǵam­da elimizdiń qatardaǵy eńbek­shi­lerine, qarapaıym jumysshy mamandyǵyn atqaratyn adam­darǵa qurmet kórsetý oraıynda mańyzdy ról atqaratynyna senimdimiz».

Fotokúndelik

Sýretterdi túsirgen Erlan OMAROV.