Sheshýshi kezeń

Brazılııada ótip jatqan álem chempıonatynyń 1/8 fınaly bastaldy Búgin toptyq kezeńnen ót­kender 1/8 fınalda kezdesedi. Bul kezeńge eń birinshi bolyp «V» tobyndaǵy Gollandııa men Chılı quramalary shyqqan bolatyn. Ekinshi bolyp «A» tobynyń ókilderi Brazılııa men Meksıka joldama aldy. Endi erejege sáıkes, osy toptarda birinshi jáne ekinshi oryn alǵan Brazılııa men Chılı, Gollandııa men Meksıka komandalary kezdesedi. Sodan keıin Kolýmbııa – Ýrýgvaı quramalarynyń jasyl alańdaǵy aıqasy ótedi. Keıbir sarapshylar 1/8 fınaldaǵy oıyn­dardyń ishinde eń qyzyqty jáne tartysty kezdesý osy koman­dalar­dyń arasynda ótedi deýde. Bul matchta jeńgen komanda shı­rek fınalda Brazılııa –Chılı qura­malarynyń arasynda ótetin kezdesýdiń jeńimpazymen kúsh synasady. Osylardan basqa 1/8 fınalda Fransııa – Nıgerııa matchy ótedi. Fransııa óz tobynan birinshi oryn alyp kelesi aınalymǵa shyqsa, afrıkalyqtar ekinshi orynmen joldama aldy. Bul komandalardyń arasyndaǵy oıyn da qyzyqty bolatyny sózsiz. Ras, alǵashqy kezde Dıde Desham quramasynyń oıynyna qarap, Fransııa alysqa barmaıdy degender de bolǵan. Alaıda, Fransııa toptyq kezeńniń sońǵy matchtarynda jaqsy oınap, qazir endi chempıondyq bolmasa da júldege talasa alatyn komanda ekenin kórsetip otyr. Al «G» tobynan 1/8 fınalǵa Germanııa men AQSh shyqty. Bul toptaǵy sońǵy matchtar  Germanııa men AQSh jáne Portýgalııa men Gana arasynda ótti. Onda 1/8 fınalǵa shyǵý úshin Ganaǵa jeńis kerek bolsa, AQSh pen Germanııaǵa teń oınasa da bolatyn edi.  Biraq, afrıkalyqtar maqsatyna jete almady. Olar Portýgalııadan 2:1 esebimen utylyp qaldy. Al Germanııa qarsylastaryn 1:0 esebimen utyp, 7 upaımen birinshi oryn alyp, kelesi aınalymǵa shyqty. 1/8-ge jeńilse de 4 upaımen AQSh ta joldama aldy. Endi Germanııa kelesi oıynyn Aljırge qarsy ótkizedi. Osy jerde Aljırdiń óz tarıhynda tuńǵysh ret 1/8 fınalǵa shyqqanyn aıtý kerek. Olar álem chempıonatyna nebári úsh ret qana qatysqan. Birinshi ret 1982 jyly, sodan keıin 1986 jyly oınaǵan. Al sońǵy ret 2010 jyly baǵyn synap kórgen. Osy úsheýinde de Aljır toptyq týrnırden shyǵa almaǵan. Endi, mine, Aljır alǵash ret pleı-offqa joldama alyp otyr. Bul joldama da olarǵa ońaı kelmedi. Olar sońǵy kezdesýde Reseımen oınap, 1:1 esebimen teń tústi. Eger Aljır jeńilgende 1/8-ge Reseı shyǵatyn edi. Osy toptaǵy Belgııa men Koreıa arasynda ótken oıynda «qyzyl periler» 1:0 esebimen jeńiske jetti. Sóıtip, Koreıanyń jolyn bógep, olarǵa eshqandaı múmkindik qaldyrmady. Belgııanyń kelesi qarsylasy – AQSh quramasy. Al Argentına 1/8 fınalda Shveısarııamen kezdesedi. Osy oıynda jeńgen komanda Belgııa – AQSh matchy­nyń jeńimpazymen oınaıdy.  Sol sııaqty Germanııa – Aljır kezdesýiniń jeńimpazy shırek fınalda Fransııa – Nıgerııa matchynda jeńgen quramamen baq synasady. Al bıylǵy álem chempıonatynyń sensasııasy dep sanalatyn Kosta-Rıka komandasy 1/8 fınalda Grekııamen shırek fınaldyq joldamany sarapqa salady. Eger osy oıynda kosta-rıkalyqtar utsa, olar tuńǵysh ret ¼ fınalǵa shyǵatyn bolady. Biraq, Grekııa komandasyn da esepten shyǵara almaımyz. Qazir grekter súrinip, jyǵylyp júrse de kelesi aınalymǵa shyǵýdyń jolyn tabatyn joly bolǵysh komanda retinde kórinip júr. Bul oıynnyń jeńimpazy Gollandııa – Meksıka matchynda utqan komandamen kezdesedi. 1/8 fınaldyń oıyndary 28 maýsym men 2 shilde kúnderi ótse, shırek fınal 4-7 shilde kúnderi ótedi. Osylaısha chempıonattyń kelesi kezeńine Eýropanyń – 6, Ońtústik Amerıkanyń – 5, Ortalyq jáne Soltústik Amerıkanyń – 3, Afrıkanyń 2 komandasy shyqty. Al Azııadan birde-bir komanda joq. Dastan KENJALIN, «Egemen Qazaqstan».