Osyǵan baılanysty mádenı is-sharalar ótip jatyr. Aldymen Maǵjan óleńderin oqýdan poezııalyq chellendj bastaldy. Oǵan elimizdiń aıtýly aqyn-jazýshylary, memleket jáne qoǵam qaıratkerleri, oblys, aýdan ákimderine deıin qatysyp júr. Odan keıin jazba aqyndarynyń «Men ólmeımin, meniki de ólmeıdi» atty respýblıkalyq músháırasy ótti. Oǵan elimizdiń barlyq túkpirinen júzge jýyq aqyn qatysyp, sonyń 30-yna júlde berildi.
«Maǵjannyń marjan jyrlary» atty kelesi is-shara tipti ózgeshe boldy. Buǵan Soltústik Qazaqstan oblysynyń qala men aýdan ortalyqtary, aýyl mektepterinen 300 oqýshy qatysty. Bul jarystyń sharty boıynsha árbir oqýshy aqynnyń 30 óleńin jatqa aıtýy kerek. Jeńisten úmitkerlerdiń arasynan 72-si iriktelip alynyp, oblys sahnasyndaǵy fınalǵa qatysty. Jarystyń sharty boıynsha qatysýshy qorjynnan asyq alady. Al onda Maǵjan óleńiniń taqyryby berilgen, asyqty alǵan bala sony jatqa aıtyp berýi kerek. Mysaly, S.Shaımerdenov atyndaǵy qalalyq klassıkalyq gımnazııasynyń oqýshysy Mahabbat Smaıylova ózine túsken aqynnyń «Jan sózi» óleńin jańylmaı oqyp berdi jáne baǵa berýshi jandardyń aıtýdy usynǵan óleńderin ári qaraı ilip áketti. «Men Maǵjannyń 40 óleńin jatqa bilemin. Osyndaı saıystarǵa jyl saıyn qatysyp, júldeli oryndar alyp júrmin», deıdi Mahabbat.
Osynaý úlken-kishiniń bárine áserli bolǵan jarysty «Maǵjan jylyna» oraı uıymdastyrǵan Jarqyn Juparhan: «Bul – Qyzyljarda kem degende 300 bala Maǵjannyń 30 óleńin jatqa aıtady degen sóz. О́tken jazda jolym túsip Qarasazǵa barǵanda baıqadym, kóshede kez kelgen adamdy toqtatyp surasań, Muqaǵalıdyń kem degende bir óleńin jatqa biledi eken. Qyzyljarlyqtar da dál solaı, Maǵjannyń jyrlaryn júrek túkpirinde ustaýy kerek», dedi ol bizge.
Osylaısha, Maǵjannyń 130 jyldyǵy týǵan jerinde laıyqty atalyp jatyr, basqalardyń da odan qalmasyna senimdimiz.
Soltústik Qazaqstan oblysy
