Aǵanyń aldy –aq jaılaý

Týǵan baýyrdyń baýyrmaldyǵy jaıly ańyzdy árkimniń estýi bar shyǵar. Ertede, jaýgershilik zamanda beıqam otyrǵan aýyldy jaý shabady. Jaý jaqyndap kelip qaldy degende, qoly jetkenderi bir-bir atqa qonbaı ma. Aldy-artyna qaramaı bir paqyryń qashyp bara jatqanda aldynan balasy men týǵan baýyry qatar shyǵady. Sonda balasy ákesin ózimsinip, atqa qarǵyp minip, mingesip alady. Al dál aldynda turǵan baýyry bolsa jaýtańdaı: «Men jaýdyń qolynda qalyp baramyn», degendeı aıanyshty kózben qıyla qaraıdy. Qysyltaıańda baýyr men balany tańdaý synǵa túsedi. Baýyr degende et júregi eljiregen álgi paqyryń, artyna mingesken ulyna burylyp: «Atasy basqa, attan tús», dep balasyn túsirip, baýyryn alyp ketken eken deıdi. Sonda bul ańyz keıbir kezderi baladan da baýyr jaqyn bolatyn sátter ushyrasady degendi meńzese kerek. Osy retten kelgende Elbasymen birge týysyp, et júregi eljireıtin inisi, Nazarbaevtar áýletiniń qara ormany – qara shańyraqtyń ıesi Bolat ÁBIShULYNYŃ da baýyry jaıly aıtary bar... – Bóke, qudaıshylyǵyna kelsek, Prezıdenttiń týǵan baýyry bolý bólekshe baqyt qoı. Sondyqtan da Prezıdentke ómirdegi eń et jaqyn, eń tileýqor, eń janashyr adam ekenińizdi kesip aıtpaı-aq qoısaq ta, aqıqaty solaı. Jalpy, sizdiń uǵymyńyzda baýyrdy qalaı túsinesiz? – Týystyq baýyr degen úlken uǵym ǵoı. Durys uǵynǵan adamǵa onyń astarynda talaı dúnıe jatyr. Endi et jaqyn baýyrǵa qarama-qarsy «tas baýyr» degen uǵym da bar. Esenqul baýyrym aıtpaqshy: «Aǵa dep barsań aǵaǵa, Aǵanyń kóńili kókte júr. Ini dep barsań inige, ininiń baýyry kók temirler» de kezdesedi. Sondyqtan baýyrdy árkim ózinshe, óziniń aqyly jetken jerine deıin túsinedi dep bilemin. Shynymdy aıtsam, Aǵany keıde baýyrymdaı sezinsem, keıde balasyndaı sezinemin. О́ıtkeni, bir jaǵynan jas alshaqtyǵymyz bolsa (Aǵanyń on úsh jas úlkendigi bar), ekinshi jaǵynan úıdiń úlkeni, bas kóterer balasy bolǵandyqtan ata-anamyz dúnıeden ótkennen beri áke ornyndaǵy – ákemiz. Aǵa qaı jaǵynan bolsyn – baýyrlyq paryzyn da, aǵalyq mindetin de, perzenttik qaryzyn da adal ótep júrgen adam. Sebebi, aǵalyq, baýyr­l­yq, perzenttik ónege kórsete biledi. Ol kisi­men otyryp sóılesip, syrlasqan kezimde janym tazaryp shyǵady. Osyndaı baýyrymnyń bolǵa­nyna táýbeshilik jasap, Jaratqanǵa myń da bir alǵysymdy jaýdyryp júremin. Al teledıdardan kórgen saıyn et júregim eljirep turady. О́ıtkeni, Prezıdent bolýdyń, búkil bir eldiń júgin, amanatyn arqalap júrý, búgingideı kók kepterdiń moınyndaı qyltyldap turǵan mynandaı zamanda el basqarýdyń qandaı qıyn ekenin sezemin. Keıde teledıdardan kóziniń asty isinip turǵanyn kórgende júregim aýyrady. Bir otbasyn alyp júrýdiń ózi qıyn bolǵanda, bútindeı bir ult, bir memleket betine qarap otyrǵan adam­ǵa qanshalyqty kúsh túsetinin, men aıtpasam da jurttyń bári túsinedi dep bilemin. «Aǵa aldynda peıilińdi kórset, ini aldynda meıirińdi kórset» degen, Aǵa meniń peıilimdi biledi, sezedi dep oılaımyn. Aǵanyń aldy  – aq jaılaý degen ras. – Endeshe, Elbasyna laıyqty ini bolý ońaı emes deısiz ǵoı? – Maǵan osy saýaldy kóp qoıady. Árıne, birinshiden, mundaı Aǵa maǵan Jaratqannyń bergen syıy, baǵy. Ekinshiden, jaýapkershilik. Qolaısyzdyq týǵyzatyn jaǵdaılar da bar. Bir qıyn jeri, úlken kisiniń inisisiń ǵoı dep, qolym­da bılik turǵandaı aldyma jaǵdaı­laryn aıtyp kelýshiler kóp. Keıde aýyr qylmys jasaǵan balasyn túrmeden shyǵaryp ber dep, bolmasa «nesıege aqsha alyp edik, tóleı almaı jatyrmyz», «balamdy jumys­qa qoıyp ber» degendeı, neshe túrli jaǵ­daılaryn aıtady. «Adam óltirgen bala­­ńyzdy qalaı aqtaımyz, ólgen bala da bi­reýdiń balasy emes pe? Onyń ústine Ishki ister mınıstri emespin ǵoı» deseń, aıt­qandy túsinbeı, qarǵap-silep ketedi. Al shyn­dyǵynda, joq-jitik jaǵdaı aıtyp qınalyp kelgen adamdarǵa kómegimdi berý­ge tyrysamyn. Oılańyzshy, kelgen adam­nyń bárine kómektesý múmkin emes qoı. О́zińiz bilesiz, eshqandaı saıasatqa aralaspaımyn. Eshqandaı jaýapty qyzmette joqpyn. Shamalǵanda júrgizýshiden bas­tap mehanık, avtopark dırektorynyń orynbasary, Qaskeleńde nan zaýyty dırektorynyń orynbasary boldym. Qazir bıznespen aınalysamyn. Kózin tapqan adamǵa jalǵyz maǵan emes, bar­lyǵyna jol ashyq. Árıne, ár bıznes­tiń óziniń qıynshylyǵy, ony bastaýyn bastaǵanmen júrgizý bar degendeı... – Jaqsy jeńge de shesheniń ornyn almas­tyryp jatady emes pe... – Menińshe, anańnyń qolyna kelin bolyp túsip, ol kisiniń kózin kórgen adam – anańnyń ornyna júredi eken. Búginde Sara Alpysqyzy jeńgemiz emes, anamyzdyń ornynda. Keıde qaıny bolyp erkeleısiń, keıde kishi bolǵan soń aıtatyn keńesteri bolady. Sóıtip, jeńgeń anańnyń aıtqan aqyldaryna jaqyn­dap ketedi. Onyń ústine, jalpy er azamat­qa anadan keıin eń jaqyn adam áıeli ǵoı. Iаǵnı, Aǵańnyń tileýin tileıtin de jeńgeń. Sondyqtan jaqsy jeńgeni ana­men baılanystyrýǵa ábden bolady. Árıne, keıde renjýi múmkin. О́ıtkeni, keı­bir kezderi balasyndaı kórinemiz. Jeń­gem áýlettiń úlkeni bolǵan soń, bári­miz­diń abyroıymyzdy oılaıdy, tileýimizdi tileıdi. Svetlana jeńgemniń de jóni bólek. Satybaldy aǵamnyń tútinin tútetip, atyn da, otyn da óshirmeı, balalaryna jaqsy tárbıe berip, el aldynda atqa minetin azamattar etip shyǵarǵanyna dán razymyn. Ánıpa ápkemniń de Aǵa degende jany qalmaı turady. Biz ózi kóp emespiz ǵoı. Qazir Ánıpany Shamalǵanǵa, janyma kóshirip ákeldim. – Qazaqta kenje ul qarashańyraqta qalyp, sol áýlettiń otyn óshirmeı, tútinin túte­tip otyrady. Sondyqtan qara shańyraqta otyr­ǵan balanyń jasy kishi bolsa da, joly úlken. О́sken uıasy – qara shańyraqqa kelgende Nursultan Ábishuly ózin qalaı ustaıdy, qalaı sezinedi? Kóńil tolqýlary bola ma? – Aýylǵa jıi keledi dep aıta almaımyn. Jylyna eki-úsh ret kelip ketedi. Árıne, bir mınótke artqa burylýǵa ýaqyty joq, eldiń qamymen júrgen Memleket basshysynyń bir sát pende retinde óz úıi, óleń tósegine kelgendegi kóńil tolqýyn kórý men úshin bir ǵanıbet sát. Úlken úı bar balaǵa ortaq qoı. Ári árkimniń ózi týyp-ósken úıi ózine quttyhana meshit emes pe. Árıne, inisiniń úıine kelgende Prezıdent emes, baıaǵy birge ósken baýyr retinde ózin erkin sezinip, arqa-jarqa kúlip, bir rahattanyp demalady. Qara shańyraqqa kelmes buryn mindetti túrde ata-anamyzdyń, qaıtys bolǵan baýyrymyz Satybaldynyń basyna baryp, quran oqytyp, táý etip shyǵady. Baıqaımyn, Aǵanyń aýylǵa ańqasy ashylyp keledi. Aldymen aýlaǵa kire beristegi ósip turǵan, múmkin ózimen jasty da shyǵar, ákeı otyrǵyzǵan emen aǵashyn qushaqtap uzaq turady. Qazir ol emenge eki adamnyń qushaǵy ázer jetedi. Sol emendi qushaqtap turǵanda balalyq kúnderin, ata-anamyzdy esine túsiretin shyǵar. Maýqyn basqan soń aýlany aralap, úıge kiredi. «Mynaý inimniń úıi, osy shańyraqta týyp-óstim» dep ishteı marqaıatyn bolýy kerek, qashanda qasyna dostaryn, syılas inilerin ertip keledi. Úıge kelgen soń aýyldyń jaǵdaıyn, aǵaıyn-týystardyń, kórshi-qolańnyń jaǵdaıyn suraıdy. Dereý kórshi turatyn Ánıpany shaqyrtyp alady. О́zderińiz bilesizder, aǵa ázil-qaljyńǵa jany jaqyn adam, dastarqan basynda óte kóńildi otyrady. Sosyn basymyz qosylǵanda ata-anamyz, týystar jaıly estelik aıtyp, qyzyq oqıǵalardy eske túsirip, máre-sáre bolamyz. Ýaqyty bolǵanda dombyra aldyryp, qońyr daýysymen án salady. Aǵanyń balalyq shaǵy Úshqońyr jaılaýynda ótken ǵoı, retin taýyp bir ret bolsa da jaılaýǵa shyǵyp, aýnap-qýnap, atqa minip qaıtatyny da bar. Baıqaımyn, meni kórgen jerde balanyń kishisi bolyp, qara shańyraqta otyrǵan soń qashanda kóńilimdi aýlaýǵa tyrysady. Mundaı Aǵaǵa ne aıtasyń. Keıde aǵaıyndy úsheýmiz syrlasa qalǵanda: «Ánıpa, Bolat! Meniń tileýimdi tileıtin senderdeı baýyrdyń bolǵany qandaı jaqsy! Ata-anamnyń kózderisińder ǵoı?» dep aǵynan jaryla baýyrmaldyqtyń, týǵandyqtyń eń bıik qasıet ekenin osylaı jetkizetin. – Bóke, aǵadan keıin sizdiń Satybaldy degen baýyryńyz boldy. Baýyr týraly sóz bolǵan soń, marqum ol kisi jaıly sóz ete ketpesek bolmas... – Anamyz Áljan bir perzentke zar bolyp, áýlıelerdiń basyna túnep júrip Aǵany 1940 jyly 30 jasynda týǵan ǵoı. Odan keıin de bala turaqtamaı arasy uzap ketken soń, 1947 jyly dúnıege kelgen osy aǵam týǵanda kórshimizden terezeden satyp alyp, atyn Satybaldy qoıǵan. Ánıpa 1950 jylǵy, meni anam 43 jasynda 1953 jyly týyp, «endi bolady» dep esimimdi Bolat dep qoıǵan eken. О́zderińiz bilesizder, bizdiń arǵy atamyzdan batyrlyq úzilmegen, bı, sheshen bolǵan ǵoı. Babalarymyz eńsegeı boıly Esim hannyń týyn ustaǵan qolbasshy Qarasaı batyr, Qarasaıdyń uly Kóshek batyr, odan Nazarbaı bı taraıdy. Jaýyryny qaqpaqtaı, boıy bıik, iri deneli Satybaldy aǵamdy kórgender batyr babalaryna tartqan dep jatatyn. Marqum qaıtys bolǵanda tabytqa ázer syıyp jatty. Satybaldy aǵamnyń iriligine, boıshańdyǵyna balalary Qaırat pen Samat tartqan. Baýyrmaldyq jaıly sóz etip jatyrmyz ǵoı, aǵa Temirtaýda jumys istep júrgende Satybaldy aǵamdy qalanyń ómirin kórsin dep, qolyna alyp 8-shi synypty sonda oqytty. Odan keıin ákemizdiń kózi kórmeı qalǵan soń, jumys istep kishkentaı da bolsa úıge kómegin tıgizsin dep Uzynaǵashtaǵy SPTÝ-ǵa túsirdi. Áskerden kelgen soń 20 jasynda Svetlana jeńgemizge úılendi. Ákemiz de ázil-qaljyńǵa jaqyn adam edi ǵoı, balalarymen qaljyńdasyp otyratyn. Jańa aıttym ǵoı, ol kezde ákemiz janarynan aıyrylyp, bárin jobalap qana sezetin. Kópten kútken kelin túskende ǵoı, ákem qýanyp, Sveta jeńgemniń qolynan ustap, mańdaıynan súıip, aınalyp, tolǵanyp bolǵan soń: «Aınalaıyn, qyzym-aý, myna bizdiń Dáýge qaıdan tap bolǵansyń? Qolyń tipti náp-názik qoı, balam?» dep bárimizdi kúldirgeni bar. – Anańyzdy saǵynyp júrsiz be?.. – Saǵynǵanda qandaı. Kóńilimizde kóp ókinish bar. Anam nebári 67 jasyna qaraǵan shaǵynda aýyr naýqastan dúnıeden ozdy. Anamyzdy jeńeshe deýshi edik. О́ıtkeni, Aǵany ákemizdiń sheshesi Myrzabala apamyz baýyryna basyp, enshilep alǵan soń anamyzdy jeńeshe dep aıtqyzǵan ǵoı. Aǵa jeńeshe degen soń, bárimiz solaı atap kettik. Nemereleri «apa» dep Darıǵadan bastap aıtty. Anamnyń júreginiń keńdigi ǵoı, meni kishkene kezimde birge týǵan da emes, bala kórmeı zaryǵyp júrgen jamaǵaıyndarynyń baýyryna salyp berdi. О́ıtkeni, ózi de sol jaǵdaıdy basynan ótkerdi ǵoı. Oılanbaı bergeni, ári kóńiline medeý bolǵany – Mámbetbaı atam men Búbáı apamdy qoldaryna alyp, bir aýlada turdyq. Shamasy, balasynyń kóz aldynda júrip, ózi baıqap, baqylap otyratynyn ana júregi esepke alsa kerek. Atam men apam tegimdi ózderiniń atyna jazdyrýdy suraǵanda, anam Aǵammen aqyldassa: «Jeńeshe, ózimiz de kóp emespiz ǵoı. Bala bergenmen, famılııasyn bermeńiz» dep, qarsy bolǵan eken. Mámbetbaı atam men Búbáı apam betime eshkimdi qaratpaı ósirdi. Eki úıdiń arasynda sholjańdap óstim. Analyq meıiri ǵoı, sheshemiz ár baladan bir-bir nemeremdi baǵyp beremin dep otyratyn. Sol aıtqanyna jetti. Eń úlken nemeresi Darıǵa týǵanda, ol kisiler qatty qýanyp, dereý Qaraǵandyǵa ushyp baryp, Sara tátem ekeýin ákelip aldy. Qyrqynan shyqqan soń Sara tátem ıns­tı­týtta syrttaı oqıdy eken, sessııa­syna ketti de, sodan Darıǵany baýyryna basyp, bermeı bizdiń qolymyzda boldy. Anamyz ýádesinde turyp, Satybaldydan Qaıratty, Ánıpadan Elmıramyzdy, meniń tuńǵyshym Gúlmıramdy eń qıyn kishkene kezinde baǵyp berdi. Al Darıǵany úshinshi synypqa kóshkende aýyryp, kúshi kete bastaǵanyn sezip, ata-anasyna amanattap tapsyrdy. Bir aıta keterim, men Taldyqorǵan oblysy, Qaratal aýdany Birinshi Maı (qazirgi Kókpekti) aýylyna joldamamen baryp úsh jyl jumys istep qaıtqan Satybaldy aǵam men Sveta jeńgemniń qolynda eki jyl turdym. Sonda júrip búginde úsh balamnyń anasy, jubaıym Gúljanmen tanystym. Qazaqtyń jón-joralǵysymen quda túsýge Aǵa da bardy. Gúljanǵa bárimizdiń rıza bolatynymyz, anammen birge turǵan úsh jylda óziniń kelindik paryzyn adal atqardy. Aýyryp júrgen sońǵy kezderinde kún-tún demeı kútip, qas-qabaǵyna qarap, batasyn aldy. Gúljanǵa sol anamyzǵa jasaǵan qyzmeti úshin rahmet. Anam Aǵany basqa balalaryna qaraǵanda erekshe jaqsy kórdi. Bala­synyń qasynda bolýyn armandaǵan anamyz Sultanynyń Almatyǵa oralýyn saǵynyshpen kúte-kúte 1977 jyly ómirden ozdy. «Eldiń bárine Almatydan jumys tabylǵanda, meniń Sultanyma jumys tabylmaı Qaraǵandyda júr» dep jıi aıtyp otyratyn. «Meniń Sultanym jumys istep, aqshasyn jiberipti» dep, bolmasa gazetke aǵa týraly maqala shyqsa abysyn-ajyndaryn, kórshi-qolańdy jınap, etin asyp, «jýyp» beretin. Baýyr bolǵan soń saǵynamyz ǵoı, áıtpese, aǵamnyń azamat retinde, qaıratker retinde Arqa jerinde qalyptasqany anyq. Temirtaýdaǵy dom­nada quryshtaı shyńdalyp shyqqannyń arqasynda aǵam Prezıdent bola aldy dep oılaımyn. Jeńeshem mektepte júrgende: «Sultanym sabaqtan bas almaıtyn. Sıyrdyń aldynan shyq degende de, sabaǵyn oqyp otyryp alatyn. Osy balama oqý ótip kete me dep qoryqsam, senderdi oqyta almadym», dep keıýshi edi. «Ana sútimen bitpegen qasıet, tana sútimen bitpeıdi» degen, menińshe, el basqaratyn adamnyń minez-qulqy sol bala kezden paıda boldy ma deımin. Bizdiń otbasymyzda bar qasıetti sol kisige úıip-tógip bergen ǵoı. Aǵada barlyq qasıet bar: sheshendik, kósemdik, este saqtaý qabileti qandaı keremet. Men ózi kóp sóılemeıtinderdiń qatarynanmyn. Siz sýyrtpaqtap, jetelep otyrǵan soń, onyń ústine aǵaǵa degen kóńilimdi, júregimdi bildiretin ýaqyt jetti ǵoı dep sheshilip otyrmyn. Qazir men de paıǵambar jasyna jaqyndap qaldym. Baıqaǵanym, adamnyń ata-anaǵa degen saǵynyshy eshqashan basylmaıdy eken. Sonda ana men bala máńgilik pe deımin. О́ıtkeni, qandaı jaǵdaıda da – qýanǵanda da, basyńa is túskende de eń janashyr, adal tileýińdi tileıtin, shyn qýanatyn adamdy izdeıdi ekensiń. Mine, sol kezde anamdy oılaımyn. Sóıtem de, anasy bar adamdarǵa qyzyǵamyn. Maǵan aq jaýlyq salǵan apalardyń bári bir-birine uqsaıtyn sııaqty da, olardy kórsem-aq jeńeshemdi eske túsiredi. Bir túıgenim, ishinara bolmasa, kez kelgen perzent ata-ana aldyndaǵy paryzynan ýaqytynda qutyla almaıdy. Bizdiń de ókinishimiz kóp. Keıde otyryp: «Anamyzǵa eń bolmaǵanda endi bir on jyl ǵumyr bergende Sultanynyń Almatyǵa kelgenin, eldi basqarǵanyn kórip, qandaı perzent ósirgenine bir masaırap, Jaratqan Iesine rıza bolyp ómirden óter edi», dep te armandaımyz. – Búginde qaıyrymdylyq jasaýdy naý­qanǵa aınaldyryp, upaı jınaıtyndar, kómek­tesip júrmin dep jar salyp, arzan ataq jınaýshylar kezdesip jatady. Birde per­zenthanadaǵy jańa bosanǵan analarǵa kómek jasaımyz degen bir kásipker búkil gazet, telearnadan jýrnalısterdi jınady. Sondaǵy shaqyrǵanda bergeni – on áıelge balalardyń bir-bir pampersi... Bilýimshe, siz osy ýaqytqa deıin qanshama qaıyrymdylyq aksııasyn ótkizdińiz, qanshama óner adamdaryna demeýshilik kórsetip kelesiz. Synyptas, aýyldas, dos, aǵaıyn-týǵandaryńyzǵa kórsetken kómegińiz óz aldyna. «Egemen Qazaqstanǵa» da bes-alty jyl qatarynan ardagerler, zııaly qaýym ókilderine 200 danadan gazetke jazylýda qolushyńyzdy berdińiz. Jaqsylyqty aıǵaılap jasamaıtyndardyń «sortynan» ekenińizdi bilemiz... – «Úndemeı jasaǵan jaqsylyqtyń saýaby artyq» degen hadıs bar eken. «Oń qolyńnyń bergenin sol qolyń bilmesin» degen de qaǵıda bar. Menińshe, qaıyrymdylyq jasaýdy jarysqa salýdyń qajeti joq. Bergenińdi basyna uryp, elge aıtyp bergenniń ne qadiri bar. Kelgen qonaǵymyzǵa aýzymyzdan jyryp asymyzdy, astymyzdan túsip atymyzdy beretin qazaq emes pe edik. Jetimin jylatpaǵan, jesirin qańǵytpaǵan el emes pe edik. – Qazaqta «Eki toıyń qabat kelsin, eki dúnıeń abat bolsyn» degen sóz bar. Elbasynyń týǵan kúni men Astananyń kúni qatar kelip jatyr eken, ne aıtasyz? – Bala kezimizden anamyz 6 shildede: «Búgin Sul­tanymnyń týǵan kúni ǵoı. Jaryǵym, aman bolsa eken», dep aıtyp otyratyn. Aǵam Asta­nany tól perzentindeı kóredi. Astananyń kún saıyn sándenip, saltanattanyp kele jat­qanyna jurttyń bári kýá. Syrttaǵy el, keletin qaı deńgeıdegi qonaq bolsyn memlekettiń dáre­jesin, deńgeıin Astanasyna da qarap baǵa­lap jatady emes pe. Osy retten kelgende eýropalyq jańa úlgidegi barlyq jaǵy­nan oılastyrylyp, qarastyrylǵan HHI ǵasyrǵa laıyqty elorda bolyp tur. Astanalyqtarǵa ashyq aspan tileımin, nıeti jaqsy qonaqtar kelsin deımin. Al Aǵataıymnyń týǵan kúninde ol kisige syılyq jasaýǵa kelgende qınalamyn. О́ıtkeni, ol kiside bári bar bolýy kerek dep oılaımyn. Týǵan kúni bolmasa da Jaratqannan: «Pesheneme osyndaı baýyr bergen ekensiń, endi sonyń amandyǵyn bere gór, egemen elimizdiń baǵy baıandy bolýy úshin kúndiz-túni jarǵaq qulaǵy jastyqqa tımeı júrgen pendeńizge baılyqtyń tóresi – densaýlyq bere gór, abyroıyn asyra gór», dep ishteı tileımin. Aıttym ǵoı, men keıde oılaǵan oıymdy, tilegimdi sizder sııaqty kópshiliktiń ara­synda jetkize almaımyn dep. Sodan mynadaı amal oılap taptym. Osy oılarymdy, Aǵaǵa degen tilegimdi aqyn Shómishbaı Sarıevke aıtyp berip, «Aǵa» degen án jazdyrdym. Baryldaǵan daýysym bar, biraq «Aǵany» aıtqanda kóńilim bosap sala beredi. Sol ánniń ishinde Aǵaǵa degen tilegimniń bári aıtylǵan.   – Yńyldap bolsa da aıtyp kórseńiz... Qazaǵymda keń kósilgen dalam bar, Jebep júrer ákem jáne anam bar. Bárinen de Táńiri ózi syılaǵan, Alataýdaı arqa súıer Aǵam bar. Qaıyrmasy: Baýyrym-Aǵa, taǵdyryń bar bıikterde synalǵan, Táńirim ózi sol bıikke, sol bıikke shyǵarǵan. Aldymyzda Aǵa bola bildiń sen, Saǵan laıyq ini bolý bir arman. Eliń úshin jaýrap keıde tońdyń sen, Saǵan tilek tilep júrem jol júrsem. Alataýdaı arqa súıer qazaqtyń, Elin súıer el Aǵasy boldyń sen. Sáýlesin sen erte kórdiń tańnyń da, Ultyń úshin júz órtenip, jandyń da. Dostaryń kóp, dushpanyń da az emes, Alataýdaı Aǵa boldyń aldymda. Taýlar menen keń dala ǵoı keńisim, О́ziń salǵan dámnen kórdim jemisin. Alataýym arqa súıer, aman bol, Qazaq úshin, ultyń úshin, el úshin.   ... Iá, Aǵaǵa laıyqty ini bolý bir arman!.. – Ádemi áńgimeńizge, ánińizge de rahmet. Áńgimelesken Gúlzeınep SÁDIRQYZY, «Egemen Qazaqstan».