«KAZsport» arnasyna – 1 jyl

Jaqynda Astanada «KAZsport» telearnasynyń ashylǵanyna bir jyl tolýyna baılanysty merekelik shara ótti. Oǵan grek-rım kúresinen Olım­pıada jáne álem chempıony Jaqsylyq Úshkempirov, aty ańyzǵa aınalǵan gımnasshy, Olımpııa oıyndarynyń bes dúrkin chempıony Nellı Kım, Olımpıadanyń eki dúrkin jáne álemniń úsh dúrkin chempıony, Qazaqstannyń eńbek sińirgen sport sheberi Ilıa Ilın jáne basqa da tanymal sportshylar qatysyp, «KAZsport» telearnasyn «týǵan kúnimen» quttyqtady. Osy kúni «Qazaqstan» RTRK men Sport jáne deneshynyqtyrý isteri agenttigi arasynda yntymaqtastyq týraly memorandýmǵa qol qoıyldy. Qujatqa «Qazaqstan» RTRK atynan basqarma tóraıymy Nurjan Muhamedjanova, agenttik tarapynan vedomstvo tóraǵasynyń orynbasary Elsııar Qanaǵatov qol qoıdy. Endi memorandýmǵa sáıkes elimizdiń sporttyq ómiri jóninde habarlar taratý, sport túrleri men salamatty ómir saltyn keńinen nasıhattaý, telearnanyń teleónimderin arttyrý baǵytynda yntymaqtastyq baılanys ornatpaq. Osydan týra bir jyl buryn, 2013 jyldyń 1 shildesinde «Qa­zaq­stan» respýblıkalyq tele­ra­dıo­korporasııasynyń negi­zinde elimizde táýligine 21 saǵat habar taratatyn tuńǵysh «KAZsport» telearnasy jumys isteı bastady. Arnaıy mamandandyrylǵan telearna Elbasy N.Nazarbaevtyń tapsyrysy boıynsha quryldy. «KAZsport» – Eýropanyń «Eurosport», «Sport 1», «Sport plıýs» telearnalarymen teń dárejede habar taratatyn Ortalyq Azııada teńdesi joq sport telearnasy. Bir jyl ishinde «KAZsport» telearnasynyń kórermenderi tikeleı efırden sport túrlerinen 2000-ǵa jýyq translıasııalardy tamashalady. Shetelderdiń barlyq sport sharalarynda telearnanyń túsirilim toptary jumys istedi. 12 aı ishinde «KAZsport» aty ańyzǵa aınalǵan sport qahar­mandary, sport túrleri boıynsha komandalar jaıynda 36 derekti fılm túsirdi. «Gde vy, chempıony?» sıkly sheńberinde 87 baǵdarlama túsirilip, efırge berildi. Munyń barlyǵy kún saıyn efırge shyǵatyn jańalyqtar men arnaıy reportajdarmen tolyǵyp otyrdy. «KAZsport» sonymen qatar, álemdik tájirıbeni de engizýde. Alǵash ret otandyq teledıdar tarıhynda «KAZsport» telearnasynyń kommentatorlary oqıǵa ornynda – Brazılııada fýtboldan álem chempıonaty ótip jatqan stadıondarda jumys isteýde. Atalmysh tájirıbe bolashaqta da jalǵasyn tabady. Bıylǵy telemaýsymda telearna Anglııanyń premer-lıgasyn, Jazǵy Azııa oıyndaryn, jasóspirimder arasyndaǵy Olımpıadany, Almaty­da ótetin aýyr atletıkadan álem chempıonatyn jáne taǵy da basqa sport sharalaryn kórsetýdi josparlap otyr. «KAZsport» telearnasynyń týǵan kúnine oraı birneshe iri joba ázirlendi. Sonyń bireýi – aty ańyzǵa aınalǵan gımnasshy, Olımpııa oıyndarynyń bes dúrkin chempıony týraly túsirilgen «Nasha Nellı Kım» derekti fılmi. «KAZsport» telearnasy otandyq teledıdar tarıhynda alǵash bolyp ataqty chempıon týraly ómirbaıandyq fılm túsirdi. Arnaıy túsirilim toby AQSh-ta, onyń Shymkenttegi alǵashqy sport mektebi men Almaty qalasynda bolyp qaıtty. N.Kımniń qatysýymen derekti fılmniń tusaýkeseri 1 shilde kúni «Kinopark 7IMAX 3D» («Kerýen» saýda ortalyǵy) ótti. Dastan KENJALIN, «Egemen Qazaqstan».