Astanada ashylǵan ulttyq mýzeıge baǵaly jádigerler qoıylýda

ASTANA. 4 shilde. Qazaqstannyń ulttyq murajaıy kólemi jaǵynan álem boıynsha alǵashqy ondyqqa kiredi. Ortalyq kommýnıkasııalar qyzmetinde ótken brıfıngte Qazaqstan Respýblıkasy ulttyq murajaıynyń dırektory Darhan Myńbaı osylaı dedi. Bul týraly «QazAqparat» habarlady. D.Myńbaı: «Murajaıdyń erekshelikteri óte kóp. Onyń aýmaǵynyń ózi 74 myń sharshy metrdi quraıdy. Ermıtaj – 180 myń, Lývr – 160 myń, Metropolıten (AQSh) – 110 myń, Tretıakov galereıasy 70-75 myńdaı, Ońtústik Koreıa mýzeıiniki – 135 myń sharshy metr. Bizdiń murajaı jalpy kólemi jaǵynan álemde alǵashqy ondyqqa kiredi», – dedi. Mýzeı basshysynyń aıtýyna qaraǵanda, qazirgi tańda keshenniń ishin baǵaly eksponattarmen toltyrý jumystary júıeli túrde júrgizilýde. Mýzeı dırektory: «Bizdiń jeke kolleksıonerler osy ulttyq mýzeıdiń qoryna qundy zattardy tapsyryp jatyr. Oǵan úlken alǵysymyzdy bildiremiz. Ol tarıhı qundylyq bolyp sanalady. Sondyqtan ózderinde saqtalmaı qalýy múmkin baǵaly zattardy osy murajaıǵa kelip ótkizýde. Bul jaqsy úrdis jáne dástúr bolyp qalýy tıis», – dedi. Qazirgi tańda atalǵan mýzeı basshylyǵy Eýropanyń, Reseıdiń tanymal murajaılarymen baılanys ornatýda. Esterińizge sala keteıik, Qazaqstan Respýblıkasy ulttyq murajaıy osydan birer kún buryn Memleket basshysynyń qatysýymen ashylǵan bolatyn. Joldybaı Bazar. Derekkóz: «QazAqparat». Foto: astana.gov.kz.