Keńeske qatysýshylarmen kezdesti

Elbasy Nursultan Nazarbaev TMD elderi Qorǵanys mınıstrleri keńesiniń otyrysyna qatysýshylarmen kezdesti, dep habarlady Prezıdenttiń baspasóz qyzmeti. Kezdesý barysynda Memleket basshysy TMD elderiniń qorǵanys vedomstvolary basshylarynyń turaqty kezdesýleriniń mańyz­dylyǵyn atap ótti. – Bizdiń memleketterimizdiń birlesken tájirıbesi, adamı baılanystar, ortaq bilim berýdiń áskerı salany da qamtyǵan ortaq úrdisi, qarý-jaraqtyń biryńǵaı túrimen jabdyqtaý, sondaı-aq, syrtqy shekaralardy qorǵaýdyń ortaq keńistigi – osynyń bári tyǵyz baılanystardy budan ári de saqtaý qajettigin bildiredi, – dedi Qazaqstan Prezıdenti. Nursultan Nazarbaev turaqsyz geosaıası ahýal men álem­dik eko­nomıkanyń aýmaly-tók­peli jaǵ­­daıynda Qazaqstan kór­shi elder­men tyǵyz áskerı ynty­maqtas­tyq­qa múddeli ekenine nazar aýdardy. – Bizde UQShU aıasynda odaq­tastyq qarym-qatynastar, ózara qorǵaý, áýe shabýylyna qarsy ortaq syrtqy qorǵanys qalyptasty. Bizge osy qatynastardy jáne bir-birimizge degen senimdi saqtaý qajet, – dedi Memleket basshysy. Qazaqstan Prezıdenti qor­ǵa­nys jáne áskerı-tehnıkalyq yn­tymaqtastyqty budan ári damytýdyń mańyzdylyǵyn da aıtty. – Biz qazir ózge memleketter­men birlesip júzege asyrý úshin áskerı tehnıkanyń birqatar quramdastarynyń óndirisin Qazaqstanǵa ákelýdi oılastyrýdamyz. Osyǵan baılanysty biz birlesken kásiporyn qurýdy jan-jaqty qoldaımyz. Kórshi elderdiń ekonomıkalyq jáne ishki saıası ahýaldary Qazaqstanǵa áser etedi, sondyqtan biz kórshilerimizde, odaqtastarymyzda, sonyń ishinde Dostastyq aıasynda bári jaqsy bolýyna shynaıy tilektespiz, – dedi Nursultan Nazarbaev. Sońynda Memleket basshysy Keńeske qatysýshylarǵa tabysty ári jemisti jumys tiledi.