Toptyń basyn tórttik túzdi

Álem chempıonatyndaǵy ótken apta sońǵy kúnderiniń basty jańalyǵy – jartylaı fınalǵa shyqqan tórt komandanyń attary túgel belgili boldy. Ony jáne negizinen jurtshylyq boljam jasap otyrǵan quramalar qurady. Sonyń nátıjesinde Brazılııa – Germanııa, Gollandııa – Argentına juptary túzildi. Bulardyń aldyńǵylary búginge qaraǵan túni saǵat 2.00-de alańǵa shyqty. Shırek fınal sherýin 4 shilde kúni keshke Fransııa jáne Germanııa bas jasaqtary ashyp berdi. Buǵan deıingi matchtarda eki komanda da qorǵanys shebiniń myqtylyǵymen birge, pozısııalyq shabýyldardy júrgizýge beıim ekendikterimen kózge túsken bolatyn. Kúshteri shamalas sanalǵan olardyń bul joly tipti, saq qımyldap, bir-birleriniń múlt ketetin tustaryn barynsha ańdyp baǵýlary uzaqqa sozylýy da múmkin edi. Biraq bir standartty jaǵdaıdan soǵylǵan gol bul tym-tyrys teketirestiń jolyn birden kesip ketti. Osylaısha Tonı Kroostyń tastaǵan dobyn Mats Hýmmels baspen uryp túsirdi. Nemister ózderiniń budan arǵy basymdylyǵyn qorǵanysqa jumsaı otyryp, oıyndy ózderi úshin jeńisti notamen aıaqtaı bildi. Jankúıerler 5 shilde kúni Brazılııa – Kolýmbııa arasyndaǵy tartysty kezdesýdi tamashalady. Alań ıeleri oıyn basynan alǵa umtylyp, 7-mınýtta esep ashyp úlgerdi. Buryshtamadan berilgen dopty Tıago Sılva qaqpanyń alys buryshyna top etkizdi. Pentakampeondar budan keıin de tynym tapqan joq. Olar dopqa da kóbirek ıelik etti, qaqpaǵa da artyǵyraq urdy. Ekinshi taımda ǵana oıyn eptep teńese bastady. Al qarsy qaqpa mańynan kúdiktileý aıyp doby belgilengende, brazılııalyqtar esepti ulǵaıta túsedi, degen oı eshkimniń qaperine kirmese kerek. Nátıjesinde solaı bolyp shyqty. Osy jerden Davıd Lýıs urǵan dop týrnırdegi eń ádemi goldardyń birine aınaldy. Kolýmbııa quramasy jalǵyz qarymta dopty penaltıden túsirdi. Ol óz aıyp alańynda Karlos Bakkany shalyp qulatqan Jýlıo Sezardyń qımyly úshin berildi. Bul múmkindikti Hames Rodrıges qur jibermedi. Sóıtip, Brazılııa 2:1 esebimen jeńiske jetti. Kezdesýdiń taǵy atap óterlik jaǵy, Kolýmbııa fýtbolshylary óte dóreki oınady. Sonyń saldarynan brazılııalyq Neımar aýyr jaraqat alyp, qatardan shyǵyp qaldy. Osy kúnniń túninde Argentına men Belgııa kúsh synasty. Munda da kezdesý taǵdyryn jalǵyz dop sheshti. Munda da ol tez soǵyldy. Shabýylshy Lıonel Messı alańnyń qaq ortasynda turyp, sol qaptalda ashyq turǵan Esekel Lavessıdi taý­yp aldy. Osydan keıin Esekel dopty qaqpaǵa qaraı kólbeı jóneltti. Biraq jolaı qorǵaýshylar qaǵyp qaıtardy. Sodan keıin Anhel dı Marııa oıyn tizginin óz qolyna alyp, aıyp alańyna jaryp kirdi. Onyń urǵan dobyn taǵy qorǵaýshylar qaıtardy. Osydan keıin dopqa ıelik etken Messı ózin ańdyǵan eki oıynshydan sytylyp shyǵyp, dı Marııaǵa qaıta dop berdi. Onyń Pablo Sabaletaǵa pasyn qorǵaýshy qıyp jiberdi. Áıtkenmen, dop sol boıy Igýaınnyń aıaǵyna baryp sart etti. Gol! Shildeniń 6-syna qaraǵan túni Gollandııa jáne Kosta-Rıka quramalary kezdesti. Bul negizgi ýaqytta da, overtaımda da esep ashylmaı, kezdesý taǵdyry penaltıden sheshilgen jalǵyz match boldy. Aıtary joq, bul matchtyń qorytyndysynda joldan shyǵyp qalǵandarymen, Kosta-Rıka fýtbolshylary erledi. Olar týrnırdegi oıyndardyń negizgi jáne qosymsha ýaqyttarynda bir ret te jeńilmesten chempıonatty bitirdi. Kezdesý óziniń sońyna deıin jurtty ýysynda ustady. Buǵan oıynnyń bitkenin bildiretin ysqyryq estilgenshe, qarsylastardyń qaıtpaı shaıqasqandary sebep boldy. Matchtyń penaltıge ulasqaly turǵanyn sezgen Lýı van Gal dereý qaqpashylardy almas­tyrdy. Nátıjesinde tap osy Krýl kostarıkalyq eki oıynshynyń soqqylaryn qaıtaryp, óz komandasyna jeńis áperdi. Rýslan IGILIK.