Sharshy alańnyń shańyn qaǵady

Keshe Almatyda bokstan eresekter arasynda «Qazaqstan Respýblıkasy Prezıdentiniń Kýbogy» jolyndaǵy IV halyqaralyq týrnır bastaldy. Bıylǵy týrnırge qalyptasqan dástúr boıynsha álemniń úzdik boksshylary qatysyp, baq synasady. Olardyń arasynda Olımpıada, Azııa oıyndary, Panamerıka oıyndary, álem, Azııa, Eýropa chempıondary men júldegerleri bar. Esterińizge sala ketsek, 2006 jyly bizdiń boksshylarymyz osy týrnırde  8 altyn medal, 2010 jyly 6 altyn medal, 2012 jyly  7 altyn medalǵa ıe boldy. Endi bıylǵy dodaǵa da boksshylarymyz tas-túıin daıyn tur. Bokstan Qazaqstannyń ulttyq qurama koman­dasynyń bas jattyqtyrýshysy  Myrzaǵalı Aıtjanov týrnırge álem chempıony Birjan Jaqypov (49 kg), Ilııas Súleımenov (52 kg), álem chempıonatynyń qola júldegerleri Qaırat Eralıev (56 kg) pen Berik Ádirahmanov (60 kg), álem chempıondary Danııar Eleýsinov (69 kg) pen Jánibek Álimhanuly  (75 kg), Olım­pııa oıyndarynyń jáne álem chempıonatynyń fı­­nalısteri Ádilbek Nııazymbetov (81 kg) jáne An­ton Pınchýk (91 kg deıin), álem chempıonatynyń fı­na­­lısi, Olımpııa oıyndarynyń qola júldegeri Ivan Dychko  (91 kg joǵary) syndy atletterdiń qatysatynyn málimdedi. Osy básekede Qazaqstan, Ázerbaıjan, Irak, Kýba, Qyrǵyzstan, Mońǵolııa, Reseı, Tájikstan, Taıland, О́zbekstan, Ýkraına, Fılıppın elderiniń bylǵary qolǵap sheberleri kúsh synasady. Al jalpy, týrnırge 12 elden kelgen 104 boksshy atsalysady. Olardyń arasynda Olımpıada chempıony Robeısı Ramıres, álem chempıonatynyń fınalısi  Arıspoıdıýs Dıspaın (Kýba), álem chempıonatynyń birneshe dúrkin júldegeri  Jasýrbek Latıpov (О́zbekstan), Olımpııa oıyndarynyń jáne álem chempıonatynyń fınalısi  Týgsogt Nııambaııar (Mońǵolııa), álem chempıony Djavıd Chelebıev, Olımpııa oıyndarynyń jáne álem chempıonatynyń júldegeri Teımýr Mamedov (Ázerbaıjan) bar.