Máskeýde Qazaqstan Respýblıkasynyń Reseı Federasııasyndaǵy elshisi Marat Tájın Federasııa Keńesiniń Tóraǵasy janyndaǵy Integrasııa klýbynyń otyrysyna qatysty, dep habarlady QR SIM-iniń baspasóz qyzmeti. Otyrys taqyryby «Eýrazııalyq ekonomıkalyq odaq: jańa máseleler men múmkindikter» dep ataldy.
Federasııa Keńesiniń Tóraıymy Valentına Matvıenko otyrys qatysýshylaryna aıtqan quttyqtaý sózinde sońǵy jyldardyń eń mańyzdy oqıǵasy Dostastyqta Reseı, Belarýs jáne Qazaqstannan turatyn «ıntegrasııalyq ıadronyń» shyǵýy, onyń Keden odaǵy retinde qurylyp, Birtutas ekonomıkalyq keńistik retinde qalyptastyrylýy ekenin, sonyń nátıjesinde strategııalyq maqsat – Eýrazııalyq ekonomıkalyq odaqtyń paıda bolýy ekenin atap kórsetti.
«Jetekshi úshtiktiń ekonomıkalyq ózara yqpaldastyǵynyń qazirgi ahýaly týraly sóz qozǵaǵanda, ıntegrasııa – abstraktili joba emes, memleketterimiz ekonomıkalarynyń tıimdi damýynyń, azamattarymyzdyń ál-aýqaty jaqsarýynyń birden-bir múmkindigi ekenin eskerý mańyzdy. Integrasııaǵa qol jetkizý TMD-nyń basqa elderin jetekshi úshtikke qosylýǵa ıtermeleıtini anyq. Buǵan Armenııa men Qyrǵyzstan mysal bola alady. Sonymen qatar, TMD keńistiginen tys elder de bizdegi ıntegrasııalyq úderisterge qyzyǵýshylyq bildirip jatyr», – dedi V.Matvıenko.
M.Tájın óz sózinde Eýrazııalyq ekonomıkalyq odaq qurý týraly sharttyń ratıfıkasııasymen baılanysty tek zańdar deńgeıindegi ǵana emes, zańǵa qosymsha aktiler deńgeıindegi parlamenttik rásimderdiń mańyzy zor ekenin atap ótti. Qazaqstandyq dıplomat EAEO elderindegi ekonomıkalyq belsendilik tómendemeýi úshin múshe-memleketter ózara saýdany kóterý, ınvestısııalyq baǵyttardy yntalandyrý jáne bıznes-klımatty jaqsartý maqsatynda eleýli kúsh-jiger salýlary kerek ekenine de nazar aýdardy.
Klýb otyrysyna qatysýshylar bolyp jatqan ıntegrasııalyq úderisterge túsiniktemeler berip, onyń Eýrazııalyq ekonomıkalyq odaqqa múshe-memleketter azamattaryna paıdasy men tıimdiligin keńinen kórsetetin biryńǵaı ortaq medıa keńistik qurý máselesine de erekshe kóńil bóldi.