Kollajdy jasaǵan Qonysbaı ShEJIMBAI, «EQ»
Jasynan talapshyl, qoǵamdyq máselelerge beıjaı qaraı almaıtyn Baqytjan Tobaıaq kindik qany tamǵan Kerbulaq aýdanynyń Qurmetti azamaty ekenin bilemiz. «Men eki óńirdi tel emip ósken azamatpyn» deıtini bar onyń. Jetisý jaǵynda týyp, Almatyda oqyp eseıgenimen, túbi Qarqaraly topyraǵynan. «Baqytjannyń babasy baıaǵy Qunanbaıdy kórgen Janaq aqyn – zamanynda belgili bolǵan adam. Onyń Abaıdyń ákesi Qunanbaımen tustas, polıaktiń jıhankezi – Iаnýshkevıchpen kezdeskeni tarıhtan belgili» degen derekti ertede oqyǵanbyz. Keshtiń «Arqa men Jetisý aıbozy» atalý sebebi sondyqtan bolsa kerek.
Baqytjan Tobaıaq mamandyǵy boıynsha ınjener bolǵanymen, halyqqa aqyndyǵy men jýrnalıstigi jaqyn. Q.Sátbaev, Á.Marǵulan, E.Bóketov, Sh.Shókın, Sh.Esenov, A.Mashanı týraly jazbalaryn kóziqaraqty el biledi. Aqyndyǵy óz aldyna bir tóbe. Ol jarty ǵasyr jurtymen birge soqqan júrek bary men nárin halqynyń ıgiligine aınaldyrý jolynda az eńbektenbegen. Kesh tizginin ustaǵan Jumamurat Shámshiniń aıtýynsha, 1953 jyly týǵan qalamger osy ýaqytqa deıin 53 kitap shyǵarypty. Mektepti altyn medalmen bitirgenin, basqa da marapattaryn aıtpaǵanda. Qazaq baspasózinde júrip rýhanııat pen mádenıetke sińirgen eńbegi bárinen asyp ketetindeı kórinedi.
Aqynnyń toıy, mereıli jasyna oraı júrekjardy lebizder aıtylyp, jan-jaqtan quttyqtaýlar men jyly lepester jetip jatty. Bireýlerdiń ózi jetip, bireýlerdiń quttyqtaý sózi jetip, kesh ıesiniń mereıin asyryp-aq tastady. Astana qalasy ákiminiń, Jetisý oblysy ákiminiń quttyqtaý hattary, Qazaqstan Jazýshylar odaǵynyń jyly lepesi, taǵy basqa mártebeli oryndardyń alǵysy men qurmeti birinen soń biri oqylyp jatty. Solardyń arasyndaǵy ataýly qurmettiń biri – «Qazaqstannyń qurmetti jýrnalısi» tósbelgisin Qazaqstan Jýrnalıster odaǵy Astana fılıalynyń tóraǵasy Sharhan Qazyǵul tabystady. Elorda bıler keńesi qoǵamdyq birlestiginiń tóraǵasy Ánýarbek Eraly da qurmet kórsetip, quttyqtaý haty men jón-joralǵy jasady.
Burnaǵy kúnderi bul kisi týraly aqyn Serik Turǵynbekulynyń materıalyn oqyǵanbyz. Inisi týraly az tolǵanbapty aqyn. Osy joly keshine jınalǵan jazýshylar Qýanysh Jıenbaı, Jádı Shákenuly, Sádibek Túgel, ekonomıka ǵylymdarynyń doktory, professor Saılaý Batyrshauly bastaǵan tulǵalar da aqynnyń baǵasyn asyrdy. Sádibek Túgel «Uly dala qyrandary» respýblıkalyq qoǵamdyq mádenı-áleýmettik birlestik atynan «Erekshe tulǵa» medalin kesh ıesiniń óńirine taqty. Qalamgerdiń aıtýynsha, «Baqytjan Tobaıaqtyń aqyndyǵy men qalamgerligi óz aldyna, qoǵamdyq jumystarda da belsendi. Kez kelgen jaǵdaıǵa beıjaı qaraı almaıdy. «Araına, halqym, araına» dep uran kótere bilgen azamat».
Qazaqstan Jazýshylar odaǵynyń múshesi Jádı Shákenuly zamandasynyń shyǵarmashylyq tulǵasyn joǵary baǵalady.
Baqytjan Oshaqbaıuly aǵamyz qazaq ádebıetinde ózindik qoltańba qalyptastyryp, óz ornyn alǵan qalamger. Keleshek urpaqqa áli de bolsa bereri mol. Osy kúnge deıin jemisti qyzmet atqaryp kele jatqany sonyń belgisi. Jazǵan óleńderi, ánge aınalǵan sózderi bolashaq urpaq rýhyna qyzmet etedi dep senemiz. Ádebı keshke qatysqan oqyrmandar men turǵylastarynyń belsendiligi bizdiń bul oıymyzdy qýattaı túsedi. «Bataly qul arymas» degendeı, eldiń alǵysy men qurmetin ıelenýimen-aq, el úmitiniń arqasynda qazaq qalamgeri retinde esimi altyn áriptermen jazyla bermekshi», dedi ol.
«Sulýlyqqa shomylǵan óleńderim – Tań boıaýyn, Kún nuryn simiredi» degen aqyn júreginiń sáýleli boıaýy oqyrmanyn jaqsylyqqa bastaıdy dep senemiz.
