Myqtyny sharshy alań anyqtaıdy

Almatyda bokstan eresekter arasynda ótip jatqan «Qazaqstan Respýblıkasy Prezıdentiniń kýbogy» IV halyqaralyq týrnırinde 10 qazaqstandyq boksshynyń altaýy kelesi aınalymǵa shyqty. Týrnırdiń birinshi kúni tórt boksshymyz qarsylastaryna ese jiberip aldy. Eń jeńil, ıaǵnı 49 kg salmaqta Azııa chempıony Temirtas Júsipov, Ádilet Qurmetov (52 kg), Erlan Támemov (52 kg) pen Almasbek Orynǵalıev birinshi aınalymda jeńilip qaldy. Al basqa boksshylarymyz Jomart Erjan (49 kg) mońǵol Gangarada Ganerdennen, Ilııas Súleımenov (52 kg) tájik Zaınýddın Hodjamkýlovtan basym tústi. Sol sııaqty Berik Ábdirahmanov (60 kg) Qyrǵyzstan chempıony Akjol Sýılambek ýýlýny, Zákir Safıýllın (60 kg) ázerbaıjan Arız Ibragımovty utty. Komanda kapıtany Danııar Eleýsinov (69 kg) pen reseılik Dmıtrıı Mýratovtyń jekpe-jegi óte tartysty ótti. Birinshi raýndta bizdiń boksshymyz nokdaýnda da boldy. Alaıda, sońǵy eki raýndta Danııar ózin tez jınap, reseılik boksshyny sabap tastady. Bul kezdesý 3:0 esebimen Eleýsinovtiń basymdyǵymen aıaqtaldy. 81 kg salmaq dárejesinde qolǵap túıistirgen Ádilbek Nııazymbetov te reseılik qarsylasyn qýyp júrip sabady dese bolady. Ol da Evgenıı Voronovty 3:0 esebimen utty. Keshe Qazaqstan quramasynan sharshy alańǵa Erjan Ordabaev (56 kg), Berik Ábdirahmanov, Zákir Safıýllın men Darhan Jumsaqbaev (60 kg), Almasbek Álibekov, 2011 jylǵy Azııa chempıony Aıdar Ámirzaqov pen Aslanbek Shymbergenov (64 kg), Azııa chempıony Anton Pınchýk, Askar Abdýllaev pen Alekseı Sevostıanov (91 kg-dan joǵary) shyqty. Olar  reseılik Zınat Jandybaev, Dmıtrıı Chernıak (Ýkraına), Otgondalaı (Mońǵolııa), Charlı Saýrez (Fılıppın), Ivan Dancha (Ýkraına), Sahm Karrar (Irak), Edýard Hýsaınov (Reseı), Iаrgal Otonıargal (Mońǵolııa), Sergeı Radchenko (Ýkraına) men Kordova Herıhpen (Kýba) qolǵap túıistirdi. Bul týrnır Halyqaralyq boks qaýymdystyǵynyń qamqorlyǵy aıasynda ótip jatyr. Qazaqstan  Boks federasııasynyń vıse-prezıdenti Serik Qonaqbaevtyń aıtýynsha, bolashaqta «Qazaqstan Respýblıkasy Prezıdentiniń kýbogy» týrnırin AIBA-nyń «A» synypty týrnırler kúntizbesine engizý kózdelip otyr. Eger týrnır «A» synypqa engizilse, onda oǵan bolashaqta 20-dan astam elderdiń boksshylary qatysa alady. Al ázirge oǵan álemniń 12 elinen 106 boksshy qatysýda. Bıylǵy týrnırdiń júlde qoryna kelsek, onyń jeńimpazdaryna 4 000 dollardan tabys etiledi. Ekinshi oryn alǵan júldegerler 2000 dollardan alsa, qola júldegerlerge 1000 dollardan beriledi. S.Qonaqbaevtyń aıtýynsha, bizdiń boksshylardyń osy týrnırde kem degende 5 altyn medaldi jeńip alýǵa múmkindikteri bar. О́ıtkeni, otandastarymyz týrnırge  úsh qurammen qatysýda. Olardyń daıyndyǵy da jaqsy. – Bıylǵy jarysqa Qazaqstan qurama komandasynyń úsh quramy da qatysýda. Ondaǵy maqsat – komandanyń aldaǵy qyrkúıek aıynda Ońtústik Koreıanyń Inchhon qalasynda ótetin Azııa oıyndaryna daıyndyǵyn baıqaý. Sodan keıin boksshylarymyz Túrkııanyń Antalıa qalasyna baryp, eki apta demalyp qaıtady. Al 2015 jyldyń tamyz aıynda naǵyz daıyndyq bas­talady. Osy kezden bastap boks­shylarymyz Olımpıadaǵa joldama beretin álem chempıonatyna qatysýǵa daıyndalady, – deıdi S.Qonaqbaev. Dastan KENJALIN,                   «Egemen Qazaqstan».