Sýretti túsirgen Erlan OMAR, «EQ»
«Baılyq – baılyq emes, birlik – baılyq» degen ustanymdy tý kótergen halqymyz táýelsizdikke qol jetkizgen kúnnen bastap ultaralyq jáne dinaralyq tatýlyq pen toleranttylyqty el damýynyń basty jelkeni qyldy. Kelisim joq jerde keleshek, birlik joq jerde bolashaq bolmaıtynyn uǵynǵan jurt úshin budan ózge jol da, baǵyt ta joq edi. Qonaqjaı qazaq jerin mekendegen árbir ult óziniń tili men dinin, mádenıeti men dástúrin erkin ustanyp, zaman aǵymyna saı damytýǵa alǵashqy kúnnen múmkindik aldy.
Kúni keshe 1 mamyr merekesi qarsańynda Qazaqstan halqy Assambleıasynyń «Ádiletti Qazaqstan: birlik, turaqtylyq, damý» degen ataýmen ótken HHHII sessııasynda Memleket basshysy Qasym-Jomart Toqaev elimizdiń yntymaq pen kelisimniń arqasynda jetken tabystary men beıbitshiligin taǵy bir shegelep aıtty.
«Biz bárimiz – bir otbasymyz. Bul – artyq aıtqandyq emes. Bul – bizdiń shynaıy bolmysymyz», degen Memleket basshysy el halqynyń birligin arttyryp, aýyzbirshiligin nyǵaıtatyn faktorlardyń biri – memlekettik til ekenin de taǵy bir eske saldy.
«Barlyq azamattyń memlekettik tildi meńgerý máselesi saıasatymyzdyń strategııalyq baǵyty bolyp qala beredi. Qazaq tili – azamattyq ıntegrasııanyń tıimdi quraly, mádenı-rýhanı tutastyqtyń jarqyn kórinisi. Memlekettik tildi, ásirese ana tilin, ıaǵnı qazaq tilin bilý – qandaı da bir azamattyń mádenı óresi, azamattyq jaýapkershiligi qanshalyqty bıik ekenin bildiredi. Sondaı-aq qanshalyqty patrıot ekenin kórsetedi», dep atap kórsetti Prezıdent.
Búginde Qazaq elin álem jurtshylyǵy «beıbitshilik besigi» retinde tanıtyny beseneden belgili. Bizdiń mindetimiz – osy tatýlyǵymyzdyń tunyǵyn laılamaı, turaqtylyǵyn buzbaı, odan ári nyǵaıtý, birligimizdi arttyra berý. 1 mamyr sekildi eldik mańyzy bar merekelerdiń artyqshylyǵy men qundylyǵy osyndaıda kórinse kerek.
