Tez jınalmaǵan ónim saǵat sanap kemı beredi

Osy aptada jambyldyq sharýalar eginge oraq saldy. Bıyl Jambyl oblysy boıynsha 237 myń gektar jerge dán sebildi. Iаǵnı, ótken jylmen salystyrǵanda 14 myń gektar jerge artyq egin egildi. Ony jınap alý úshin 20 myń tonnadaı janar-jaǵarmaı qajet. Áıtse de, bıyl Jambyl jerinde kóktemniń kesh shyǵyp, mamyr aıynyń sońyna deıin yzǵardyń ketpeýi eginniń bitik ósýine keri áser etken sııaqty. Áıteýir, bıylǵy eginniń shyǵymy tómen. Osy óńirdegi eń irgeli sharýa­­shylyqtardyń biri – Jam­byl aýdanyndaǵy «Pıoner» sharýa qojalyǵy bıyl 600 gektar­daı jerge arpa, bıdaı sepken eken. Kóktemde azdap jaýyn jaý­ǵanymen úzdiksiz soqqan ańyzyq jel jerdiń ańqasyn keptirip ji­beripti. Tamyryna ylǵal jetpegen egin óspeı qalǵan. Sodan sharýa­shylyq gektarynan 9-10 sentnerden ǵana astyq jınap jatyr. «Jaý jaǵadan alǵanda bóri etek­ten tartady» degen, jambyl­dyq dıqandardy eginniń tómen túsimi eseńgiretip otyrǵanda jeńil­detilgen baǵadaǵy  janarmaı­dyń jetispeýi taǵy da jaǵa­dan alýda. Árıne, óńir­degi iri sharýashylyqtar qol­daǵy qarajatyn paıdalanyp, egin oraǵyn ýaqtyly bastap jiberdi. Al, qory joqtary amal joq­tyqtan, joǵarydan keletin jeńildikti kútip júr. Áıteýir, aýa raıynyń qolaısyzdyǵy eginnen túsetin ónimdi azaıtyp, dıqannyń nesibesin ortaıtyp tastaǵaly tur. Sharýashylyq basshylarynyń aıtýyna qaraǵanda orta eseppen egistiktiń ár gektarynan bar bolǵany 8 sentnerden ǵana ónim jınalýda. Osydan keıin bıyl qambaǵa astyq jyldaǵydan eki esedeı az quıylatyn sekildi. – Bıylǵy kóktem salqyn, jaz ystyq boldy. Bizdiń sharýashylyq aǵyn sýdyń aıaq jaǵynda orna­lasqan. Sý jaqsy kelmeıdi. Sýar­maly jerdiń ózinen osyndaı tómen ónim alyp jatyrmyz, – deıdi bul jóninde «Pıoner» sharýa qojalyǵynyń tóraǵasy Alpysbaı Jumahanov. Al, «Sháýshen» sharýa qojalyǵynyń brıgadıri Saǵadı Balǵaev arzandatylǵan janar-jaǵarmaıǵa kúni buryn tapsyrys berip qoıǵanymen áli kúnge qol jetkize almaı kele jatqanyn aıtyp ashynady. Búginge deıin oblys sharýashylyqtaryna qajetti 20 myń tonnadaı janarmaıdyń 260 tonnasy ǵana berilipti. Jambyl oblystyq aýyl sharýashylyǵy basqarmasy basshysynyń orynbasary Zııathan О́mirálıev bul kemshilikke ortadaǵy deldaldar kináli dep esepteıdi. «Munaı zaýytyndaǵy baǵaǵa baılanysty janarmaı jetkizý máselesi sál keshigip otyr. Bizdiń operatorlar zaýyttan ónimdi ýaqytynda ala almaýda», deıdi basqarma bas­shysynyń orynbasary. Astyq jınaý erekshe jına­qy­lyqty, uıymshyldyqty, bilgir­likti kerek etedi. Tez jınalmaǵan ónim saǵat sanap kemı beredi. Torǵaı jeıdi. Jel qıyp túsiredi. Qatty pisip ketkendikten orǵan kezde tógiledi. Mal aralaıdy, áıteýir jaýy kóp. Jambyl oblysynyń ákimi Kárim Kókirekbaev qaıbir kúngi jıynda pisken egindi ýaq­tyly oryp, bosqa ysyrap etpeýdi qatań talap etti. Shynynda bul naýqan osy salanyń jaýapty basshylaryna úlken syn bolǵaly tur. Oralhan DÁÝIT, «Egemen Qazaqstan». Jambyl oblysy.