Qatysý aıasy keńeıip keledi

Indýstrııa jáne jańa tehnologııalar mınıstrliginiń qoldaýymen jyl saıyn ótkiziletin «NIFS50K» respýblıkalyq bıznes-josparlar baıqaýy qatysýshylardyń úlken qyzyǵýshylyǵyn týdyryp júr. Ony oǵan joldanatyn ótinimder sanynan ańǵarýǵa bolady. Tek byltyrdyń ózinde 376 adam qatysýǵa tilek bildirgen. Jas ǵalymdar men talantty óner­­tapqyshtar, bıznes salasyna endi aralasqan kásipkerler usynǵan jobalardyń júzege asýyna, áleýmettik mańyzy bar bas­tamalardy qoldaýǵa, olardy ázir­leýshilerdi bıznes-josparlaýǵa oqytýǵa múmkindik beretin konkýrs aıasyndaǵy «Innovasııalyq avtobýstyń» alǵashqy sapary Qyzyljar óńirinen bastaldy. Quramynda Tehnologııalyq damý jónindegi ulttyq agenttiktiń ókilderi men sarapshylary bar shyǵarmashylyq top S.Muqanov atyndaǵy ámbebep kitaphanada jergilikti shaǵyn jáne orta bıznes, úkimettik emes uıym jetek­­shi­lerimen, ınnovasııalyq joba­lar avtorlarymen kezdesip, sapar­dyń mán-maqsatyn túsindir­di. Oblys ákiminiń orynbasary Erlan Áýkenov óz sózinde jas­tardyń izdenisi men belsendiligin arttyrý maqsatymen uıymdas­ty­rylyp otyrǵan baıqaýdyń jańa­shyldyǵyn atap ótip, bıyl da kóptegen joba usyny­lyp otyrǵanyn jetkizdi. «Tehno­logııalyq damý jónindegi ulttyq agenttik» AQ dırektory Artem Vozjaev óńirlerde iriktelgen konkýrsanttar Astanada ótetin baıqaýdyń jartylaı aınalymyna joldama alatynyn, júldeli oryndar úshin saıysqa túsý múmkindigine ıe bolatynyn atap kórsetti. Baıqaý jeńimpazy 7,5 mıllıon teńge júldeni qanjyǵaǵa baılasa, júldegerler de grant ıelenedi. О́tken jyly bas júl­deni Taldyqorǵan qalasynyń tur­ǵyny, «Aımaqtardaǵy sý kóter­gish qural» jobasynyń avtory Myrzahmet Tóleev jeńip alǵan. Onyń ónertapqyshtyǵy elektr energııasyn tutynbaı-aq ózen jaǵalaýyndaǵy aımaqtardy sýarýǵa arnalǵan. 2,5 mıllıon teńge qarjylaı syılyqty alǵan aqtóbelik Nurlan Janbýrın úıdi shań men tozańnan, tútinnen, masa-shirkeıden qorǵaıtyn qara­paıym aýa tazalaý júıesin oılap tapqan. Almatylyq Maksım Podlesnyhtyń «Aldyńǵy jeńil modýl negizinde jaıaý júrginshini qorǵaý qurylǵysy» jobasy da sarapshylar tarapynan joǵary baǵalanǵan. Soltústikqazaqstandyq óner­tap­qyshtar sarapshylar nazaryna 30-ǵa jýyq joba usynyp, olardyń arasynda M. Qozybaev atyndaǵy Soltústik Qazaqstan memlekettik ýnıversıtetiniń ókilderi óte-móte belsendilik kórsetti. Kolledj ustazy Alekseı Mıhaılov ázirle­gen «Aqyldy úıler» jobasy jınalǵandar kóńilinen shyqty. Sol sııaqty Petropavl gýmanıtarlyq kol­ledji­niń stýdenti Nurlan Tur­synov daıyndap ákelgen «Bola­shaqtyń kompıýteri» jobasy kópqyrly qyzmet kórsetý erek­sheligimen tańǵaldyrdy. Baıqaý sheńberinde ınno­va­sııalyq jáne kásipkerlik sheber­liktiń qyr-syryna úıretetin trenıngter ótkizilip, túrli keńester berildi. О́mir ESQALI, «Egemen Qazaqstan». Soltústik Qazaqstan oblysy.