Fýtbol. Premer-lıga: «Aqtóbe» jeńiske jetti

ASTANA. 11 shilde. Búgin Qazaqstan chempıonatynyń 20 týrynyń oıyndary bastaldy. Birinshi bolyp alańǵa shyqqan «Aqtóbe» komandasy Qostanaıdyń «Tobylyn» 3:1 etip súrindirdi. Bul týraly egemen.kz habarlady. Kezdesý Aqtóbe qalasynda ótti. Onyń 5-mınýtynda qonaqtar alǵa shyqty. Esepti qostanaılyqtar sapyndaǵy avstrııalyq jartylaı qorǵaýshy Tomash Shımkovıch ashty. Al alań ıeleri tek taımnyń sońynda ǵana esepti teńestirýge qol jetkizdi. Onda Markos Pızellı urǵan aıyp dobyn jaqsy paıdalanǵan Iýrıı Logvınenko ony basymen uryp, qaqpaǵa kirgizdi. Oıynnyń 58-mınýtynda Alekseı Antonov alystan uryp, «Aqtóbeni» alǵa shyǵardy. Arada 4 mınýt ótkende Markos Pızellıdiń bergen buryshtamasynan keıin ushyp kelgen dopty Igor Zenkovıch basymen qaǵyp, torǵa jóneltti. Aıtýymyz kerek, «Qaıratpen» oıynda 7 gol jiberip qoıǵan Andreı Sıdelnıkovtiń ornyna búgin qaqpany Almat Bekbaev qorǵady. Bul jeńis «Aqtóbeni» qaıtadan týrnır kestesiniń birinshi ornyna shyǵardy. Bul oıynda basshylyq tizginin Andreı Mıroshnıchenko ustaǵan Qazaqstannyń ótken jylǵy chempıonynda qazir 39 upaı bar. Ol osy týrda «Shahtermen» oınaıtyn «Qaırattan» 3 upaı alda tur. Eske sala keteıik, «Aqtóbe» fýtbol klýby 10 shilde kúni bas jattyqtyrýshy laýazymyna Vladımır Gazzaevtyń taǵaıyndalǵany týraly habarlama taratyp edi. 34 jasar mamanmen kelisim-shart bir jarym jylǵa jasalǵan. Búgin sondaı-aq «Taraz» - «Ertis» jáne «Jetisý» - «Ordabasy» komandalary da kezdesti. Al erteń «Spartak» — «Astana», «Atyraý» — «Qaısar», «Shahter» — «Qaırat» komandalary ózara ushyrasady. Damır Qojamqul. Derekkóz: egemen.kz. Foto: vesti.kz.