«Shahter», «Astana» jáne «Qaırat»

Eýropa lıgasynyń ekinshi raýndyna ótti Shildeniń 10-y kúni túnde Qazaqstannyń úsh komandasy Eýropa lıgasy irikteý týrnıri birinshi raýndynyń ekinshi kezdesýin ótkizdi. Olardyń qorytyndysynda aıtylyp otyrǵan Qaraǵandynyń «Shahteri», Astananyń «Astanasy» jáne Almatynyń «Qaıraty» kelesi kezeńge ótti. Qaraǵandyda jergilikti «Shahter» Arme­nııa­nyń Gıýmrı qalasynyń «Shırak» komandasyn qabyldady. Qarsylastardyń budan bir apta buryn armıan jerinde oınalǵan birinshi kezdesýinde qazaqstandyqtar 2:1 esebimen utyp qaıtqan edi. Al bul joly olar armenııalyqtardy 4:0 esebimen oısyrata utty. Esep matchtyń 12-mınýtynda ashyldy. Alań ıeleriniń komanda kapıtany Andreı Fınonchenko sol qaptaldan Ulan Qonysbaev bergen dopty qaqpaǵa qaraı urdy. Ol qonaqtardyń qaqpashysynan keri qaıtyp, bir qorǵaýshysyna tıip, qaıtadan qaqpaǵa qaraı ushty da, jibek torǵa baryp top etti. Al 26-mınýtta Ulannyń ózi qaptaldan berilgen dopty basymen uryp, qaqpaǵa túsirdi. Kenshiler munymen de toqtalǵan joq. Olar úziliske deıin taǵy bir gol salyp, esepti 3:0-ge jetkizdi. Ony komandanyń debıýtanty Nıkola Pokrıvach óz esebine jazdy. Ekinshi taım bastalǵannan keıin qaraǵandylyqtar oıynnyń aqyrǵy núktesin qoıdy. Ony 49-mınýtta Andreı Fınonchenko qaqpaǵa jóneltti. Endi ekinshi kvalıfıkasııalyq raýndta «Shahter» Lıýksembýrgtiń «Dıfferdanj» jáne Klaıpedanyń «Atlantas» (Lıtva) komandalarynyń jeńgenimen oınaıdy. Osynyń sońyn ala «Astana-Arenada» jergilikti «Astana» men Erevannyń «Pıýnık» komandalary arasyndaǵy oıyn aıaqtaldy. Ol 2:0 esebimen alań ıeleriniń paıdasyna sheshildi. Bul qarsylastardyń 3 shilde kúni Armenııa astanasynda ótken birinshi kezdesýinde Qazaqstan fýtbolshylary 4:1 etip utyp qaıtqan edi. Astanalyqtar esepti 13-mınýtta ashty. Ony Baýyrjan Jolshıev soqty. Al ekinshi gol 80-mınýtta tústi. Ol Dmıtrıı Shomkonyń kúshimen salyndy. Bulardyń báriniń sońynan Almatynyń «Qaı­raty» Albanııanyń astanasy – Tırana qala­synda jergilikti «Kýkesı» komandasy­men kezdesti. Alań ıeleri birinshi mınýt­­tan Al­matydaǵy oıynnyń eń sońǵy mınýtyn­da ji­berip alǵan goldarynyń esesin qaı­tarý­ǵa umtyldy. Bul ýaqyttarda «Qaırat» ta alań­syz qorǵanysta qalǵan joq. Onyń sol tustaǵy eki qar­sy shabýyly gol ákele jazdady. Aıta­lyq, Baýyrjan Islamhannyń soqqysy qaqpa ba­ǵa­nynan qaıtsa, «Aqtóbemen» oıynda het-trı­k jasaǵan komanda debıýtanty Jerar Goý­dyń urǵan dobyn golkıper qaǵyp aldy. Tutas­taı alǵanda, birinshi taımdaǵy oıyn alma-kezek shabýylmen órnekteldi. Sonyń barysynda qaqpashy Dmıtrıı Homıch birneshe ret almatylyqtar qaqpasyn aman saqtap qaldy. Ekinshi taım taǵy da «Kýkesıdiń» shabýy­ly­­men bastaldy. О́z kezeginde «Qaırat» olar­­dy muqııat qaıtarýmen boldy. Sosyn Islam­han taǵy da ótkir shabýyldyń ótinen kórin­di. Onyń bul jolǵy soqqysy baǵannyń jany­nan ótti. Budan keıin kúsheıip ketken jaýyn eki jaqty abaılap oınaýǵa májbúr etti. Ko­man­­dalar sonda da bolsa, tarazy basyn óz­deri­ne aýdarýǵa tyrysyp baqty. Alaıda, match­t­yń sońyna deıin tablodaǵy 0:0 degen esep ózgermedi. Munyń aldynda «Shahter» men «Astana» komandalary kelesi kezeńge ótken bolatyn. Armenııa jasaqtarymen kúsh synasqan olardyń ekeýi de eki oıynnyń qorytyndysy boıynsha 6:1 degen eseppen jeńiske jetti. Sóıtip, Eýropa lıgasynda oınap jatqan Qazaqstannyń úsh komandasy da irikteý raýndynyń kelesi kezeńine ótti. Damır QOJAMQUL.