ASTANA. 13 shilde. Búgin tún ortasy aýa Rıo-de-Janeıro qalasynda Germanııa jáne Argentına qurama komandalary álem chempıonatynyń eń sońǵy fınaldyq oıynyn oınady. Matchtyń negizgi ýaqytynda esep ashylmady. Oıynnan keıin belgilengen ekstra-taımda nemister 1:0 esebimen jeńiske jetti. Bul týraly egemen.kz habarlady.
Jeńis dobyn soqqan Marıo Gıotse kezdesýdiń úzdik oıynshysy atandy.
Buǵan deıin Germanııa – 3, Argentına 2 ret álem chempıony ataǵyn jeńip alǵan bolatyn. Al sońǵy utystyń nátıjesinde nemister munyń sanyn taǵy bireýge arttyryp, 5 dúrkin jeńimpaz bolǵan Brazılııaǵa jaqyndaı tústi.
Al Germanııa men Argentına teketiresiniń tarıhy baı edi. Bul úshin búgingi kezdesýdiń fınaldyq oıynnyń úshinshisi bolyp otyrǵanyn aıtsaq ta jetkilikti. Komandalar fınaldyq match deńgeıinde 1:1 esebimen teń bolyp keldi. Dıego Maradona bastaǵan argentınalyqtar 1986 jyly 3:2 esebimen jeńiske jetse, nemister 1990 jyly 1:0 etip qarymta qaıtardy. Jasaqtar budan bólek, 2006 jáne 2010 jyldarǵy mýndıalda ushyrasty. Bulardyń alǵashqysynda býndestım negizgi ýaqytta 1:1 bolyp teń oınap, penaltıden 4:2 esebimen basym túsken. Kelesisinde «nemis máshınesi» 4:0 esebimen kúırete jeńgen.
Germanııa - Argentına 1:0. Negizgi ýaqyt - 0:0.
13 shilde. Rıo-de-Janeıro. «Marakana» stadıony. Tóreshi - Nıkola Rıssolı (Italııa).
Germanııa: Manýel Noıer, Benedıkt Hıovedes, Mats Hýmmels, Jerom Boateng, Fılıpp Lam, Bastıan Shvaınshtaıger, Krıstof Kramer (Andre Shıýrrle, 30), Mesýt Ozıl (Per Mertezaker, 121), Tonı Kroos, Tomas Mıýller, Mıroslav Kloze (Marıo Gıotse, 88).
Argentına: Serhıo Romero, Esekel Garaı, Pablo Sabaleta, Martın Demıkelıs, Markos Roho, Enso Peres (Fernando Gago, 86), Haver Maskerano, Lýkas Bılıa, Esekel Lavessı (Serhıo Agýero, 46), Lıonel Messı, Gonsalo Igýaın (Rodrıgo Palasıo, 77).
Gol: Marıo Gıotse (113).
Eskertýler: Bastıan Shvaınshtaıger (28), Benedıkt Hıovedes (31), Haver Maskerano (63), Serhıo Agýero (64).
Birinshi taım komandalardyń birde-biriniń basymdylyǵyn baıqatpaǵan teń kúres jaǵdaıynda ótti. Kópshilik kútkendeı, argentınalyqtar birden tas túıin qorǵanysqa ketip qalmaı, qarsylasyna qarsy shabýyl jasap turýǵa kiristi. Al nemister oıynnyń alǵashqy jarty saǵatynda Krıstof Kramerdiń ornyna alańǵa Andre Shıýrrle shyqqan kezden shabýylda belsendilik kórsete bastady. Amerıkalyqtar darbazasyna jasalǵan eń alǵashqy aıryqsha qaýipti sát taımǵa qosylǵan qosymsha ýaqytta tirkeldi.
Alehandro Sabelıanyń shákirtteri ekinshi taımnyń basynda shabýyl shebin kúsheıtýge baǵyt ustady. Sol boıda olar esepte ashyp kete jazdady. Biraq qaqpashy Manýel Noıermen betpe-bet shyqqan Lıonel Messı dopty qaqpa baǵanynyń janynan jiberdi. Budan keıin oıyn shabýyldyń ekpini birshama basyldy. Alaıda, keskilesken kúres alańnyń ár múıisinde júrip jatty. Sondaı qalyptaǵy aǵymdardyń birinde Gonsalo Igýaın nemis qaqpashysymen soqtyǵysyp qaldy. Nátıjesinde basynan qatty soqqy aldy. Bul birneshe mınýttan keıin onyń ornyna Rodrıgo Palasıony shyǵarýǵa aparyp jetkizdi.
Osyndaı aıqaspen kezdesýdiń negizgi ýaqyty da aıaqtaldy.
Overtaımnyń bas jaǵy aldyńǵy kezeńdegi oıyndardan kóp ózgere qoıǵan joq. Eki jaq bir-birleriniń qadamdaryn tusaýlaı otyryp, qarsy shabýyl jasaýǵa kóbirek súıendi. Ekinshi ekstra-taımda nemis Bastıan Shvaınshtaıger kezekti dopqa talas tusynda qabaǵyn jaryp aldy. Soǵan qaramastan, ol alańnan ketpeı, órshelene oınady. Onyń munysy komandaǵa qatty áser etti. Osydan jiger alǵan Andre Shıýrrle men Marıo Gıotse qarsy qaptalǵa qaraı quıyndaı quldyrady. Bulardyń sońǵysy qarsy qaqpa alańy ishinde júgirip kele jatyp, áriptesinen alǵan dobyn keýdesimen tómen qaraı túsire berip, qaqpaǵa qaraı atty jiberdi. Áýeleı ushqan dop qaqpaǵa qııalap baryp, kirdi de ketti. Oıynnyń 113-mınýtynda esep osylaı ashyldy. Argentınalyqtar qalǵan ýaqyt ishinde jantalasqan shabýylǵa kóshti. Biraq olardyń barlyq qımyldaryn Manýel Noıer qıyp tastap turdy.
Sóıtip, nemister óziniń tarıhynda tórtinshi márte chempıon atandy. Olar mundaı ataqqa 1954 jyly qol jetkizse, keıingilerin 1974 jáne 1990 jyldary qol jetkizdi. Sonymen birge, býndestım Amerıka qurlyǵynda ótken chempıondyqty jeńip alǵan birinshi Eýropa quramasy boldy. Amerıka kontınentiniń komandalary da Eýropa qurlyǵynda ótken jahan jarysynda bir-aq ret chempıon bolǵan eken. Ony 1958 jyly Stokgolmde birinshilikte Brazılııa jasaǵan edi.
Úshinshi oryn úshin talas budan bir kún buryn oınaldy. Onda Brazıdııany 3:0 etip jeńgen Gollandııa qola júldeger atandy.
Damır Qojamqul.
Derekkóz: egemen.kz.
Foto: ITAR-TASS.
