Birden 153 avtokólik berildi

Búgingi ósken ómirde mundaı jaılar tańsyq emes. Densaýlyq saqtaý, quqyq qorǵaý, mádenıet, bilim berý jáne sport salasy mekemeleriniń avtoparki jyl saıyn jańa avtomobıldermen tolyǵyp jatýy qalypty qubylysqa aınalǵany belgili. Áıtse de, osyndaıǵy ár sát erekshe de qýanyshty oqıǵa retinde este qalýymen eleýli. Keshe Qaraǵandy oblystyq IID avtokólik quramy birden  qyzmettik 153 júrdek mashınaǵa ulǵaıýy sondaı jaıt boldy. «Shkoda», «Toıota Haıs», «Nıva» markaly temir tulpar­lar qoǵamdyq tártip saqshylary qolyna tıdi. Sonyń ishinde jol kúzeti qyzmetine arnalǵan «Toıota Haıstyń» jol erejesin buzýshylardy, qýyp áketýshilerdi, aıyppul tólemeýshilerdi tez anyqtaýdyń qural-jabdyqtarymen tolyq jaraqtalǵan túri qabyl­daýshylardy qýantty. Avtomobılderdi tapsyrý rásimi Táýelsizdik alańynda ótti. Aldymen qaz-qatar tizilgen arnaýly kólikterdiń ishki jabdyqtalýyn kórgen oblys ákimi Nurmuhambet Ábdibekov Elbasynyń tapsyrmasyna sáıkes quqyq qorǵaý or­gandarynyń materıaldyq-teh­nı­kalyq bazasyn nyǵaıtý baǵy­tynda barlyq is-sharalar qolda­nylýyn, máselen, jergilikti bıýdjetten osy maqsatqa 11 mlrd. teńge bólinýin aıtyp, kiltterdi oblystyq IID bastyǵy, general-maıor Mergenbaı Japparovqa tabys etti. Mashınalardyń birazy aýdan­­dardyń ýchaskelik ınspek­tor­lary­nyń paıdalanýyna berildi. «Bul qyzmettik avtokólikterdiń jumysymyzǵa zor kómegi tımek. Sonyń arqasynda qylmystyń aldyn alý, quqyq buzýshylyqty boldyrmaý, qylmystardyń izin sýytpaı ashý jeńildeıtini daýsyz. Memleketimizdiń mindetimizdi atqarýǵa jaqsy jaǵdaı jasaýy jaýapkershilikti kúsheıtedi», dedi Buqar jyraý aýdanyndaǵy Kókpekti aýyldyq okrýginiń ýchaskelik ıns­pektory Turar Qusaev. Byltyr da osynsha arnaýly kólik berilgen IID avtoparki taǵy birneshe túrimen tolyqty. Aıqyn NESIPBAI, «Egemen Qazaqstan». QARAǴANDY.