Áý basta irgetasyn san ulttyń ókilderi bilek pen tilek biriktire qalaǵan Aqtaý – dostyqtyń qalasy. Mańǵystaý oblysyndaǵy ózge ult ókilderi negizinen osy qalaǵa shoǵyrlanǵan, al aýdandar men Jańaózen qalasynda turatyndar – el men jer ıesi – qazaqtar. Dostyq teńizi atalatyn Kaspıı jaǵasyndaǵy sulý qalada tatý-tátti tirlik keship jatqan birneshe ult urpaqtary Mańǵystaý oblysy Qazaqstan halqy Assambleıasynyń 18-shi sessııasynda basqosyp, keleli isterdi talqyǵa saldy.
Memleket basshysynyń
Qazaqstan halqy Assambleıasynyń ókildigine bergen tapsyrmalarynyń júzege asyrylý jaıy men kelesi oblystyq 19-shy sessııanyń josparlary talqylanǵan jıynǵa óńirdegi 20 ulttyq mádenı ortalyqtyń ókilderi, QR Parlamenti Senatynyń depýtaty M. Bortnık, aýdan-qala ákimderi, memlekettik mekemeler basshylary men úkimettik emes uıymdardyń ókilderi qatysty. Aımaq basshysy, Mańǵystaý oblysy Qazaqstan halqy Assambleıasy tóraǵasy A.Aıdarbaev halyqtar dostyǵyn nyǵaıtý baǵytynda óńirde 2013 jyly jasalǵan jumystar men bıylǵa mejelengen mindetterge toqtaldy.
Memleket basshysy, Qazaqstan halqy Assambleıasynyń Tóraǵasy N.Nazarbaev Qazaqstan halqy Assambleıasynyń XXI sessııasynda Mańǵystaý oblysynda Dostyq úıin salý týraly aıtqan bolatyn. Qazirgi tańda jer telimi bólinip, jobalyq-smetalyq qujattary daıyndalý ústindegi nysandy dostyq orny bolýmen qatar, qala turǵyndary men qonaqtary demalatyn kórikti oryndarynyń biri retinde salýǵa, ol úshin Dostyq úıimen birge Dostyq alleıasy, kelisim alańy, etnoqalashyq salynsa degen etnomádenı birlestik múshelerinen usynys túsken. Aımaq basshysy tarapynan qoldaý tapqan usynys oryndalýy úshin tıisti oryndarǵa tapsyrmalar júkteldi.
Kelesi jyl Uly Jeńistiń 70 jyldyǵy, Qazaqstan Respýblıkasy Konstıtýsııasynyń 20 jyldyǵy, Qazaqstan halqy Assambleıasynyń 20 jyldyǵy syndy merekeler jyly. Birligimizdi jarastyra júrip osy merekelerge laıyqty atsalysý, ulttardyń ózara tatýlyǵyn odan ári uıytyp, belsendi jumysyn úılestiretin jastardy daıyndaý qajettigi aıtyldy. Naýryz aıynda tusaýy kesilgen «Beıbitshilik pen kelisimniń jol kartasy» mega-jobasynyń jańa kezeńi aıasyndaǵy óńirlerde óner, mádenıet pen dástúrdi, patrıottyq tárbıeni jetildirý, sondaı-aq, «Jalpyǵa Ortaq Eńbek Qoǵamyn» qalyptastyrý baǵytyndaǵy jastardy jumyspen qamtý máseleleri barlyq ulttardyń qatysýymen, qoldaýymen júzege asatyn bolady.
Mańǵystaý óńirinde 20 ulttyq mádenı ortalyq qurylǵan. Olar dostyqty nyǵaıtýǵa jáne óz ana tili men tarıhyn, dástúrin nasıhattaýda belsendi jumys istep keledi. Sessııada «Býlgar» tatar etnomádenı birlestiginiń múshesi N. Rafıkova, T.Shevchenko atyndaǵy ýkraın etnomádenı birlestigi múshesi V.Storojýk, «Shalom» evreı etnomádenı birlestigi múshesi Z. Avsıevıch sóz sóılep, óz yqylastaryn jetkizdi.
– Dıplomy bolǵanmen, tájirıbesi joq bolǵandyqtan jastardyń jumysqa ornalasýy qıyn. Men Mańǵystaý energetıkalyq kolledjiniń túlegimin. 20-dan astam ult ókilderiniń balalary bilim alyp jatqan bilim ordasy stýdentterdi tájirıbeden ótkizý maqsatynda 40-shaqty mekememen kelisimshartqa otyrǵan. Men kolledjdegi dýaldy oqytý júıesi nátıjesinde jumysqa ornalastym, degen «MAEK-Qazatomónerkásip» JShS qyzmetkeri R.Syrbý dýaldy oqytý júıesin qolǵa alý, jas mamandardy daıyndaýǵa óńirdegi óndiristik mekemelerdiń óz úlesterin qosýy, baspana máselesin sheshý úshin iri kásiporyndardyń jumysshylaryna arnap óz úılerin salýy qajettigin tilge tıek etti.
Sessııada Mańǵystaý oblystyq Assambleıa quramyna jańa músheler saılanyp, ultaralyq dostyqty saqtaýǵa úles qosyp júrgen belsendi azamattar marapattaldy.
Qıyn kezeńderde dini men diline, tili men túrine qaramaı san ulttyń urpaǵyn baýyryna basqan halqymyz úshin baǵzydan beri birlik – ustanym, dostyq – bereke. Táýelsiz Qazaqstannnyń damýy men bolashaǵy úshin el ishindegi tynyshtyq-tatýlyqtyń mańyzy qanshalyqty ekendigin de qazirgi baýyrlar túsinip, birlikti ydyratpaýǵa óz úlesterin qosyp keledi.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
Sýretterdi túsirgen
Serik MAIEMEROV.
