«Ádebıettiń Ákimi» atanǵan zańǵar jazýshymen júzdestirgen taǵylymdy jıynǵa Tólen Ábdik, Myrzataı Joldasbekov, Shárbaný Beısenova bastaǵan qazaq ádebıetiniń aıtýly tulǵalary, zııaly qaýym ókilderi, Aqparat jáne qoǵamdyq damý mınıstri Darhan Qydyráli, Mádenıet jáne sport mınıstri Ashat Oralov, Qazaqstan Respýblıkasy Parlamenti Senaty men Májilisiniń depýtattary, sondaı-aq ádebıet janashyrlary, qalamgerdiń shákirtteri, jazýshynyń jary, Abaı atyndaǵy Memlekettik syılyqtyń laýreaty Roza Muqanova qatysty.
Jaqsy men jaısań bas qosqan, sóz óneriniń mereıi tasyǵan tusaýkeser rásimin tizgindegen Mádenıet jáne sport mınıstri Ashat Oralov qabyrǵaly qalamgerdi mereıtoıymen quttyqtady. Al Memleket basshysy Qasym-Jomart Kemeluly Toqaevtyń qalamger shyǵarmashylyǵy týraly pikiri beınerolık arqyly sharanyń shymyldyǵyn ashty.
«Birinshiden, Ákim Tarazı – jazýshy áleminde óte sırek kezdesetin tulǵa. Bul kisiniń qazaq ádebıetindegi orny erekshe, biregeı jazýshy dep aıtýǵa bolady. Ákim Tarazı jalpy qalada bolyp jatqan dúnıeler, ıaǵnı ýrbanızasııa týraly jazady. Bul turǵydan alyp qarasaq, belgili túrik jazýshysy Orhan Pamýkqa uqsaıdy. Ol kisiniń fılosofııasy óte tereń. Taǵy bir ereksheligi – ol kisi naǵyz realıst. Týyndylaryn jazǵan kezde oqyrmandaryn aıamaıdy. Sherhan Murtaza aıtqandaı, «jazýshynyń kózi – kókireginde». Á.Tarazı – jazýshy retinde de, dramatýrg retinde de ómirge kókiregimen qaraıtyn qalamger», – dep Memleket basshysy beınequttyqtaýynda óziniń aqjarma tilegin jetkizip, sýretker shyǵarmashylyǵy týraly keleli pikirin bildirdi.
Aqparat jáne qoǵamdyq damý mınıstri Darhan Qydyráli de jazýshy shyǵarmashylyǵy men qalamgerdiń tusaýy kesilgen týyndylaryna keńinen toqtalyp, joǵary baǵasyn berdi:
– Ákim aǵamyzdyń on eki tomdyq shyǵarmalar jınaǵy – jazýshynyń «kún otyrmaı, tún uıyqtamaı» qolynan qalamy túspegen, talaı jylǵy qajyrly eńbeginiń jemisi. Sonyń ishinde tutas Túrkistan úshin ot keshken uly kúresker Mustafa Shoqaıdyń ómir jolyn, bolmysy men beınesin jańa qyrynan tanytyp, shuraıly til, sheber sýretkerlikpen kórkemdegen taǵylymdy týyndy – ádebıetimizdiń asyl qazynasyna qosylǵan qundy dúnıe ekeni anyq, – dedi mınıstr.
Salıqaly keshte súbeli oılar, keleli pikirler aıtylyp, Memleket jáne qoǵam qaıratkeri Myrzataı Joldasbekov, jazýshy, Memlekettik syılyqtyń laýreaty Tólen Ábdik, memleket jáne qoǵam qaıratkeri Qýanysh Sultanov, jazýshy Shárbaný Beısenova syndy jazýshynyń áriptesteri, qalamgerdiń shyǵarmashylyǵyn zerttep júrgen shákirtteri estelikterin, jyly lebizderin bildirdi.
– Ákim aǵanyń eń jaqyn dostary boldy. Olar – Saıyn Muratbek, Qalıhan Ysqaq, Ramazan Toqtarov jáne Qabdesh Jumadilov. Bul óte saýatty, myqty urpaq edi. Sondaı toptyń basynda boldy. Qazaq ádebıetinde qoǵamdy synaý, adamdy synaý, syn kózimen synshyl realızmge bet burý degendi bastaǵan kisi – bizdiń Ákim aǵamyz. Bul kisi ár janrda jetistikke jetken adam. Prozasy bir bólek, dramatýrgııadaǵy eńbegi de óte úlken. Qazaq dramatýrgııasyn bıikke kótergen tulǵa»,– dep jazýshy, Memlekettik syılyqtyń laýreaty Tólen Ábdik qalamgerge arnaǵan júrekjardy lebizin jetkizdi. Sýretker shyǵarmashylyǵy týraly ádil baǵasyn ortaǵa saldy.
Taǵylymdy kezdesý kitaphananyń 4-qabatynda ornalasqan Ákim Tarazı sheberhanasyndaǵy jeke qoltańbalar kórmesin, Ulttyq arhıv qorynan Ákim Tarazıdyń jeke tektik qoryn jáne tulǵa ómirinen syr shertetin fotokórmeni tamashalaýmen jalǵasty. Avtor sheberhanasynda shákirtterine aqyl-keńes aıtyp, qoltańba berdi.
Aıta keterligi, aıtýly jıyn – Ákim Tarazı mereıtoıynyń shymyldyǵyn ashyp bergen taǵylymdy sharalardyń betashary. Ulttyq kitaphana tórinen bastaý alǵan mereıtoı qońyr kúzde kúlli respýblıka deńgeıinde toılanatyn bolady.
