Aqparattar aǵyny

● Metallýrg kúnine oraı salanyń úzdikteri marapattaldy. Ony Ulttyq kásipkerler palatasy júrgizdi. Saltanatty jıynda salanyń bir top mańdaıaldy qyzmetkerlerine «Kenshi dańqy», «Eńbek dańqy» merekelik tós­belgileri tapsyryldy. Sonymen qatar, qaıta jańǵyrǵan «Qurmetti metallýrg», «Qurmetti kenshi» belgileri de óz ıelerin tapty. ● Qazaqstanda júzege asyrylatyn úzdik áleýmettik joba anyqtalady. Ol ekinshi respýblıkalyq baıqaýdyń qorytyndysynda belgili bolady. Synaq aımaqtarda maýsym, shilde aılarynda ótip, qyrkúıek aıynda respýblıkalyq kórmemen aıaqtalady. ● «Nazarbaev Ýnıversıteti» tehnoparkinde biregeı ǵylymı jobalar tanystyryldy. Keshe júzege asqan bul jumystardyń barysynda Bilim jáne ǵylym mınıstri Aslan Sárinjipov kommersııalandyrý jelisi boıynsha iriktelingen qazaqstandyq ǵalymdardyń jobalaryn kórdi. Atap aıtqanda, mınıstrge keńselik qaǵazdardy qaıta óńdeý ádisi, gıdrofobty kompozıtti materıaldardy shyǵarý, skanerleýshi zondty nanotomograf, onlaın oqytý úshin adaptıvti attestasııanyń tehnologııalary, qazaqsha sózderdi tanýǵa arnalǵan zııatkerlik júıe jáne basqa da jobalar kórsetildi. ● Ońtústik Qazaqstan obly­synyń Qazyǵurt aýdanynda tamshylatyp sýarý ádisi keń óris aldy. Osyndaǵy «Qyzylqııasý» JShS alma baýyndaǵy 8,6 ga almaly alqapta kóshetter ıntensıvti tehnologııa arqyly tamshylatyp sýarylady. Kompanııa basshysy Erjan Mádibekov munda «Golden delıshes», «Red delıshes», «Gala», «Fýdjı», «Grennı smıt» surypty kóshetter otyrǵyzylǵanyn aıtty. ● Qyzylorda oblysynda ındýstrııalandyrý kartasy nysandarynda 500-den astam jumys orny ashylady. Bıylǵy jyly jalpy quny 4,2 mlrd. teńge bolatyn 4 joba júzege asyrylady dep josparlanǵan, qazir bir joba iske qosyldy. Hımııalyq reagentter óndiretin «Hýa ıý ınternasıonal» JShS jobasynyń quny 500 mln. teńge, qýattylyǵy jylyna 2 myń tonna ónim shyǵarýǵa múmkindik beredi. ● Shymkentte Shámshi Qal­daıaqovtyń týǵan kúnine oraı dás­túrli án aptalyǵy bastalǵaly otyr. Ony uıymdastyratyn Ońtústik Qazaqstan oblystyq mádenıet basqarmasy tamyzdyń 13-inde ashylatyn festıvaldegi barlyq sharalardy belgilep berdi. ● Qostanaıda múmkindigi shek­teýli jandar bı arbasyna qol jetkizdi. Ol qaladaǵy «Nadejda-Úmit» qaıyrymdylyq qorynyń byltyr oblys ákimine ótinish bil­dirýi arqyly múmkin boldy. Bı­lik basyndaǵylar jarymjan jan­dardyń bul ótinishin aıaqasty etpeı, bıge arnalǵan bes birdeı múgedek arbasyn syıǵa tartty. Habarlar «QazAqparat», BNews.kz, Alau.kz, Altaynews.kz, Egemen.kz saıttarynyń derekteri boıynsha daıyndaldy.