Bolashaq dárigerlerdi gospıtal bastyǵynyń orynbasary-medısınalyq bólim bastyǵy, medısına qyzmetiniń polkovnıgi Rýslan Janzaqov qarsy aldy. Ol «gospıtal qabyldaý bóliminen bastalatynyn» aıtyp, bul jerde jalpy sany 29 bólimshe bar ekenin, onyń 15-i stasıonarlyq emdeýge arnalǵanyn tanystyryp ótti.
Kópsalaly medısınalyq emdeý mekemesi 2000 jyldyń 3 sáýirinde qurylǵan. Munda 300-den asa medısına qyzmetkeri jumys isteıdi. Olardyń arasynda «Qazaqstan Respýblıkasynyń Densaýlyq saqtaý salasyn damytýǵa qosqan úlesi úshin» tósbelgisimen marapattalǵan medısına ǵylymdarynyń doktorlary men kandıdattary, densaýlyq saqtaý úzdikteri de bar.
Jyl saıyn mekemede túrli syrqatpen úsh myńǵa jýyq pasıent stasıonarlyq em qabyldaıdy, olarǵa negizgi medısınalyq qyzmetten bastap kúrdeli operasııaǵa deıin mamandandyrylǵan medısınalyq kómek kórsetiledi.
Gospıtal pasıentteri – kadetter, kýrsanttar, merzimdi qyzmettegi sarbazdar, ofıserler quramy, kelisimshart boıynsha áskerı qyzmetshiler jáne olardyń otbasy músheleri. Úsh jyl boıy gospıtal halyqqa kepildi kómek retinde beriletin tegin jáne mindetti áleýmettik medısınalyq saqtandyrý sheńberinde aqyly medısınalyq qyzmet kórsetip keledi.
Gospıtal azamattyq densaýlyq saqtaý uıymdarymen, ulttyq ǵylymı ortalyqtarymen yntymaqtasa eńbek etip keledi. 2013 jyly medısınalyq mekeme «Astana medısına ýnıversıteti» KeAQ kafedralarynyń klınıkalyq oqý bazasyna aınaldy.
Medısınalyq oqý oryndarynyń stýdentterine áskerı dárigerler qyzmetiniń ereksheligi, onyń azamattyq densaýlyq saqtaý salasynan aıyrmashylyǵy týraly jan-jaqty aıtyldy. Olar sondaı-aq áskerı qyzmetshiniń áleýmettik paketiniń kólemi, kásibı turǵyda ósý perspektıvalary týraly tolyq aqparat aldy. Áskerı dárigerlerdiń taıaý jáne alys shetelderdiń joǵary oqý oryndarynda biliktiligin arttyrýǵa, Qorǵanys mınıstrliginiń áskerı medısına ortalyǵynda daıarlyqtan ótýge, bitimgerlik mıssııalarǵa qatysa otyryp, biregeı tájirıbe alýǵa múmkindigi bar.
