Kollajdy jasaǵan Qonysbaı ShEJIMBAI, «EQ»
«Shirkin, meniń qandaı dalam,
Janarymdy almaı qalam.
Sulýlyqpen syrlassam da,
Sýsynyńa qanbaı qalam.
Erlik kýá án murasyń,
Júregimde jańǵyrasyń.
Ulytaýym, ulylyqty
Urpaǵyńa qaldyrasyń.
Asyl murat, qýanyshtan,
Armanymdy alyp ushqan,
Janym meniń jaralǵandaı,
Saǵan degen saǵynyshtan.
О́tkenimniń muń ánimin,
О́z elimniń ulanymyn.
Eger saǵan tartpaı týsam,
Men aldyńda kinálimin»
– dep keletin tereń maǵynaly mátinge ádemi áýen qabysa kele, bul án kópshiliktiń kóńil tórinen oryn alǵaly da qyryq jylǵa jýyqtap qaldy. Bir qyzyǵy, án alǵashynda «Ulytaý» dep atalmaǵan, Ulytaýǵa da arnalmaǵan.
Qazaqtyń mańdaıyna bitken uly kompozıtory Nurǵısa Tilendıev Jezqazǵanǵa kelgen bir saparynda jergilikti azamattar ol kisiden ult uıasy – Ulytaýǵa arnap án shyǵarýyn ótinedi. Nur-aǵa azamattardyń mundaı ótinishin jyly qabyldaıdy. «Sátin salsa, kelesi kelgende bir án ala kelermin» degen ýádesin beredi.
Araǵa úsh-tórt jyl salyp Nurǵısa aǵanyń Jezqazǵanǵa taǵy da joly túsedi. Dastarqan basyndaǵy áńgime-dúkenniń bir mezetinde azamattardyń biri ol kisiden Ulytaýǵa arnalǵan án týraly suraıdy.
– Jigitter, men ýádemde tura almadym. Shynymdy aıtsam, qolymnan kelmedi. Ulytaýǵa arnalǵan án menińshe, aıtýǵa jeńil, júrekke jaqyn bolýy kerek. Ultymyzdyń san ǵasyr boıy uıasyna aınalyp kele jatqan kıeli jerdiń búkil qadir-qasıeti, ulylyǵy ánnen anyq kórinip tursa, káni! Meniń soǵan qudyretim jetpedi. Durysyn aıtqanda, Ulytaý meniń qulashyma syımady. Bálkim, jastar ósip kele jatyr ǵoı, solardyń biri meniń oıymdaǵydaı ándi ómirge ákeletin bolar. Soǵan úmittenemin – deıdi Nur-aǵa. Sóıtip, ol Ulytaýǵa arnap án shyǵara almaǵany úshin jezqazǵandyqtardan keshirim suraǵandaı bolady.
Jezqazǵan óńiriniń mádenıeti men ónerine bir kisideı eńbegi sińgen, kezinde qazirgi Ulytaý oblystyq T.Qalmaǵanbetov atyndaǵy fılarmonııaǵa kóptegen jyldar boıy basshylyq jasaǵan marqum Baqbergen Dárkembaev esimdi aǵamyz boldy. Sol kisi osy «Ulytaý» ániniń dúnıege qalaı kelgenin jaqsy biletin edi.
– Nur-aǵa óziniń jezqazǵandyq jigitterge bergen ýádesin oryndaı almaǵanyna kádimgideı qysylyp júrdi. Keıin halyqqa keń tanylǵan Jaqsykeldi Seıilov te fılarmonııada ánshi bolatyn, azdap án jazatyny bar edi. Jaqań maǵan «Týǵan jer» degen án jazyp edim, Nur-aǵa tyńdap, baǵasyn bermes pe eken?» degen qolqasyn aıtty. Bul ótinishti estigende Nurǵısa aǵamyz «Qudaı-aý, nege qysylyp júr? Kelsin, ánin tyńdap kóreıik» dedi. Sodan bir úıde qonaqta otyrǵanda Jaqsykeldi kelip, ánin oryndap berdi. Ándi tyńdaǵan Nurǵısa aǵamyz: – Eı, jigitter, sender Ulytaý týraly án izdep júrsińder. Myna ánnen artyq Ulytaýǵa qandaı án kerek? Meniń oıymdaǵy án naq osyndaı bolýy kerek edi. Men sony tyńdap otyrmyn, – dep qýanyp ketti. Ol kisi «án mátinine azdaǵan ózgeris engizý kerek» degen keńes berdi. Sodan soń án mátinin Saılaýhan aqyn on alty ret qaıta jazyp shyqty, – deıtin edi Bákeń. Sóıtip, «Týǵan jer» ataýymen ómirge kelgen án «Ulytaý» ataýyn ıelenedi.
Byltyr Ulytaý oblysy shańyraq kóterdi. Qazaqtyń uly kompozıtory Nurǵısa Tilendıev batasyn bergen, ólkeniń tanymal qos perzenti Jaqsykeldi Seıilov pen Saılaýhan Nákenovtiń shyǵarmashylyq birlestiginen ómirge joldama alǵan án búginde jańa oblystyń beıresmı gımni ispetti bolyp ketti.
Ulytaý oblysy
