Qazaq rýhanııaty taǵy da bir tańǵajaıyp kitappen tolyqty.
Atalmysh basylym – áıel zatyn shabyttandyryp qana qoımaıdy, sonymen qatar ózi aıtyp júrgen ótirikterge senbeýdi úıretedi. 2019 jyly AQSh-taǵy eń kóp oqylǵan úzdik úsh kitaptyń biri bolǵan Reıchel Hollıstiń «Cirl, wash your face» atty motıvasııalyq kitaby endi qazaq tilinde saýatty kontent daıyndaıtyn «Alqa publishing» baspasynan jaryq kórip otyr.
Reıchel Hollıs «Áı, qyz, kózińdi ash» kitabynda kez kelgen áıeldiń tipti eń jaqyn qurbysyna aıtýǵa batyly barmaıtyn syryn ashady. Áıelderdiń ómirin ýlap kelgen 20 ótirikti tizip, olarmen kúresýdiń jolyn oınaqy, kúlkili, eń bastysy – júrekke jyly tıer meıirimdi oqıǵalar arqyly sýretteıdi.
Jıyn barysynda sóz alǵan kitaptyń aýdarmashysy Mıra Sembaı: «Kitapty aýdaryp otyryp, Reıchel sıpattaǵan árbir ótirikten ózimdi kórdim, aınalamdaǵy qanshama áıeldiń ómir boıy ózine ótirik aıtyp júrgenin túsindim. Reıchel aqyl aıtatyn keıbir adamdar men kitaptar sekildi «О́zińdi ǵana súı», «Jaqyndaryńa esep berme» dep bos urandamaıdy. О́zińdi jaqyndaryńnyń, dostaryń men týystaryńnyń, joldasyń men bala-shaǵańnyń ortasynda kúlip-oınap júrip damyt, jaqsy kór, armanyńa jet!» dep jol silteıdi. Bul kitapty áıelderdiń bári mindetti túrde oqyp shyǵýy kerek!», dep zalǵa jınalǵan qalyń kópshiliktiń kitapqa degen qyzyǵýshylyǵyn arttyrdy.
Aıta keteıik, saltanatty sharaǵa podkaster Áınel Ámirhan, psıhoanalıtık Saıa Baqımova, BAQ ókilderi, sonymen qatar ózgeriske jany qumar, kitapsúıer qyz-kelinshekter qatysty.
Kesh qonaǵy jýrnalıst, podkaster Áınel Ámirhan aıtýly sharada áıel zatynyń qashan da zaman kóshinen qalmaı, jumys pen otbasyn qatar alyp júretin, batyl da qaısar, názik te ójet bola alatyn tabandylyǵy úshin bas ıetinin aıtty. Al psıhoanalıtık Saıa Baqımova kúndelikti kúıbeń tirlikpen aınalysatyn qyz-kelinshekterdiń jigerin oıatyp, kókeıde júrgen san saýalyna jaýap berdi.
Eske sala keteıik, «Alqa publishing» baspasy – 2022 jyly ashylǵan. Atalmysh kontent úıi – áıelder taqyrybyn tereń qaýzap, qazaq qyz-kelinshekteriniń tulǵalyq damýy úshin álemdik týyndylardy ana tiline aýdaryp, oqyrmanǵa jetkizý arqyly qoǵamdy, jas urpaqty izgilendirýge úles qosýdy maqsat etken.
Shynaıy ómirdiń kórinisi boıamasyz, búkpesiz berilgen avtordyń ómiri týraly bul kitaptyń mazmuny – sharaǵa qatysqan árbir qonaqty qanattandyrdy. Kesh sońyna qaraı jıyn qatysýshylary tusaýkeserge ákelingen kitaptardy satyp alyp, estelik sýretke tústi.
