Qarsy aldynda jolbarystyń sýreti bar altynnan jasalǵan buıym. О́zegin boılaı aralyq sańylaýy bar sılındr pishindi. Uzyndyǵy 1,8 sm, eni 1,7 sm. Shamamen, kostıýmniń bólshekterine – baýlardy biriktirýshilerge jatady. Qarsy aldyndaǵy jáne eki búıirindegi beti dóńes, baýǵa bekitilgen syrtqy jaǵy jaıpaq. Buıymnyń qarsy aldyndaǵy betinde jolbarystyń aldyńǵy aıaqtarynyń ústinde jatqan basy, eki búıirindegi betterinde qanattary beınelengen. Jolbarystyń basy bıik bederleý arqyly jasalǵan. Qanattary doǵa tárizdi, qısyq syzyqpen keskindelgen. Qanattarynyń shıyrshyqtarynda tegistegen izder saqtalǵan. Buıym «balaýyzdy joıý» ádisimen quıylǵan desedi. Buryshtary tereń ári joǵary kóterilgen keń aýzy jolbarystyń bet álpetine «kúlgen» kórinis berip tur. Mundaı bet álpeti osy keshendegi basqa da ań tárizdi beınelerge tán. Tizbe áshekeıdiń joǵarǵy jáne tómengi jıekteri syrttaı qaraǵanda budyrlanǵan sııaqty bedermen jumyrlanyp bezendirilgen.
