Jádigerde beınelengen kóriniske nazar aýdarsaq, eki adam oń jaq ıyqtarymen tiresip, qoıan-qoltyq beldesýde. Sol jaq pozısııadaǵy balýan oń qolyn qarsylasynyń qoltyq astynan ótkizip, súbe qabyrǵasy mańynan sheńgeldeı qapsyryp, keýdesimen kelesi balýandy oń ıyǵyn tireı ıterip tursa, oń jaqtaǵy balýan dál qarsylasy sııaqty qaýsyra ustap, qarsylyq tanytýda.
Bul jádigerdi zerttegen mamandar ǵun ımperııasy dáýirinde jasalǵan buıym depti. Demek bul qoldanbaly mura ejelgi babalarymyzdyń ómir saltyn beıneleıtin derek ekeni anyq. Qazirgi tańda qazaq kúresiniń tarıhyn zerttep júrgen mamandar atalǵan derek arqyly ulttyq jekpe-jek saıysynyń bir túri – kúres óneriniń tarıhy arǵy zamannan tartatynyn bilgeni durys.
Jalpylaı aıtqanda, halqymyzdyń ómir súrý salty kóshpeli turmysqa beıimdelgendikten, kúndelikti is-áreketiniń ózi kúres. Tabıǵattyń taza suryptaýynan ótken halyqtyń jekpe-jek ónerge degen yntasy klassıkalyq túrde jetilgen. Tarıhqa kóz júgirtsek, kóshpeli taıpalardyń túp atasy saq, ǵun, túrkiler dáýirinde sadaq atýdan, at ústinde naızalasýdan, basqa da dástúrli saıystar ótetini týraly naqty derekter bar.
