Senator Memleket basshysynyń Qazaqstan halqyna Joldaýynda aıtylǵan elimizdiń damýynyń negizgi baǵyttaryn iske asyrýdaǵy Senat atqarǵan jumystar týraly kezdesýge qatysýshylarǵa aıtyp berdi.
«Halyqtyń ál-aýqatyn sapaly jáne ınklıýzıvti túrde arttyrýda elimizdiń bolashaǵy úshin ekonomıkalyq saıasat pen strategııalyq ınvestısııalardy qoldaý arqyly qoǵamnyń turaqty damýyna úles qosý – basty mindet. О́ńirlerdi damytý máselesi qazirgi kezde erekshe mańyzǵa ıe bolyp otyr. Elimiz turǵyndarynyń 40 paıyzy aýyldyq jerlerde turatyndyqtan, aýyl sharýashylyǵyn damytý – kún tártibindegi erekshe másele», dep atap ótti Baýyrjan Qanıev.
Depýtat sonymen qatar «Aýyl amanaty» jobasy aıasynda Yrǵyz aýylynda jylyjaı salý barysymen tanysty.
* * *
Senator Sultanbek Mákejanov Almaty qalalyq máslıhatyndaǵy turaqty komıssııalardyń tóraǵalarymen kezdesti. Ol sondaı-aq Muhtar Áýezov atyndaǵy ádebı-memorıaldyq murajaı-úıinde boldy.
Kezdesýde Almaty qalalyq máslıhatynyń turaqty komıssııalarynyń tóraǵalarymen jáne Muhtar Áýezov atyndaǵy Ádebıet jáne óner ınstıtýtynyń basshylyǵymen erkin áńgime órbidi. Júzdesý barysynda Memleket basshysy Qasym-Jomart Toqaevtyń aǵymdaǵy jyldyń naýryz aıynda VIII saılanǵan Parlamenttiń birinshi sessııasynyń ashylýynda alǵa qoıǵan tapsyrmalary talqylanǵan negizgi taqyryptyń biri boldy.
Kezdesýge qatysýshylar sonymen qatar qarjy bólýdegi ózekti máselelerdi jáne shyǵarylatyn otandyq kitaptardyń taralymyn ulǵaıtýdy, tarıhı qoljazbalardy durys saqtaý jáne muraǵattaýǵa arnalǵan arnaıy jabdyqtardy satyp alý jaıyn talqylady. Qalalyq máslıhat depýtattary arnaıy ekonomıkalyq jáne ındýstrııalyq aımaqtar, qaladaǵy tyǵyz qurylys, otandyq ónimdi óndirý jáne satý máselelerin kóterdi.
Senator kezdesý sońynda Parlament Senatynyń elimizdiń áleýmettik-ekonomıkalyq damýyna jáne halyqtyń tabysyn arttyrýǵa baǵyttalǵan aldaǵy zań shyǵarý jumysy týraly aıtyp berdi.
