Premer-mınıstr Mádenıet jáne aqparat mınıstri Aıda Balaevany tanystyra otyryp, Memleket basshysy halyqqa Joldaýynda kreatıvti ındýstrııany aýqymdy damytý boıynsha birqatar mindet qoıǵanyn atap ótti.
«Mınıstrlik jergilikti atqarýshy organdarmen birlesip, kreatıvti ındýstrııaǵa qatysýshylardy qoldaý sharalary boıynsha naqty usynystar engizip, ár óńirde kreatıvti ındýstrııa ortalyqtaryn qurý jóninde sharalar qabyldaýy qajet», dedi Álıhan Smaıylov.
Budan basqa mınıstrliktiń aldynda mádenıet, din jáne etnosaralyq qatynastar, jastar jáne otbasy saıasaty, azamattyq qoǵam, aqparat, kınematografııa salalaryn odan ári damytý, sondaı-aq tarıhı-mádenı mura men memlekettik rámizderdi qorǵaý, muraǵat isin damytý, t.b. mindetter tur.
Saýda jáne ıntegrasııa mınıstri Arman Shaqqalıevti tanystyrý barysynda Úkimet basshysy salanyń aldynda ishki saýdany damytý, taýarlar men kórsetiletin qyzmetter eksportyn ilgeriletý, respýblıkanyń saýda-sattyqtaǵy áriptesterimen ıntegrasııa salalary boıynsha mańyzdy mindetter turǵanyn atap ótti.
«Jalpy, saýda ınfraqurylymyn jetildirý, bırjadaǵy jáne elektrondyq saýdany damytý, tutynýshylardyń quqyqtaryn qorǵaý jónindegi jumysty jalǵastyrý qajet. Memleket basshysy Joldaýynda bizge saýda saıasatynda jańa ári batyl tásilderdi qoldaný qajettigin atap ótti», dedi Álıhan Smaıylov.
Kólik mınıstrliginiń ujymyna Marat Qarabaevty tanystyra otyryp, Premer-mınıstr respýblıkanyń kólik-logıstıka salasyn odan ári damytýdyń strategııalyq mańyzyn atap ótti.
«Osy sebepti jańa mınıstrlik qurylyp otyr. Tez arada qaıta uıymdastyrýdy júrgizip, temirjol jáne avtomobıl joldary, áýe qatynasy, teńiz kóligi salasynda iri ınfraqurylymdyq jobalardy iske asyrý boıynsha qoıylǵan mindetterdi oryndaý qajet. Bul – óte aýqymdy jumys», dedi Úkimet basshysy.
Úkimet basshysynyń aıtýynsha, kólik sektory ekonomıkanyń damýyna zor úles qosyp, Qazaqstannyń Eýrazııa qurlyǵyndaǵy negizgi tranzıttik hab retindegi rólin arttyrady.
«Jańadan qurylǵan mınıstrlikten kólik-tranzıt salasyn damytýda naqty serpilis kútemiz. Sońǵy kezde uzaq ýaqyt boıy tıimdi sheshimin tappaı kelgen máseleler anyqtalyp jatyr. Bul – jolaýshylar tasymaly úshin kóliktiń jáne júk vagondarynyń tapshylyǵy, logıstıkany damytýdaǵy qıyndyqtar, jol qurylysynyń sapasy. Olardy shuǵyl jáne sapaly sheshý kerek», dedi Premer-mınıstr.
Úkimet basshysynyń aıtýynsha, avtomobıl joldarynyń qurylysyna erekshe nazar aýdarý kerek. Bul 2029 jylǵa qaraı 4 myń shaqyrymnan asa jolǵa kúrdeli jóndeý júrgizýge, baqylaýdy kúsheıtýge jáne jańa normatıvtik qujattardy qabyldaýǵa qatysty.
Eńbek jáne halyqty áleýmettik qorǵaý mınıstrliginiń ujymyna jańa basshy Svetlana Jaqypovany tanystyra otyryp, Úkimet basshysy salanyń aldynda úlken mindetter turǵanyn, respýblıka azamattarynyń ál-aýqatynyń deńgeıi olardy tıimdi sheshýge baılanysty ekenin atap ótti. Atap aıtqanda, bul jumysqa ornalastyrýǵa, eńbek daýlaryn sheshýge, zeınetaqy, járdemaqy taǵaıyndaýǵa, t.b. qatysty.
«Prezıdent óz Joldaýynda eń tómengi jalaqyny kóterý, halyqty jumyspen qamtý jáne eńbek qaýipsizdigi máselelerine basa nazar aýdardy. Sondyqtan osy tapsyrmany oryndaý úshin Eńbek mınıstrligi memlekettik organdarmen birlesip, 2024 jylǵy 1 qańtardan bastap eń tómengi jalaqy mólsherin 85 myń teńgege deıin kóterý jóninde sharalar qabyldaýy qajet», dedi Álıhan Smaıylov.
Ol sondaı-aq jumys ornyndaǵy kásiptik táýekelderdiń aldyn alý jáne boldyrmaý úshin 2030 jylǵa deıin platformalyq jumyspen qamtý salasyn jáne qaýipsiz eńbek tujyrymdamasyn retteıtin Eńbekti damytýdyń 2030 jylǵa deıingi keshendi josparyn qabyldaýdy jedeldetý qajettigin aıtty.
Ermek Marjyqpaevty Týrızm jáne sport mınıstrliginiń ujymyna tanystyrý aıasynda Premer-mınıstr Memleket basshysy alǵa qoıǵan mindetterdi ýaqtyly iske asyrýdyń mańyzdylyǵyn atap ótti.
«Týrızmde keminde 15 iri serpindi joba iske asyrylýǵa tıis. Olardy júzege asyrýǵa sheteldik ınvestorlar da, otandyq bıznes te belsendi qatysýy qajet. Eldiń ımıdji negizinen týrızm salasynyń damý deńgeıimen, qyzmet kórsetý sapasymen qalyptasady. Sondyqtan bul salada serpilis qajet», dedi Álıhan Smaıylov.
Úkimet basshysy sport salasynda qysqa jáne ortamerzimdi perspektıvada Qazaqstannyń Jazǵy Azııa oıyndaryna laıyqty túrde qatysýy, Astanada V Dúnıejúzilik kóshpeliler oıyndaryn joǵary deńgeıde ótkizý, sondaı-aq barlyq kúsh-jigerdi jumsap, 2024 jylǵy Olımpıada oıyndaryna qatysýǵa lısenzııa alý qajettigin atap ótti.
«Álemdik deńgeıdegi sporttyq jarystarǵa qatysýdan basqa, buqaralyq sportty damytý mindeti tur. Ony halyq arasynda tanymal etý – salamatty ultty qalyptastyrýdyń basty kilti. Sport nysandary men deneshynyqtyrý-saýyqtyrý keshenderiniń ınfraqurylymyna erekshe nazar aýdarý kerek. Olar árbir qazaqstandyq úshin qoljetimdi bolýy kerek», dep atap ótti Álıhan Smaıylov.
Jalpy, Dene shynyqtyrý men sportty damytýdyń 2023-2029 jyldarǵa arnalǵan tujyrymdamasyna engizilgen barlyq mindet sapaly jáne ýaqtyly oryndalýǵa tıis, dep qosty ol sózine.
Premer-mınıstr jańadan taǵaıyndalǵan barlyq mınıstr men tıisti salanyń ujymdaryna jemisti jumys tiledi.
