Iаǵnı mahabbatqa jetpegen, qumarlyq deńgeıinde qalǵan menmen jannyń egosy. Al súıgen júrek ekinshi jartysy qaıyrylmasa da, eshqashan qun suramaıdy, alǵys pen razylyqtan basqa. Tipti máńgilikke kóz jazsa da. Mahabbatqa jetken shyn júrektiń azabynyń ózi ǵajapqa aınalaryn áıgileıdi. Iá, súıgen júrektiń azabynyń ózi ǵajap. Muny biz mahabbat jyrshysy Ázilhan Nurshaıyqovtyń shyǵarmalarynan ǵana emes, ónegeli ómirinen de kóremiz. Onyń jary Halımamen ótkergen súıispenshilikke toly, eki jartydan bir bútinge aınalǵan tutas ǵumyry – mahabbattyń máýesi.
Qolymyzǵa jazýshy Qaısar Álimniń Almatydaǵy «Mereke» baspasynan 2022 jyly shyqqan «Mahabbat jyrshysy» atty kezekti kitaby tústi. Bul avtordyń Ázilhan Nurshaıyqovqa arnaǵan ekinshi kitaby eken. Jazýshy men jazýshynyń jazysqan hattary, ádebıet, ómir, zaman týraly oılar men paıymdar legi bir bólim. Onda Nurshaıyqovtyń oqyrmandary týraly jazǵandary da beıjaı qaldyrmaıdy. Áz-aǵańdy tanýda, ol kisiniń ómirine úńilem deýshilerge taptyrmas muralar birneshe bólimge júıelenip, jeke taqyryptarǵa bólingen. Ásirese biz bastan-aıaq kóz qydyrtyp, oı júgirtip paraqtaǵanymyz «Ázilhan Halımadan soń» hıkaıaty joǵarydaǵydaı sóıleýimizge túrtki boldy.
«О́lmeı qaldym men áreń,
Bolǵannan soń jan bólek.
Kúnde eńirep jylaımyn,
Kózdiń jasyn sebelep.
Qaraly oı darııasyna endi batqaly turǵanda Halımasynyń «tursańshy, tiktel» degen qatqyl úni estilip...», dep tarqatyp áketedi avtor shyǵarmasyn. Elý tórt jyl otasqan Halımasynan aıyrylǵan jazýshynyń jaı-kúıi, júrek tebirenisi, kózi ketse de endigi ǵumyrynda kóńiline medet bolǵan mahabbat sáýlesi qamyryqty janǵa qanshama qýat berip, shýaǵyna bólegen. Bireýler oılaýy da múmkin, qaıtken kúnde jarty ǵasyrdan astam ýaqyt birge otasyp, sáýleli ǵumyr súrgen júrekke egizinen kóz jazǵannan aýyr qasiret joq, kópke barmaıdy dep. Árıne, ondaı jaǵdaılarda oryn alyp jatady. Alaıda shyn súıgen, mahabbat atty baqytqa bólengen jannyń azabynyń ózi ǵajap ekenin joǵaryda tekke aıtpadyq. Halımadan soń Ázilhannyń kúıi ańsaýly júrektiń alǵysty súıispenshiligin áıgileıdi Qaısar Álimniń jazýynda. Qusadan góri arylýǵa keledi. Ekeýara keshirgen mahabbatty ómirdiń shýaǵyna shomylyp, sáýlesine jylyný kórinis beredi. Barlyq bel-belesterin adaqtap shyǵady. Adam ólse de, shyn júrektiń súıispenshilikke toly serti jyldar boıy ómir súre beretinin baıqaımyz.
«Soǵys bitken soń óziń bilesiń, men elge qaıta almaı bir jarym jyl zaryǵyp, Máskeýdegi ınstıtýt aýrýhanasynda jattym ǵoı. Jastaıǵy sol aýrý qaıta asqynǵan. Oılaıtynym, seni qalaı jetimsiretpeýdiń qamy. Aýrýdan qulan-taza jazylyp, saǵan qosylsam dep tiledim. Tilegim qabyl boldy. Máskeý dárigerleri meni birjola jazyp, saýyqtyryp shyǵardy. Eger jazylmasam, men saǵan turmysqa shyqpaıtyn edim, jandaı súıgen súıiktime aýrýymdy qalaı juqtyramyn? Týberkýlez – juqpaly aýrý. Sondyqtan men seniń janyńa jolaýǵa tıis emes bolatynmyn. Surapyl soǵystan áreń jany qalǵan sen syrqattan aman bolsyn dedim. Osy tilekpen áli jazylar-jazylmasymdy bilmeı, qınalyp júrgen kúnderimniń birinde Almatyda, ýnıversıtette oqyp júrgen saǵan: «Bir jaqsy qyz taýyp úılenip alsańshy», dep hat ta jazdym, bilesiń. Jazýyn jazsam da, hat ketip qalǵannan keıin aǵyl-tegil jyladym. Seni ózimnen ózge eshkimge qımadym. Seniń janyńdy mendeı túsinetin bul dúnıede eshkim joq dep eseptedim. Meniń baǵyma qaraı sen eshkimge úılenbepsiń. Men jazylyp, Máskeýden Qazaqstanǵa qaıttym. Saǵan qosylyp, osynshama baqytqa ıe boldym. Sol kezde meni aýrý meńdep, o dúnıege ketip qalýym da múmkin edi. Meni bala kúnimnen jabysyp, uzaqqa sozylǵan sol aýrýdan sen jazdyń – seniń maǵan degen mahabbatyń jazdy. Ol ras shyǵar. О́z basym ómirdiń eń kúshti dárisi mahabbat dep uqtym».
Bul Halımanyń Ázilhanǵa aıtqan syry, mahabbattyń sózi. Osyndaı adaldyq pen súıispenshilikten qýat alǵan jan ıesi dúnıeden qaıtsa da, onyń ómirsheń rýhy ekinshi jartysyn qalǵan ǵumyrda jebep ótkenine shyǵarma sendiredi. Mahabbatqa ılandyrady.
